Azərbaycanda Ədliyyə Nazirliyində siyasi partiyaların dövlət qeydiyyatına alınması prosesi davam edir. Son olaraq, Amerikada siyasi mühacir həyatı yaşayan, sabiq spiker Rəsul Quliyevin fəxri üzvü olduğu Gələcək Azərbaycan Partiyası (GAP) qeydə alınıb. 6 ildir fəaliyyət göstərən bu partiyaya gənc siyasətçi Ağasif Şakiroğlu rəhbərlik edir və uzun illər idi ki, o, partiya sədrliyi ilə yanaşı həm də R.Quliyevin Azərbaycanda rəsmi nümayəndəsi kimi fəaliyyət göstərirdi.
Məhz bu səbəbdən GAP bəzi hallarda sabiq spikerin partiyası kimi də qəbul olunurdu. Ona görə də R.Quliyevin partiyasının qeydiyyatdan keçdiyi yönündə təqdimatlara da ara-sıra rast gəlinir. Bu addım 24 ildir ölkədən kənarda siyasi mühacir ömrü sürən Milli Məclisin keçmiş rəhbərinin ölkəyə qayıdacağı ilə bağlı məsələni bir daha aktuallaşdırıb. R.Quliyevin Azərbaycana yolunun açıldığını düşünənlərin sayı getdikcə çoxalmaqdadır.
Ana Vətən Partiyasının sədri, deputat Fəzail Ağamalı öncəliklə son iki il ərzində Azərbaycanın siyasi mühitində ciddi dəyişikliklərin olduğundan söz açdı: “Dəfələrlə dediyimiz kimi, bir daha xatırlatmaq istərdim ki, 2018-ci ilin prezident seçkilərindən sonra dövlət başçısı seçilən cənab İlham Əliyev həm inauqurasiya mərasimində, həm də digər çıxışlarında Azərbaycanda yeni şəraitin, mühitin yaradılmasının vacibliyini önə çəkdi. Bununla bağlı ciddi və konkret addımların atılacağını da söylədi. Doğrudan da, andiçmə mərasimindən dərhal sonra ölkə Prezidenti həqiqətən Azərbaycanı yeni inkişaf səviyyəsinə çıxaran, cəmiyyətimizin, dövlətimizin bütün tərəflərini özündə ehtiva edən geniş xarakterli islahatlara start verdi. Onların içərisində siyasi partiyaların siyasi mühitimizdə, ölkənin ictimai-siyasi həyatında rolunu artırmaq üçün əhəmiyyətli tədbirlər həyata keçirilməyə başlandı. İlk növbədə, Prezident Administrasiyasında aparılan islahatlarda xüsusi bir şöbə- Siyasi partiyalar və qanunvericilik hakimiyyəti ilə əlaqələr şöbəsi yaradıldı. Bu şöbədə rəhbərliyə cəmiyyətimizdə müsbət imici olan və yüksək təşkilatçılıq qabiliyyəti ilə fərqlənən Ədalət Vəliyev gətirildi. Həqiqətən onun gəlişi ilə ölkə Prezidentinin bu baxımdan qarşısına qoyduğu vəzifələr uğurlu yerinə yetirilməyə başladı. Siyasi partiyaların yeni konfuqrasiyasının formalaşması artıq gündəliyə gəldi.
Bununla bağlı konkret işlər görüldü. Milli Məclisin idarəçiliyində orada təmsil olunan siyasi partiyaların qanunverici orqanın rəhbərliyində yer alması yönündə addımlar atıldı, eyni zamanda xeyli müddətdir ki, siyasi partiya kimi özünü ifadə edən, lakin hələ də qeydiyyata alınmayan partiyaların bir neçəsi qeydiyyata alındı. İndi növbəti dəfə siz dediyiniz partiya qeydiyyatdan keçdi. Bu çox müsbət haldır və bunu alqışlayıram. Məsələ ondadır ki, istənilən vətəndaşımızın siyasi partiya, ictimai birlik yaratmaq hüququ konstitusiyada təsbit olunub. Buna artıq geniş imkanlar yaradılır. İndi bu məsələnin başqa tərəfidir ki, o ictimai-siyasi mühitə qədəm qoyduqdan sonra özünü doğruldacaqmı, ictimai-siyasi proseslərdə fəal iştirak edib, ictimai-siyasi rəyin formalaşmasında rol oynayacaqmı, yaxud qarşıya qoyulan vəzifələrin yerinə yetirilməsində nə dərəcədə bunların öhdəsindən gələcək, artıq bu həmin partiyanın rəhbərlərinin ixtiyarına buraxılır və təbii ki, bir də Azərbaycan xalqının rəyinə. Bu baxımdan düşünürəm ki, hər hansı bir problem yoxdur. Artıq bu yaxınlarda Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin birbaşa yardımı, fəal köməyi ilə bir sıra partiyalar ofislə təmin olunublar. Onların fəaliyyəti üçün normal şərait yaradılıb. Eyni zamanda vaxtaşırı Ədalət Vəliyevin birbaşa iştirakı ilə siyasi partiyalarla bu və ya digər sahələr ətrafında video konfranslar keçirilir, fikir mübadiləsi aparılır. Düşünürəm ki, burada da iqtidar-müxalifət münasibətlərinin daha yüksək səviyyədə həyata keçirilməsinə doğru əhəmiyyətli töhfələr verilir”.
Deputat R.Quliyev ətrafında yaranan söz-söhbətlərə də aydınlıq gətirdi: “Həmin partiyanın Rəsul Quliyevə nə qədər aidiyyətinın olub-olmadığı barədə məndə dəqiq informasiya yoxdur. Amma həqiqətəndə də Rəsul Quliyev ölkəmizə qayıdarsa və konstruktiv mövqedə durub müxalifət olaraq Azərbaycan dövlətçiliyinə, milli maraqlarına müxalifət qütbündə durub fəaliyyət qurarsa, nədən onun gəlməsinə imkan verilməsin? Mənə elə gəlir ki, bunun üçün Azərbaycanda heç bir problem yoxdur. Təki ölkəyə gələn Azərbaycan Konstitusiyası çərçivəsində müxalifətdə olmasından asılı olmayaraq dövlətçiliyimizə və milli maraqlara xidmət etsin. Amma siyasi partiyadan istifadə edib şəxsi ambisiyalarını önə çəkmək, qərəzli mövqe nümayiş etdirmək, milli maraqlarıma ziyan gətirən addımlar atarsa, təbii ki, bu qəbuledilən deyil. Bu baxımdan əgər Rəsul Quliyev Azərbaycana gəlmək niyyətində olsa, hamımız üçün dediyimiz dövlətçilik, milli maraqlarımızla bağlı şərtlərə əməl etsə, mənə elə gəlir ki, o ölkəmizə gələ bilər. Siyasi fəaliyyətini istəsə ölkəmizdə davam etdirə yaxud adi vətəndaş kimi öz həyatını qura, yaşaya bilər”.
A.Şakiroğlu isə partiyasının qeydə alınmasına və R.Quliyevlə bağlı deyilənlərə bu cür şərh verdi: “Ölkədə ötən ilin əvvəlindən başlamış və bu günə qədər davam edən böyük bir siyasi reformalar iradəsi açıq görünür. 2019-cu ilin əvvəllərindən başlayaraq bu günədək davam edən reformaların nəticəsində çoxsaylı ”kök salmış" iri-iri mənfi imicli məmurların tarixin arxivinə göndərildiyinin şahidi olduq. Eyni zamanda bu reformaların davamı kimi korrupsiyaya qarşı sərt mübarizə aparıldı və hazırda da aparılır. Onlarla korrupsioner icra başçılarını buna misal göstərmək olar. Bütün bunlara paralel olaraq isə ölkədə yeni siyasi münasibətlər dövrü başladı. İqtidar-müxalifət münasibətlərinin dialoq müstəvisinə keçməsi ölkədə sivil siyasi münasibətlərin təməlini qoydu. Əlbəttə ki, bütün bu atılmış addımlar ölkə rəhbərliyinin tapşırıqları və siyasi iradəsi hesabına baş verib. Biz partiya olaraq dövlətimizin, dövlətçiliyimizin və Silahlı Qüvvələrin Ali Baş Komandanının atdığı qətiyyətli addımları dəstəkləməli idik. Bu vətənimizə, dövlətimizə və xalqımıza düşmən qarşısında sədaqət məsələsi idi. Ümumilikdə eks-spiker Rəsul Quliyev hər zaman dövlət və dövlətçilik məsələsi müzakirə mövzusu olanda dövlət və dövlətçiliyin yanında dayanmış şəxsdir. 1994-cü ilin oktyabrında dövlət çevrilişinə cəhd zamanı, həmçinin 1995-ci ilin mart qiyamı zamanı ortaya qoyduğu sağlam mövqeyi buna misal göstərmək olar. Çox təəssüflər ki, hakimiyyət daxilində zamanla mövcud olmuş “Beşinci kolon”un maraqlarına xidmət edən şəxslər Rəsul Quliyevdən “xoxan” obrazı yaradıblar. Bu da zamanla dövlət daxili “Beşinci kolon”un nümayəndələrinin şəxsi qrup və mafiya maraqlarına xidmət edib.
Hazırda isə məsələlər çox şükürlər ki, çox fərqlidir. Ümumilikdə, Rəsul Quliyev kimi dövlət və dövlətçilik anlayışı olan, eyni zamanda dövlətçilikdən xəbərdar olan insanlar öz vətənlərində dövlətlərinə və xalqlarına töhfə verə, Rəsul Quliyevin dövlətçilik təcrübəsindən faydalana bilər. Düşünürəm ki, yaranmış yeni siyasi konfiqurasiya Azərbaycanda yeni model, sağlam iqtidar-müxalifət münasibətlərini formalaşdırmaqdadır. Belə demək mümkünsə, ölkəmizdə Türkiyə modeli iqtidar-müxalifət münasibətləri formalaşır. Bütün bunlar isə olduqca sevindiricidir. Rəhbəri olduğum partiyanın dövlət qeydiyyatına alınması da bu münasibətlərin açıq göstəricisidir. Ölkədə yaradılmış bu mühitə görə isə ölkə başçısına və hörmətli birinci vitse-prezidentə xüsusi təşəkkür düşür. Sağlam münasibətlər, sağlam rəqabət sağlam inkişaf deməkdir».
“Yeni Müsavat”
