GUYA HƏSƏN FƏRƏCİ «MOSSAD»IN ƏLİNƏ VERİLİB
DİA.AZ: - İranla Azərbaycan arasında daha bir diplomatik qalmaqal baş verməkdədir. Bildirək ki, hazırda Azərbaycanda həbsxanada saxlanılan iranlı məhbus Həsən Fərəci ilə bağlı məsələ o həddə çatıb ki, artıq Azərbaycanın daxili işlər nazirliyi də olaya reaksiya verərək iranlı məhbusa hər hansı işgəncənin verilməsi iddialarını təkzib edib.
DİA.AZ xatırladır ki, İran Xarici İşlər Nazirliyinin sözçüsü Mərziyə Əfxəm noyabrın 19-da jurnalistlərlə görüşündə Azərbaycan Respublikasında tutulmuş İran vətəndaşından danışaraq Azərbaycan dövlətinin ünvanına müəyyən ittihamlar da səsləndirmişdi.
Mərziyə Əfxəm “Azərbaycan Respublikasında tutulan İran vətəndaşının vəziyyəti, ona bu ölkənin zindanında işgəncə verilməsi iddiaları haqda nə deyə bilərsiniz” sualını belə cavablandırıb: “Azərbaycan Respublikasında sionist rejimin səfirliyinin qabağından keçərkən tutulan İran vətəndaşının həbs olunmasından sonra İranın bu ölkədəki səfirliyi ilkin tədbirlər görməyə başlayıb. Biz Azərbaycan rəsmilərinə nota göndərərək tutulan İran vətəndaşının durumu, eləcə də ona işgəncə verilməsi xəbərinin düz olub-olmadığı məsələsinə aydınlıq gətirilməsini istəmişik. Bundan başqa daha bir məktubla Bakıdakı konsulluğumuzun həmin şəxslə əlaqə saxlamasına, onunla görüşməsinə şərait yaradılmasını istəmişik.
Biz Azərbaycan tərəfinin bu məsələ ilə bağlı təcili və səmərəli əməkdaşlıq etməsini istəyirik. Həmçinin ölkəmizin bütün iranlıların işi üzrə idarəsinin rəhbərləri Azərbaycanın Tehrandakı səfirliyinin rəsmiləri ilə görüşüblər, Bakıda tutulan İran vətəndaşının durumunu onlarla müzakirə ediblər.
Azərbaycan zindanlarında İran vətəndaşına işgəncə verildiyi haqda ötən gün məlumatlar yayılıb. Biz bu xəbərdən çox təəssüflənirik. Əgər bu məlumatlar düz çıxsa, Azərbaycan rəsmiləri buna görə cavabdeh olmalıdırlar. Biz İranın Azərbaycandakı səfirliyi ilə əlaqə saxlamışıq, səfirlik Azərbaycan tərəfinə rəsmi bir məktubla müraciət edərək xəbərin düz olub-olmadığı ilə maraqlanıb. Məsələ həssaslıqla izlənilir. Eyni zamanda hesab edirik ki, Azərbaycan rəsmiləri məsələ ilə bağlı cavab vermək üçün təcili tədbir görməlidirlər”.
Bakıda tutulan İran vətəndaşının adının Həsən Fərəci olduğu bildirilir. Qeyd edək ki, İranın “Aran” agentliyi Həsən Fərəcinin Bakı polisinin Binəqədidəki inzibati həbs məntəqəsində işgəncələrə məruz qaldığı haqda məlumat yayıb. Agentlik qeyd edib ki, işgəncə xəbərini Həsən Fərəcinin tanışları çatdırıb. Agentliyin iddiasına görə, saxlanılan şəxsin bədəni siqaretlə yandırılaraq ondan İsraillə bağlı etiraf almağa çalışıblar.
Bu gün isə İranın xəbər portalları Həsən Fərəci ilə bağlı yeni iddia səsləndiriblər. DİA.AZ-ın «arannyus» portalına istinadən verdiyi məlumatda deyilir:
«Sionist rejimin Bakıdakı səfirliyinin önündən keçdiyinə görə, saxlanılan İran vətəndaşı- Həsən Fərəcinin MOSSAD-ın Bakıdakı məmurlarına təhvil verildiyi ehtimal olunur.
MOSSAD-ın bu işə bilavasitə qarışdığı üçün Azərbaycan R-nın dövlət orqanları İran səfirliyinin konsulluq əməkdaşlarının Həsən Fərəci ilə görüşünə icazə verə bilmirlər.
İran İslam Respublikasının Bakıdakı səfirliyi həmin şəxslə konsulluq əməkdaşlarının görüşünün təşkili ilə bağlı qurumlara müraciət edib. Ancaq bu müraciətə hələlik müsbət cavab verilməyib.
Buna görə Həsən Fərəcinin işgəncələrə məruz qaldığı da hiss olunur».
Hər halda, bu boş və absurd iddianı irəli sürən fars-molla rejiminin nəyə nail olmaq istədiyini təxmin etmək o qədər də çətin deyil. Və elə buna görə də rəsmi Tehranın növbəti təxribat cəhdini önləmək üçün Azərbaycan tərəfi ehtiyatlı davranma yolunu seçib ki, bu da anlaşılandır. Çünki bu günə kimi Azərbaycanla bağlı siyasətində quldur mövqeyi seçən və cəngəllik qanunlarına söykənən İranı Bakıda yaxşı tanıyırlar. Məsələn, İran səfirliyinin əməkdaşı olan Kazıminin Azərbaycana silah gətirmə niyyəti səbəbindən həbsə atılması fonunda rəsmi Tehran azərbaycanlı xanım alim Xalidə Xalidi girov götürmüşdü. Yəni iranlılar öz adamlarının azadlığına adam oğurluğu ilə nail olmaq istəyirlər.
Odur ki, əslində konkret cinayət əməlində ittiham olunan Həsən Fərəci ilə bağlı məsələdə də rəsmi Bakı ehtiyatlı olmaq zorundadır. Bildirək ki, Daxili İşlər Nazirliyinin mətbuat xidmətinin rəhbəri Sadiq Gözəlov İran İslam Respublikasının vətəndaşı Həsən Fərəcinin Bakının Binəqədi rayonunda yerləşən İnzibati Həbs Olunanların Saxlanma Yerində işgəncələrə məruz qalması haqda xəbərə münasibət bildirib.
S. Gözəlov açılamasında deyib ki, Həsən Fərəcinin guya işgəncələrə məruz qalması barədə İranın "Aran" agentliyi tərəfindən yayılan və ölkəmizdəki bəzi KİV-lərdə getmiş məlumatların heç bir əsası yoxdur: “Araşdırmalar zamanı Həsən Fərəci izahatında saxlanma şəraitindən, ona olan münasibətdən narazılığının olmadığını, burada saxlandığı müddətdə özünə qarşı hər hansı təzyiqin, işgəncənin, şərəf və ləyaqətinin alçaldılmasına yönələn hərəkətlərin baş vermədiyini bildirib.
Onu da qeyd etməliyəm ki, məlumatda verilmiş və Həsən Fərəci olduğu iddia edilən fotoşəkil də qondarmadır, ona aid deyil və qəsdən oxucunu aldatmağa yönəlmiş cəhddir.
Bir məsələyə də aydınlıq gətirmək istəyirəm. Bu dezinformasiya yayılana qədər Həsən Fərəci ilə göruş üçün nə müdafiəçisi, nə də yaxınları tərəfindən polis orqanlarına heç bir müraciət daxil olmayıb. Belə bir müraciət olunarsa, mövcud təlimata uyğun olaraq onunla görüşlərin keçirilməsi təmin edilər”.
Onu da bildirək ki, artıq millət vəkili Çingiz Qənizadə də həbsdəki İran vətəndaşı ilə görüşməyə hazırlaşır. Millət vəkili deyib ki, hazırda Bakının Binəqədi rayonunda yerləşən İnzibati Həbs Olunanların Saxlanma Yerinə gedir. Ç. Qənizadə orada İran İslam Respublikasının vətəndaşı Həsən Fərəcinin işgəncələrə məruz qalması haqda xəbərə aydınlıq gətirmək üçün getdiyini deyin. O, İran vətəndaşı ilə görüşəcək və onun işgəncəyə məruz qalıb-qalmadığını müəyən edəcək.
