«4 ildən sonra mənə məlum oldu ki, Fikrət Hacıyev mənim kimi daha 17 nəfər alıcını aldatmış, külli miqdarda pulları ələ keçirərək Tovuzda özünə pansionat tikdirmişdir…»
«Təzadlar»a Sumqayıt şəhəri, 26-cı məhəllə, ev-5//6 , mənzil 7 ünvanda yaşayan İmanov Qədir İsmayıl oğlu tərəfindən şikayət məktubu daxil olub… Şikayət məktubu Azərbaycan Respublikasının Baş Prokuroru cənab Zakir Qaralova ünvanlıdır. Ərizədən bəlli olur ki, İmanov Qədir İsmayıl oğlu 29 noyabr 2011-ci ildə Nərimanov rayonu, «Keşlə» bazarına yaxın sahədə yerləşən «ANT» firması adlanan binada fəaliyyət göstərən «Ulduz-MMC»ni təmsil edən Fikrət Hacıyev adlı şəxslə görüşüb və ona 37.125 min manat nəğd pul verərək həmin firmanın Yasamal rayonu, Yeni Yasamal Yaşayış massivində inşa etdirdiyi 4 blokdan ibarət binanın 4-cü ayrıca inşaa olunan binanın 5-ci mərtəbəsində ümumi sahəsi 82,5 kvm. sahəsi olan ikiotaqlı 37-ci mənzilini alır…
Fırıldaqçıların yeni fırıldağı…
«Ulduz-MMC»ni təmsil edən Fikrət Hacıyev adlı şəxs pulu qəbul edəndən sonra MMC-nin meneceri kimi təqdim etdiyi Fariz Allahverdiyev adlı şəxsə (mobil telefonu təqdim edilir) tapşırır ki, müvafiq sənədləşmə aparılsın… Və sənədləşmə deyilən kimi də aparılır (Redaksiyada 29.11.2011-ci ildə tərtib olunmuş 149-59 saylı möhürlənmiş müqavilə, həmin tarixli «Maliyyə Arayışı» və digər sənədlər vardır).
Beləliklə, İmanov Qədir İsmayıl oğlu bütün lazımi sənədləri qəbul edir, bircə qalır yeni mənzilinin açarını qəbul etmək. Amma… Düz 5 ildir ki, ailənin gözü yolda, qulağı səsdədir ki, yeni mənzilin açarını alacaqlar… Lakin atalar demiş, «Sən saydığını say, gör…» «Ulduz-MMC» nə sayır… Adı çəkilən MMC-nin saydığının nədən ibarət olduğunu xırdalamağa artıq lüzum qalmır. Hələlik bircə onu deyə bilərik ki, ortada dələduzluğun açıq-aydın əlamətləri var. Bunu şikayətçi Baş Prokuror Zakir Qaralova yazdığı ərizəsində qeyd edir və bunu sübut edən sənədləri və maddi sübutları da «Təzadlar»a təqdim edib….
***
Beləliklə, MTK-nın mənzil fırıldağı ilə üz-üzə qalmış şikayətçi Baş Prokurora müraciətində yazır:
«Hörmətli Cənab Baş Prokuror!
Bildirirəm ki, 29 noyabr 2011-ci il tarixdə Nərimanov rayonu, “Keşlə” bazarına yaxın sahədə yerləşən “ANT” firması adlanan binada fəaliyyət göstərən “Ulduz-S-MMC” firmasını təmsil edən Fikrət Hacıyev adlı şəxsə 37.125 manat (otuz yeddi min yüz iyirmi beş manat) pul ödəyərək həmin firmanın Yasamal rayonu, Yeni Yasamal Yaşayış massivində inşa etdikləri 4 blokdan ibarət binanın 4-cü, ayrıca inşa edilən binasının 5-ci mərtəbəsində ümumi sahəsi 82.5 kv.m sahədən ibarət ikiotaqlı 37-ci mənzili almışam. Özünü iş adamı kimi təqdim edən, hətta vətəndaşları qəbulunda xeyli müddət gözlətdirən bu şəxs, pulu aldıqdan sonra şirkətin meneceri kimi təqdim etdiyi Fariz Allahverdiyev adlı şəxsə (050-212-19-17) zəng edərək müqavilənin tərtib edilməsini tapşırdı və qısa bir müddət ərzində müqaviləni, eləcə də, qeyd olunan məbləğdə pulun ödənməsinə dair maliyyə arayışını gətirərək Fikrət Hacıyevə təqdim etdi. Sonuncu möhürlə 149/59 saylı, 29 noyabr 2011-ci il tarixli müqaviləni təsdiq edərək imza olunması üçün mənə verdi və mən də öz adımdan müqaviləni imza edib şərtləri ilə tanış olub götürdüm. Fikrət Hacıyev müqaviləyə xeyir-dua verdikdən sonra, bir il ərzində evin təhvil veriləcəyini və hal-hazırda da orada güclü tikintilər getdiyini söylədi. Mən tikintiyə və gedən işlərə baxmaq üçün tikintinin aparıldığı ünvana getdim və orada artıq üç bloklu evin tikintisinin müəyyən hissəsinin başa çatdığını, 4-cü ayrıca yerləşən blokun isə ilk mərtəbələrinin tikintisinin aparıldığının şahidi oldum. Tikintidə «Mais» adlı briqadirin bir neçə fəhlələrlə işlədiyini görüb ondan da tikinti barədə məlumat əldə etdim və tikintinin bir ilə tamamlanacağını eşitdim. Bundan sonra mən tikintinin başa çatmasını gözləməli olsam da mütəmadi olaraq tikinti ilə maraqlanmaq üçün gedib maraqlanırdım və heç bir tikinti aparılmadığının şahidi olurdum. Aradan bir neçə ay keçdikdə tikintinin meneceri Fariz Allahverdiyev tərəfindən/ 050-212-19-17/ mənə zəng daxil oldu və o mənə bildirdi ki, Fikrət müəllim xahiş etmişdir ki, bir nəfər Rusiyadan gəlmiş alıcıları ilə mən mərtəbəmizdəki ünvanların yerini dəyişək. Belə ki, yeni alıcı yuxarı mərtəbə istədiyindən 4-cü mərtəbədə olan 28-ci mənzili istəmir. Mənim 5-ci mərtəbədən 4-cü mərtəbəyə dəyişməyimi xahiş etdikdə mənim üçün bir mərtəbə fərq etmədiyindən , eləcəə onların dələduz niyyətlərindən xəbərsiz olduğumdan etiraz etmədən onların xahişini yerə salmadım. Mən Fariz Allahverdiyevin zəngi və Fikrət Hacıyevin dəvəti ilə onun o vaxt yerləşdiyi «ANT» firmasının inzibati binasına getdim. Orada Fikrət Hacıyev məndən müqaviləni alaraq Fariz Allahverdiyevə verdi və sonuncu həmin müqaviləni dəyişdirərək ikinci müqaviləni verdi. Yəni, 37-ci mənzil məndən alınaraq əvəzinə qeyd etdiyim kimi 4-cü mərtəbədən iki otaqlı 28-ci mənzili verildi və ilkin müqavilədə göstərilən 29 noyabr 2011-ci il tarix isə dəyişdirilmədən müqavilədə saxlanıldı. Bunlar mənim üçün əhəmiyyət kəsb etmədiyindən heç bir etirazımı bildirmədim və yeni müqavilə və maliyyə arayışını alıb özümdə saxladım. Ancaq hər etimala qarşı köhnə müqavilənin və maliyyə arayışının surətlərini çıxararaq özümdə saxlayıb, yeni tərtib ediləcək müqavilənin əslini aldıqdan sonra onlara həmin müqaviləni təqdim etdim.
«4 ildən sonra mənə məlum oldu ki, Fikrət Hacıyev mənim kimi daha 17 nəfər alıcını aldatmış, külli miqdarda pulları ələ keçirərək Tovuzda özünə pansionat tikdirmişdir…»
Fikrət Hacıyev mənim nə üçün belə ehtiyatlı davranmağımdan, onlara etibar etməməyimə irad bildirərək mənə öz narazılığını ifadə etdi. Doğrusu, gələcəkdə başıma gətiriləcək bəlaları düşünmədən nə üçün bu kimi variantlara əl atıldığını hələ də anlamırdım və güman edirdim ki, bir il ərzində mən öz evimin, mülkiyyətimin sahibi olacağam. Lakin bu belə olmadı, mən bir qrup dələduz tərəfindən aldadıldım və nəticədə 4 il müddətdən sonra mənə məlum oldu ki, Fikrət Hacıyev mənim kimi daha 17 nəfər alıcını aldatmış, külli miqdarda pulları ələ keçirərək Tovuz rayonunda özünə pansionat tikdirmişdir. Dələduzluğunu ört- basdır etmək üçün binanın tikintisini guya başqa firmaya həvalə etmiş kimi alıcıları aldatmışdır. Mən, aldığım evlə maraqlanmaq üçün binanın tikintisini guya davam etdirən, Binəqədi rayonu «Hollivud» restoranında yerləşən «Şərur» MTK firmasına getdikdə orada mənim adımın siyahıda olmadığımı bildirdilər.
«Fikrət Hacıyev «ANT» firmasından qaçmışdı və Nərimanov rayonu, T.Əliyev küçəsindəki «İlhamed» klinikasının yerləşdiyi binanın 2-ci mərtəbəsində özünə başqa bir gizli ofis tutmuş, bir katibə ilə orada oturmuşdu…»
Mən qeyd etdiyim ünvanda yerləşən iki otaqlı mənzilin sahibi olduğumu onlara əlimdəki sənədləri göstərməklə izah etməyə çalışsama firmanın işçiləri bildirdilər ki, onlarlıq bir iş yoxdur, guya onlar sadəcə, yarlmçıq qalmış binanı alaraq tikintisini davam etdirirlər və «Ulduz» MTK-dan daxil olmuş siyahı əsasında mənzilləri başqa alıcılara verirlər… Mən Fikrət Hacıyevi aradım və məlum oldu ki, o, əvvəl insanları qarşılayıb pulunu aldığı «ANT» firmasından qaçmış və Nərimanov rayonu, Teymur Əliyev küçəsində yerləşən, «İlhamed» klinikasının yerləşdiyi çoxmərtəbəli binanın 2-ci mərtəbəsində özünə başqa ofis tutmuş, bir nəfər katibə ilə orada oturmuşdur. Həmin ünvanda onunla görüşərək nə üçün mənim adımın göndərilən siyahıda olmadığını və ümumiyyətlə, nə üçün 4-5 il müddətdən sonra belə bir dələduzluğun səbəbini aydınlaşdırmasını tələb etdim. F.Hacıyev bildirdi ki, sizin evin hal-hazırda 58.000 manat qiyməti var və gətir əlavə pul ödə, sənin adını siyahıya yazdırım. Məndən rüşvət tələb etdiyini, eləcə də 2011-ci il tarixdə müqavilədə göstərilən pulların ödənildiyi halda bu müddətdən sonra belə bir dələduzluq hallarına görə şikayət edəcəyimi ona dedikdən sonra o məndən xahiş etdi ki, ona 2015-ci ilin oktyabr ayınadək vaxt verim. Mənə vəd verdi ki, sənə həmin binadan, orada olmazsa o ətrafda, olmazsa Xırdalan şəhərindən ikiotaqlı mənzil verəcəyəm. Hətta bildirdi ki, mən bilirəm ki, sənin əlindəki sənədə mən başımla cavab verirəm, heç nədən narahat olmaq lazım deyil. 2015-ci ilin oktyabr ayına kimi onu gözləməyimi, heç yerə şikayət etməməyimi xahiş etdikdə mən ona inanıb heç yerə müraciət etmədim. Onun vəd verdiyi vaxtı gözlədim və həmin vaxt ona zəng etsəm də telefonunun bağlı olduğunu gördüm. Onun Nərimanov rayonu, «İlhamed» klinikasının yerləşdiyi hündürmərtəbəli binanın ikinci mərtəbəsində ofisi və katibəsi olduğu yerə dəfələrlə getsəm də katibəsi Fikrət müəllimin məşğul olduğunu deyərək məni içəri buraxmamış, bəzi vaxtlarda isə onun yerində olmadığını demişdir. Dəfələrlə get-gəldən sonra onunla yalnız bir dəfə görüşə və bir dəfədə telegonla danışa bilmişəm və evimi tələb etdikdə onu narahat etməməyimi acıqlı formada bildirərək «Əlindən nə gəlir onu et və hara istəyirsən şikayət et, uzaq başı deyəcəyəm ki, mənə pul verməmisən», dedi… Sonradan mənə məlum oldu ki, bu şəxs «Uldus-S-MMC» firmasında heç bir səlahiyyət sahibi olmamış, yalnız qeyri- rəsmi olaraq firmanı təmsil edərək mənim kimi şəxsləri dələduzluq yolu ilə aldatmaqla məşqul olmuşdur.
Cənab Baş Prokuror!
Mən bir Azərbaycan vətəndaşı olaraq hüquqlarımın bərpasını, əmlakımın qaytarılmasını, dələduzun cinayət məsuliyyətinə cəlb olunmasını Sizdən xahiş eirəm. Dövlətimizin prezidenti İlham Əliyev cənabları mənim kimi milyonlarla Azərbaycan vətəndaşının əmlak, mülkiyyət, can güvənliyinin təminatçısıdır. Cənab Prezident dəfələrlə öz çıxışında, ictimaiyyətə müraciətlərində bu kimi işbazların, dələduzların qanunla ciddi cəzalandırıldıqlarını bildirmişdir. Mənim üç övladım var, Sumqayıt şəhərində yaşayıram, iki tələbə oxuduram, həyat yoldaşım 3-cü qrup əlildir. Onlar hər gün bu yollarda əziyyət çəkirlər. Uzun illərlər onların boğazından, geyimindən, istirahətindən, sağlamlığından kəsib qəpi-qəpik pul yığıb, bir hissəsini borc edb tələbə uşaqlarımın Bakı şəhərində yerləşdirilmələri üçün çalışsam da Fikrət kimi dələduzlar mənim bu ümidimi puça çıxarmış, uzun illərimin zəhmətini mənimsəmişlər.
Odur ki, Fikrət Hacıyev və ona yardımçı olmuş, insanları dələduzluq yolu ilə aldadılaraq külli miqdarda əməlakının ələ keçirilməsinə şərait yaratmış firmanın direktorunun barəsində Azərbaycan Respublikası CM-nin 178.3.2-ci maddəsilə cinayət işinin başlanması, əmlakımın, pulumun qaytarılmasının təmin olunmasına göstəriş verməyinizi xahiş edirəm».
(Davamı var)
«Təzadlar»ın Araşdırma Qrupu
