Azərbaycan Dövlət Neft və Sənaye Universitetinin rəhbərliyi tərəfindən cidd-cəhdlə mediada “islahatçı və şəffaflıq timsalı” piarı aparılsa da heç də həmişə cidanı çuvalda gizlətmək mümkün olmur. Universitetdə bir qəpik də olsun rüşvət, korrupsiya hallarının olmaması ilə bağlı məlumatlar tirajlansa da bunun tamamilə əksini sübut edən faktlara da rast gəlmək mümkündür. Universitet tələbələrinin medyaya verdiyi açıqlamalara görə indi rüşvətin “modern” forması tapılıb. İmtahanlardan tələbələr kütləvi şəkildə kəsilir. Çünki imtahandan kəsilən tələbə bir fənn üçün universitetə ən azı 150 manat pul ödəyir və təqaüddən məhrum edilir. Bu yolla əldə olunan vəsaitlərin taleyini isə rektor daha yaxşı bilir.
Xüsusilə Mustafa Babanlının rəhbərliyi dönəmində universitetdə müəllimlərlə baş verən qalmaqallar daima diqqət mərkəzində olub.
Verilən məlumata görə, M. Babanlı müxtəlif yollarla illərlə universitetdə çalışan, böyük təcrübəyə malik müəllimləri kollektivdən uzaqlaşdırıb. Azərbaycan Respublikasının mövcud qanunvericiliyinə, o cümlədən Əmək Məcəlləsinin 50-ci maddəsinin 2-ci bəndinə uyğun olaraq "Müəyyən vəzifələrin müsabiqə yolu ilə tutulması elmi müəssisə və təşkilatlar və təhsil müəssisələrində elmi, elmi-pedaqoji fəaliyyətlə bağlı vəzifələr üzrə elan edilir. İşçilərin elan olunmuş müsabiqədə bərabərhüquqlu iştirakı təmin edilməlidir". Qanunvericiliyə uyğun olaraq təhsil müəssisələrində elmi, elmi-pedaqoji fəaliyyətlə məşğul olan professor-müəllim heyətinin 5 illik fəaliyyət müddəti bitdikdə onların vəzifələri vakant elan olunur və öz vəzifələrinə yenidən seçilmək üçün müsabiqə elan edilir. Müsabiqədə iştirak edən professor-müəllim heyətinin öz vəzifələrinə yenidən seçilmələri üçün onların 5 illik elmi-pedoqoji fəaliyyəti əsas götürülür. Lakin, verilən məlumata görə qanunvericiliyin qeyd edilən tələblərinin ziddinə olaraq, ADNSU-nin rektoru, professor Mustafa Babanlı universitetin professor-müəllim heyətinin öz vəzifələrinə yenidən seçilmələri üçün öz "qaydalarını" müəyyənləşdirib, öz “kriteriyalarına” uyğun gəlməyənləri isə vəzifədən kənarlaşdırıb.
Rubrika.Az saytına verilən məlumata görə bilavasitə M. Babanlının birbaşa təşəbbüsü ilə ADNSU-nin Elmi Şurası 23 dekabr 2015-ci ildə "Azərbaycan Dövlət Neft Və Sənaye Universitetində elmi işçilərin dərəcələrinin artırılması və təyinatı üzrə TƏLİMAT" qəbul edilib və Təlimat 01 mart 2016-cı ildə qüvvəyə minib. Təlimata uyğun olaraq professorların öz vəzifələrinə yenidən seçilmələri məqsədi ilə müsabiqədə iştirak etmələri üçün 110 bal, dosentlərin -50 bal, assistentlərin-35 bal toplaması tələb olunur.
Saytımıza verilən məlumata görə, professor-müəllim heyətinin pedoqoji fəaliyyətinin əsas nəticələri (hazırladıqları tədris proqramları, metodiki tövsiyələr, dərsliklər, buraxılış işlərinə rəhbərlik, açıq dərslərin nəticələri və s.) nəzərə alınmır, yalnız PHD, magistr dissertasiyalarına,dərc edilmiş mühazirə konspektləri, laboratoriya təlimat kitabları, dərc edilmiş elmi məqalələri nəzərə alınır.
Rubrika.Az saytına ötən il universitetdə baş verən rektorun “müsabiqə oyunu” ilə bağlı ilginc məlumatlar daxil olub. Belə ki, "Respublika” qəzetinin 01 may 2018-ci il tarixli 96 (6129) sayında 158 vakant yeri tutmaq üçün müsabiqə elan edilmiş və bunu əsas götürərək müsabiqədə iştirak etmək üçün müvafiq qaydada ərizələr təqdim edilməyə başlanılıb. Ancaq 07 may 2018-ci ildə ADNSU-nin akt zalında rektorun adından şifahi şəkildə ərizə təqdim edən 158 nəfərə təklif olunur ki, may ayının 30-da işdən çıxmaq üçün ərizə yazsınlar, işdən azad olunsunlar, iki-üç gündən sonra müsabiqədə iştirak edib yenidən öz vəzifələrinə seçiləcəklər.
Təbii ki, bu zaman rektorun xüsusi maraqları nəzərə alınırdı-çünki, 30 mayda işdən azad olunan işçilər müsabiqədə ADNSU əməkdaşı kimi iştirak etmək hüququnu itirirdilər. Rektorun bu qeyri-qanuni tələbində məqsədi yenidən seçiləcək professor-müəllim heyəti ilə əvvəllər bağlanmış müddətsiz əmək müqaviləsini birtərəfli qaydada müddətli müqavilə ilə əvəz etmək istəyi durub.
Rektorun bu “oyununu” yaxşı başa düşən 158 əməkdaşın işdən çıxmaq tələbinə qəti etirazını nəzərə alaraq onların 30 mayda işdən çıxmaları ilə bağlı tələb geri götürülüb. Ancaq öz istəyinə nail olmayan rektor daha bir "yeniliyə" əl atıb. Belə ki, əməkdaşların müsabiqədə iştirakının əngəllənməsi üçün "Respublika" qəzetinin 01 iyun 2018-ci il tarixli 121 (6154) saylı nömrəsində ADNSU-nin yeni, aşağıdakı məzmunda elanı çap edilmişdir: "Respublika" qəzetinin 01 may 2818-ci il tarixli №96 (6129) sayında ADNSU-də vakant yerləri tutmaq üçün verilmiş müsabiqə elanı kifayət sayda ərizələrin verilməməsi səbəbindən ləğv olunur. Müsabiqənin qanunauyğun şəkildə keçirilməsi üçün yeni elan müvafiq zamanda veriləcəkdir".
Rubrika.Az saytına verilən məlumata görə, ADNSU-nin rektoru birtərəfli qaydada öz istəyinə nail olmaq məqsədi ilə, professor-müəllim heyətinin işdən çıxmaları üçün ərizə yazmalarında israr edir və bunu yazılı yox, şifahi halda, dekanların və kafedra müdirlərinin əli ilə reallaşdırmağa çalışır.
Rubrika.Az saytı xatırladır ki, 2018-ci ilin iyun ayında saytımızda Azərbaycan Dövlət Neft və Sənaye Universitetinin "İstilik energetikası mühəndisliyi" kafedrasının bir qrup müəlliminin müraciəti dərc olunmuş və yazıda kafedra müdiri Sevinc Babayeva barəsində tənqidi fikirlər yer almışdı. Şikayətçilər S. Babayevanı ümumi işin ziyanına addımlar atmaqda, müəllimlərin fikirlərinə məhəl qoymamaqda, yalnız öz bildiyini etməkdə ittiham edirlər. Xatırladaq ki, saytımızın prinsipial mövqeyi, məsələni diqqətdə saxlaması nəticəsində problem həll olundu, rector şikayətləri nəzərə almağa məcbur oldu.
Rubrika.az saytına verilən məlumatlara görə M.Babanlı ADNSU-da özünə əməlli-başlı biznes şəbəkəsi də formalaşdırıb. Hər ay bu şəbəkədən əldə olunan külli miqdarda vəsait isə hələ də vergi orqanlarından gizlədilir, heç bir rəsmi sənədlərdə qeyd olunmur. Belə ki, universitetin bütün mərtəbələrində bufet-kafelər fəaliyyət göstərir. Həmin bufet-kafelər isə yüksək qiymətlərə icarəyə verilir, bütün bunlar isə heç bir vergi bəyannaməsində əks olunmur. Xatırladaq ki, bir müddət əvvəl yoxlama aparan vergi əməkdaşları qanun pozuntularına görə universiteti cərimə də etmişdilər. Amma, yenə də vəziyyət elə əvvəlki kimidir-böyük vəsaitlər vergidən yayındırılır, mənimsənilir.
Həmçinin Rubrika.Az saytına verilən məlumatlara görə, M.Babanlı son zamanlar media ilə “sıx əlaqələr” qurmağa meyillənir. Belə ki, ADNSU-da hökm sürən qanunsuzluqları, narazılıqları ört-basdır etmək, haqqında səsləndirilən şikayət dolu məlumatların yayəılmasını önləmək üçün bir çox medya qurumları, saytlar ilə “razılıq” əldə olunub. Hətta universitetin mətbuat xitmətinin bildirdiyinə görə bir çox media qurumları ilə illik "əməkdaşlıq" da əldə edilib. Görünür M. Babanlı universitetdə baş verənlərin “gün işığına” çıxarılmasında maraqlı deyil. Həmçinin universitet daxilində də sərt nəzarət mexanizmi işləyir-narazılar, rektora etiraz edənlər ciddi nəzarətə götürülür, addımları belə güdülür, əgər hər hansı şikayət olarsa dərhal təqib olunur, incidilirlər.
Ümumiyyətlə M. Babanlının “medya siyasətinin” maraqlı tərəfləri var. Bildirilir ki, bir çox KİV-lərlə “əməkdaşlıq” yapılsa da, bəzilərinə qırmızı işıq yandırılır. Aldığımız məlumata görə, rektorun qəzəbinə tuş gələnlər sırasında hətta dövlət televiziyası da var. Amma, rektor özünə təhlükəli sandığı media qurumları ilə dil tapa bilir.
Nəticədə M. Babanlı mediada “atəşkəs rejimi” yaratmağa müvəffəq olub. Amma, bu sakitlik daha çox tufanqabağı sakitliyə bənzəyir!
