Bugünlərdə Gundemxeber.Az saytının redaksiyasına Orucəliyev Kənan Səfa oğlu adlı şəxs tərəfindən şikayət xarakterli müraciət daxil olub və bu şəxs ünvanladığı müraciətində, məhz üzüzə qaldığı haqsızlıqların varlığından bəhs edir.
Belə ki, o, müraciətində qeyd edir ki, “Mən 2010-cu ildən “Azərsun Holdinq” şirkətinin nəzdində fəaliyyət göstərən “Xəzər Mühafizə və Təhlükəsizlik Xidməti-A” MMC-də mühafizəçi vəzifəsində çalışıram. Ötən illər ərzində heç bir əmək intizamının tələblərinin pozulması hallarına yol verməmişəm və “Xəzər Mühafizə və Təhlükəsizlik Xidməti-A” MMC-nin “Azərsun Holdinq”in tərkibində olması haqda, hətta Azərbaycan Respublikası Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti 3 saylı Region Üzrə Dövlət Əmək Müfəttişliyinə müraciət də etmişəm.
Adı çəkilən bu qurumdan mənə “Xəzər Mühafizə və Təhlükəsizlik Xidməti-A” MMC-nin “Azərsun Holdinq”in tərkibində fəaliyyət göstərməsi ilə bağlı cavab veriblər. Onu da qeyd edim ki, mən vəzifəmi Xəzər rayonunda yerləşən Dübəndidə Neft Terminalında yerinə yetirən zaman, adı çəkilən qurumun bir işçisi olaraq vətəndaş hüquqlarım pozuldu. Buna da əsas səbəb, sahə rəisimiz Rüstəmov Ramiz Rüstəm oğlu (Bu şəxsin əməlləri ilə bağlı şirkətə və Əmək Müfəttişliyinə şikayət etdikdən sonra bilmişəm ki, o, polis serjantıdır və şirkətdə qeyri-qanuni çalışır) adlı şəxsin, hər dəfə olduğu kimi 29 sentyabr 2019-cu il tarixdə də, düzülüş və xidmət təlimatı keçən zaman bizə, yəni “Xəzər Mühafizə və Təhlükəsizlik Xidməti-A” MMC-də çalışan əməkdaşlara “peysər” və digər nəlayiq sözləri deməklə, hər birimizi təhqir etməsi oldu.
Mən ona bizi təhqir etməməsini bildirsəm də, o, mənim etirazıma məhəl qoymadı və həmin sözləri bir neçə dəfə ifadə etdi. Növbəti dəfə Ramiz Rüstəmova çalışdığımız sahənin söyüş yeri olmadığını onun diqqətinə çatdırsam da, o, təhqiramiz ifadələrini daha kəskin formada ifadə etdi. Mən vəzifə borcumu yerinə yetirən zaman təhqir olunmuşam və bunun məsuliyyəti “Azərsun Holdinq” şirkətinin üzərinə düşür. Sual oluna bilər ki, səbəb nədir ki, Ramiz Rüstəmov illərdir ki, bizə düzülüş təlimatı keçir, rəislik edir, hətta hər birimizi təhqir etməkdən də çəkinmir. Əslində şirkət öz əməkdaşlarının hüquqlarını hər zaman müdafiə etməyə borcludur. Xatırladım ki, Ramiz Rüstəmovun belə bir əməlləri qanunvericilikdə xuliqanlıq əməli hesab olunur.
Bu şəxslə aramızda əmələ gələn mübahisəni əsas tutaraq, “Xəzər Mühafizə və Təhlükəsizlik Xidməti-A” MMC-nin rəhbər şəxslərinə lazımi məlumatı çatdırsam da, (tək mən yox, düzülüşdə olan bütün əməkdaşlar) nədənsə sahə rəisimiz ilə bağlı heç bir cəza tədbiri görülmədi və yenə də Ramiz Rüstəmov bizə düzülüş təlimatı öyrətməyə başladı. On gündən sonra, yəni 08 oktyabr 2018-ci il tarixdə ona bildirdim ki, sən bizi təhqiramiz ifadələrlə təhqir etdiyinə görə bizdən üzr istəməlisən. Əks halda növbəti düzülüş zamanı iştirak etməyəcəyimi onun diqqətinə çatdırdım. Hətta, ona onu da bildirdim ki, mən işə gələcəyəm, amma bizi təhqir edən sahə rəisinin düzülüşündə dayanmayacağam. Həmin vaxtdan çalışdığım bu işdə müəyyən problemlərlə üz-üzə qaldım və məni bir neçə gün işə buraxmadılar.
Onu da qeyd edim ki, bizə qarşı təhqiramiz ifadələr işlətdiyinə görə Ramiz Rüstəmovu Sabunçu Rayon Məhkəməsinə vermişdim və keçirilən məhkəmə prosesində “Xəzər Mühafizə və Təhlükəsizlik Xidməti-A” MMC-nin beş nəfər əməkdaşı da bildirdi ki, “Ramiz Rüstəmov bizə düzülüş və təlimat keçir. O, bizim rəisimizdir və təlimat zamanı bizə qarşı təhqiredici sözlər işlədib”. Sadaladıqlarımız Sabunçu Rayon Məhkəməsində çıxarılmış qətnamədə açıq-aşkar şəkildə qeyd olunub. Belə bir qətnamənin çıxarılmasına baxmayaraq, qarşı tərəf intizam komissiyası yaratdılar və mənə töhmət verdilər. Hələ bu azmış kimi, əmək haqqımın 40%-ni kəsib on gün (11.10.2018-ci il tarixindən 19.10.2018-ci il tarixinədək) məni işə buraxmadılar. Hətta, iki dəfə mənə xəbərdarlıq məktubu (15.10.2018 və 18.10.2018 tarixlərdə) göndərib təzyiq də etdilər.
İşə buraxılmamağıma səbəb də, mənim töhmətə qol çəkməməyim oldu. Bir müddətdən sonra isə iş yerimi dəyişdilər və işdə olduğum günləri ödənişsiz məzuniyyət kimi sənədləşdirdilər. Güya ki, həmin günlərdə məni öz hesabıma məzuniyyətə buraxıblar. Haqlı ola-ola məni günahkar hesab etdilər və olmazın təzyiqlərə də məruz qaldım. Halbuki həmin günlərdə mən işdə olmuşam (20.10.2018-ci il tarixindən 29.10.2018-ci il tarixədək) və xidməti naryad kitabına imza da çəkmişəm. Həmin günlərdə işdə olduğumu sübut edən sənədlər və şahidlərim var. Onu da bildirim ki, mənə göndərilən xəbərdarlıq məktubu məzuniyyət vərəqi ilə birbaşa ziddiyyət təşkil edir.
2018-ci ilin sentyabr, oktyabr və noyabr aylarında aldığım maaşımın siyahısını məhkəməyə təqdim etmişəm. Oktyabr ayı ərzində az maaş aldığım açıq-aydın görsənir.
Təəssüf hissi ilə qeyd edim ki, şirkət tərəfi Əmək Müfəttişliyinə bildirib ki, “Kənan Orucəliyevdən xəbərsiz idik, o, işə gəlmirdi. Ona görə də, ona xəbərdarlıq məktubu göndərmişdik. Elə ki, Kənan Orucəliyev əvvəlki tarixə öz hesabına məzuniyyət verməyimizi xahiş etmişdi, o halda onun xahişini nəzərə alaraq ona əvvəlki tarixə məzuniyyət verdik”. Bildirim ki, bütün bunlar tam əsassız açıqlamalardır. Belə olan halda xahiş edərdim ki, işə gəlmədiyim haqda yazdığım ərizəni həm mənə, həm də məhkəməyə təqdim etsinlər. Əvvəlki tarixdən məzuniyyət verilməsinin özü də qanunsuzluqdur. Təsəvvür edin ki, həmin günlərdə xəsarət alsaydım, yaxud da həyatımı itirsəydim, demək şirkət tərəfi bunları gizlədə bilərdi. Necə ki, indi gizlədirlər. Guya ki, mən həmin günlərdə işdə olmamışam. Əmək Müfəttişliyinə iki dəfə şikayət etsəm də, şirkət tərəfi bunu məqsədli şəkildə gizlədir. Oktyabr ayı üçün nömrələrin ona görə çıxarılmasını istəyirəm ki, işə buraxmadıqları günlərdə kadrlar şöbəsi əməkdaşlarının mənimlə, mənim isə onlarla mütəmadi telefon danışıqlarımız olub. Mənə Əmək Müfəttişliyindən bildirirlər ki, “biz qanuni əsaslarla araşdırma aparsaq da, “Xəzər Mühafizə və Təhlükəsizlik Xidməti-A” MMC-dən çox şeyləri tələb edə bilmirik. Tələb etdiyimiz sənədləri tam şəkildə bizə təqdim etmirlər, ona görə də apardığımız araşdırmalar məhdud çərçivədə olur”.
Ramiz Rüstəmovla aramızda baş verən mübahisələrdən sonra, əsassız şəkildə iş yerimdə yerdəyişmələr etdilər. Ona görə də, xahiş edirəm ki, bunun səbəbini də açıqlasınlar. Bu şəxs “Xəzər Mühafizə və Təhlükəsizlik Xidməti-A” MMC-nə məxsus postlarda və post kontrol kitablarında hər gün yoxlamalar apardıqdan sonra, həmin kitablarda (öz imzası ilə) qeydlər aparır. Sübut üçün üç şəkil var.
Onu da vurğulayım ki, heç bir əsas olmadan mənə iradlar bildirdiyinə görə Daxili İşlər Nazirliyi, Xəzər RMİ-i tərəfindən Ramiz Rüstəmova ciddi xəbərdarlıqlar olunsa da, şirkət tərəfi məni günahkar hesab edib terminaldan uzaqlaşdırdı. Əmək Müfəttişliyinin mənə göndərdiyi cavab məktubunda isə bildirilir ki, “bu vaxta qədər Xəzər Mühafizə və Təhlükəsizlik Xidməti-A” MMC-nin səndən heç bir narazılığı olmayıb, sənə heç bir halda töhmət verməyib”.
Hətta, onu da qeyd edib ki, “Ramiz Rüstəmov “Xəzər Mühafizə və Təhlükəsizlik Xidməti-A” MMC-nin əməkdaşı deyil”. Adı çəkilən bu şəxs prokurorluqda izahat yazıb verərkən mənə şər atıb ki, guya birinci postun yaxınlığında nalayiq sözlər işlətmişəm. Bu şəxsin bizi təhqir etməsi azmış kimi, o, belə bir addımını da atır. Sonda onu bildirmək istəyirəm ki, mənə saxta yolla düzəldilən məzuniyyət kağızı, iki dəfə göndərilən xəbərdarlıq məktubu, işdə olduğumu sübut edən və naryad kitabından çəkdiyim şəkillərlə qarşı tərəfin səsləndirdiyi fikirlər arasında böyük ziddiyyətlər var. Bütün bunları təsdiq etmək üçün şahidlərim də var. Ramiz Rüstəmov ifadə etdiyi təhqiredici sözlərə görə doqquz aydan sonra məndən və düzülüşdə olan hər bir əməkdaşdan üzr istədi. Əgər o, belə bir addımını atmayıbsa, o halda o, hansı səbəbdən hər birimizdən üzr istəməli oldu.
Ramiz Rüstəmovun polis adına xələl gətirən əməlləri ilə bağlı DİN-in rəhbərliyinə ünvanladığım şikayət xarakterli müraciətim əsasında, 02.07.2019-cu il tarixdə araşdırma işləri aparılmış və mənə Baş Mühafizə İdarəsinin rəis müavini Daşqın Mehdiyevin imzası ilə təsdiq olunmuş cavab məktubu da veriblər. Cavab məktubunda qeyd olunur: “Xəzər rayonunda yerləşən Dübəndi Neft Terminalında Sizinlə birlikdə xidmət aparmış Xəzər RMİ-nin polis nəfəri, polis baş serjantı Ramiz Rüstəm oğlu Rüstəmov tərəfindən xidməti işinzlə bağlı Sizə bir neçə dəfə irad tutması təsdiqini tapdığından, o, Baş Mühafizə İdarəsinin 20 fevral 2019-cu il tarixli 57-038-19 nömrəli əmri ilə intizam tənbehinə cəlb edilmiş, 18.07.2019-cu il tarixdən isə, Ramiz Rüstəmov öz arzusu ilə daxili işlər orqanlarında xidmətdən xaric olunmuşdur”. Bu şəxs qeyd olunan tarixdə daxili işlər orqanlarından xaric olunsa da, çox keçmədi ki, onu “Xəzər Mühafizə və Təhlükəsizlik Xidməti-A” MMC-də işə götürdürlər, hətta ona obyekt rəisi vəzifəsini də həvalə etdilər. Baxmayaraq ki, bu şəxs daxili işlər orqanlarında çalışdığı müddət ərzində neçə-neçə şəxslərə problemlər yaratmışdır. “Azərsun Holdinq” tərəfindən belə bir addımın atılması onu sübut edir ki, bu şirkətdə işçi hüquqlarının müdafiə olunmasından söhbət gedə bilməz. Əgər kimsə iş prosesi zamanı xəsarət alarsa və ya həyatını itirərsə, yəqin ki, o halda şirkət tərəfi bundan boyun qaçırmalı olacaq. Ramiz Rüstəmov polis vəzifəsində çalışarkən, şirkət tərəfindən ona qeyri-qanuni olaraq ikinci iş yeri şərait də yaradılmışdır.
Hər kəs üçün daha çox maraq doğuran hallardan biri də, bu şəxs daxili işlər orqanlarında çalışdığı vaxtlarda, ona “Azərsun Holdinq” şirkətlər qrupunda baş direktor vəzifəsini daşıyan Savaş Uzanın imzası ilə 10.02.2016-cı il tarixdə təsdiq olunmuş (Seriya № 167) təşəkkürnamənin təqdim olunmasıdır.
Ortada lazımi sübut-dəlillərin olmasına baxmayaraq, bugünə kimi şirkət Əmək Müfəttişliyi ilə bərabər, Məhkəməni də aldada bilib və belə bir hadisənin olmadığını israr etməkdədir. Son vaxtlar ortaya çıxan iki səs yazısında isə, hadisələrin necə baş verdiyi açıq-aydın bəlli olur. Səs yazılarından birində bilinir ki, mənə töhmət verilib, şirkət tərəfi isə məhkəmədə qeyd edir ki, “biz işçimizə töhmət verməmişik”. Bundan əlavə, ikinci səs yazısından isə aydın olur ki, şirkətin departamenti mənim tələbim ilə hamını bir araya yığır və Ramiz Rüstəmov düzülüşdə təlimat verdiyi zaman işlətdiyi “peysər” sözünə görə, gəlib hər kəsdən, ələlxüsus məndən üzr istəyir. Bundan əlavə, ortada olan şəkillərdən və səs yazılarından açıq-aydın bəlli olur ki, hal-hazırda şirkət tərəfi dövlət orqanlarını aldatmaqla məşğuldur. Bu gün şirkət əməkdaşları mənə qarşı təzyiqlərini dayandırmır və heç bir səbəb göstərmdən, ötən 12 ay ərzində 4 dəfə iş yerimi dəyişdiriblər. Əldə olan səs yazılarından görünür ki, Ramiz Rüstəmov tərəfindən təhqiramiz ifadələr işlədilib və mən buna etiraz etdikdə, əvəzində mənə töhmət veriblər. Şirkət tərəfi isə bildirir ki, bu hadisəyə görə Ramiz Rüstəmova töhmət verilib və əmək haqqının 10 % -i kəsilib.
Xatirladim ki, Ramiz Rüstəmov bu hadisə baş verən vaxtlarda daxili işlər nazirliyinin əməkdaşı olub və qanunun tələbinə görə şirkətin Daxili İşlər Nazirliyinin əməkdaşına töhmət vermək hüququ yoxdur.
P.S. Hörmətli oxucular! Bu məqalədə sadalanan ittihamların hər biri “Azərsun Holdinq” şirkətinin nəzdində fəaliyyət göstərən və “Xəzər Mühafizə və Təhlükəsizlik Xidməti-A” MMC-də mühafizəçi vəzifəsində çalışan Orucəliyev Kənan Səfa oğluna məxsusdur. Biz bir redaksiya olaraq bu yöndə araşdırmalarımızı aparmağa və gələcəkdə hər kəsi əsl həqiqətlərlə məlumatlandırmağa çalışacağıq. Odur ki, bizi izləməyi unutmayın. Qarşı tərəfin də mövqeyini dərc etməyə hazırıq.
