Rusiya Federasiyasının kəşfiyyat xidməti (FSB) Ukrayna Təhlükəsizlik Xidmətinin (SBU) tapşırığını yerinə yetirdiyi iddia edilən bir qrup “neonasist”in həbs edildiyini elan edib – sən demə, onlar əsas rus təbliğatçılarına qarşı sui-qəsd hazırlayırmışlar. Rusiyanın “Telegram” kanalları FSB tərəfindən saxlanılanlardan birinin SBU-də işləməsi və Kremlin ruporlarının qətllərini hazırlaması barədə “etirafına” istinad edərək, müvafiq xəbərləri aktiv şəkildə dərc edir.
İnternetdə sifəti retuş edilən həbs edilmiş şəxsin Rusiya televiziyasının məşhur simalarının - Vladimir Solovyov, Yevgeni Popov, Olqa Skabeyeva, Marqarita Simonyan və Tiqran Keosayanın onun hədəfinə çevrilməli olduğunu iddia etdiyi video yayılıb. Bundan başqa, həmin şəxs bildirib ki, bir qrup “neonasist” Rusiya Federasiyasının və hərbi komissarlıqların üzərində “xüsusi əməliyyatı”ın simvolları olan avtomobilləri yandırmağa hazırlaşır.
SBU-nun mətbuat xidməti öz “Telegram” kanalında təcavüzkar ölkənin bu cür ittihamlarına reaksiya verərək bildirib ki, idarənin əldə etdiyi məlumatlara baxmayaraq, Rusiya Federasiyasının xüsusi xidmət orqanlarının yeni fantaziyalarını ciddi şərh etmək niyyətində deyil. Buna FSB-nin növbəti "yaradıcılığı" ilə tanışlıq kimi baxırlar.
Ukrayna Təhlükəsizlik Xidmətinin nümayəndələri xatırladıblar ki, qətlə yetiriləcəyi iddia edilən Vladimir Solovyov ictimai xadim deyil, Rusiya Federasiyasının sıravi təbliğatçısı və Qebbelsin analoqudur. Bundan əlavə, Kremlin ruporu beynəlxalq məhkəmə qarşısında cavab verəcək və təbliğatçıların hamısı Ukrayna dövlətinin Rusiyaya qarşı müharibədə qələbəsindən sonra törətdikləri cinayətlərə görə cavab verəcəklər.
Mətbuat xidməti əlavə edir ki, SBU Solovyovu aradan götürməyi planlaşdırmır, lakin təbliğatçının özünün baza fəaliyyətinin “məhsulları”nda boğulmaq riski var.
Yeri gəlmişkən, bu yaxınlarda FSB Putinin dostu Viktor Medvedçukun Ukraynadan təxliyəsi üçün keçirdiyi xüsusi əməliyyatı uğursuzluğa düçar edib. O, SBU tərəfindən saxlanılıb. Rusiya təhlükəsizlik qüvvələrinin bu fiaskosu barədə SBU-nun rəhbəri İvan Bakanovun özü danışıb.
Bəs, Solovyov və onun Skabeyeva, Simonyan kimi dostları kimə lazımdır? Hətta hipotetik şəkildə qəbul etsək ki, belə bir əməliyyat planı var, o zaman ona tələb edilən xərclər və xaricdə, düşmən dövlətin ərazisində həyata keçirmək risklərinə dəyərmi? Nəhayət, adları çəkilənlər Kreml kanallarından yoxa çıxsalar, dərhal onların yerlərinə hər gün hürməyə, yalan danışmağa, boşboğazlıq etməyə hazır olan başqaları tapılacaq. Dia.az xəbər verir ki, AYNA mövzunu tanınmış əcnəbi ekspertlərlə müzakirə edib.
Ukraynanın keçmiş informasiya siyasəti nazirinin müavini, Post-İnformasiya Cəmiyyəti İnstitutunun direktoru, Kiyev-Mogilyan Akademiyasının müəllimi Dmitri Zolotuxin:
“Şübhəsiz ki, FSB tərəfindən hər hansı sərsəm bəyanatların müzakirəsi son dərəcə qeyri-konstruktiv vaxt itkisidir. Bununla belə, bu tamaşada “noviçok və alt paltarlar” ustası (FSB Navalnının alt paltarına zəhərli maddə vuraraq zəhərləməyə çalışırdı) olan rus cəngavərlərinin fəaliyyət pərdəsini qaldıran dekorasiyanın bəzi hissələrinə də diqqət yetirmək lazımdır. Əvvəla, rus təbliğatçılarının aradan qaldırılması barədə çıxış Rusiya elitasında və hətta xüsusi xidmət orqanları daxilində siyasi parçalanmanın növbəti sübutudur.
Axı, hətta FSB də monolit təşkilat deyil. Onların da öz “partiyaları” var, onları müxtəlif siyasi cərəyanlar əhatə edir. Baş verən bütün proseslərin heç də hamısına Bortnikov rəhbərlik etmir. Bəzi yüksək rütbəli zabitlər o qədər müstəqildirlər ki, hətta Bortnikovun özünə qarşı da işləyə bilərlər.
Məsələn, FSB-nin hərbi əks-kəşfiyyat idarəsinin rəisi, general-polkovnik Nikolay Petroviç Yuryev müdafiə naziri Sergey Şoyqu ilə möhkəm bağlıdır və hərbi tikintidə inanılmaz büdcə vəsaitlərinin mənimsənilməsinə hamilik etməklə məşğuldur. Söhbət trilyonlarla rubldan gedir. Təəccüblü deyil ki, jurnalistlər Şoyqunun qohumlarından, onun müavinlərindən və Yuryevlər ailəsindən dəbdəbəli əşyalar - evlər və yaxtalar tapıblar.
Bu faktları nəzərə alsaq, Ukrayna ərazisini işğal etmək üçün gələn rus qoşunlarının məğlubiyyəti çox məntiqli görünür.
Eyni zamanda, FSB və Xarici Kəşfiyyat Xidmətinin (SVR) rəhbərliyinin daha bir irimiqyaslı problemi var - bu, Rusiya büdcəsindən milyardlar ayrılan kəşfiyyat və əməliyyat fəaliyyətinin tamamilə uğursuzluğudur.
Həqiqətən də, güc blokunun təminatlarına görə Putin bu işğalın tort kimi olacağına əmin idi - rus əsgərləri isə gül-çiçəklə qarşılanacaqdı. Əksinə, onları qurğuşun yağışı ilə qarşıladılar. Və ən döyüşə hazır bölmələrin minlərlə ölü elit döyüşçüləri üçün kimsə amansız cəzaya məruz qalmalıdır. Və bu “kimsə” mütləq FSB-də yüksək vəzifədə oturur.
Bu faktları nəzərə alsaq, guya rus təbliğatçılarına qarşı sui-qəsd cəhdləri olan teatr tamaşasının səbəbi mümkün qədər şəffaf və anlaşılandır. FSB-nin ayrı-ayrı departamentlərinin rəhbərliyinə rusları qorumaq imkanları barədə informasiya rezonansına ehtiyacı var. Bu rezonansın siyasi çəkisi olmalıdır.
Və belə bir rezonansı kim təmin edə bilər? Bəli! Həftənin 7 günü, günün 24 saatı Rusiya televiziyasında oturan ən yaxşı təbliğatçılar. İndi bu təbliğatçılar minlərlə rus əsgərinin ölümündə kimin günahkar olması sualını gündəmə gətirməkdənsə, 7/24 özlərinə suiq-qəsd barədə danışacaq, FSB-ni tərifləyəcəklər.
Təbii ki, bu teatr tamaşasının Ukrayna ilə heç bir əlaqəsi yoxdur. Onun məqsədi daxili çəkişmələr ucbatından dağılan FSB-nin əhəmiyyətini göstərməkdir”.
Azad Rusiya Fondunun Cənubi Qafqazdakı (Tbilisi) nümayəndəliyinin rəhbəri Yeqor Kuroptev:
“Hazırda Kremlin bütün addımları Ukraynanın açıq şəkildə qalib gəldiyi informasiya müharibəsini hansısa yolla geri qaytarmaq istəyi ilə diktə olunur. Eyni zamanda, Rusiya şəhərlərində yanan neft anbarlarının, Rusiya ordusunun böyük itkilərinin və Putinin informasiya sahəsindəki digər “xüsusi əməliyyatının uğurlarının” qarşısını almaq üçün nəsə etmək lazımdır.
Əminəm ki, təbliğat indi daha çox neonasistləri üzə çıxaracaq, hətta Li Harvi Osvald Rusiya Prezident Administrasiyası boyunca damlarda qaçacaq və s.
Əgər SBU və ya başqa bir xidmət Kremlin xırda kölələrini aradan götürmək istəsəydi, bu, çox asan olardı.
Və nəhayət, FSB-yə bir sual: muzdlu qatillərə nasist ədəbiyyatı niyə lazımdır? Pusquda olanda oxumaq üçün? Aydındır ki, bunlar qızğın daxili auditoriya üçün nağıllardır və bu əməliyyatın reallıqla heç bir əlaqəsi yoxdur”.
