Məlum olduğu kimi, Milli Şura son bir ay ərzində 2 mitinq keçirib və indi də növbəti aksiyaya hazırlaşır. Son illərin təcrübəsi göstərir ki, adıçəkilən qurumun sosial bazasının zəifliyi, funksionerlərinin təzadlı keçmişi, insanların şahmat piyadası kimi təhlükə önünə atılması təşkil edilən mitinqlərdə az-çox kütləviliyi təmin etməyə imkan vermir. Belə olduğu təqdirdə Əli Kərimli və Milli Şuranın digər funksionerləri məşhur tarixi sualla üz-üzə qalırlar: nə etməli? Sualın mahiyyəti aydındır: əvvəlki miitinqlər zamanı boş qalan kiçik bir stadionu mümkün qədər doldurmaq, süni görüntü yaradaraq "izdihamlı aksiya keçirdik” deyə qürrələnmək və donorların etimadını doğrultmaq üçün hansı yollara əl atmalı?
Daim öz mənafelərini ümummilli maraqlardan üstün tutan, erməni diasporu və mediası, Arzu Qeybulla, Riçard Kozlariç, Devid Kramer və s. kimi ermənipərəst ünsürlərlə əməkdaşlıq etməkdən çəkinməyən Milli Şura rəhbərləri aksiyalara əlavə insan cəlb etmək üçün istənilən qüvvə ilə ittifaqa girməyə hazırdır. Təbii ki, bu istəyin fonunda Azərbaycanda şəriət dövləti qurmağa dəfələrlə cəhd etmiş radikal dini qruplar diqqətdən kənarda qala bilməzdi.
Məlumdur ki, son illər region ölkələrində radikal dindarların aktivləşməsi və dini konsepsiyaların məscidlərdən meydanlara transfer olması nəticəsində qanlı olaylar yaşanır, dövlət aparatları bir-bir sıradan çıxır, Suriya, İraq kimi bəşər sivilizasiyasının beşiyi sayılan ölkələr xarabazarlığa çevrilir, onların vətəndaşları miqrant kimi Avropada tikanlı məftillər arxasında boynubükük ömür sürürlər. Təbii ki, Milli Şuranın funksionerləri bunlardan xəbərdardırlar. Amma hakimiyyət hərisliyi, xarici təşviq və ifrat tamahkarlıq Əli Kərimli və onun komandasının gözünü örtüb.
Azərbaycan dünyəvi ölkədir və onun Konstitusiyasında da təsbit olunduğu kimi, din dövlətdən ayrıdır. Buna baxmayaraq, zaman-zaman ölkəmizdə dini-ekstremist cərəyanlar baş qaldırmaq istəyib və bu proses indi də davam etməkdədir. Bu kimi cəhdlərin qarşısı müvafiq dövlət orqanları tərəfindən vaxtında və qətiyyətlə alınıb. İki il əvvəl Nardaran qəsəbəsində radikal terrorçu qruplaşma zərərsizləşdirildi. O vaxt elə təsəvvür yarandı ki, bu uğurlu əməliyyatla Azərbaycanda zərərli dini cərayanların kökü birdəfəlik kəsildi. Amma sonradan məlum oldu ki, xaricdən qidalanan dini radikalizm Nardaran hadisələrindən sonra Milli Şuranın simasında özünə müttəfiq taparaq, siyasi mübarizə adı altında yeni platforma əldə edib. Artıq biz onları "Məhsul” stadionunda görürük.
Bir neçə gündür ki, həmin qaraguruh sosial şəbəkələrdə Milli Şuranın mitinqi üçün çağırışlar edir, insanları hakimiyyət əleyhinə qeyri-dinc mübarizəyə səsləyir. Etiraf etmək lazıımdır ki, xaricdən idarə olunan radikal dini qruplaşmaların "Facebook”dakı bu cür çağırışlarının təməlində, bir tərəfdən, onların Azərbaycan dövlətinə və dövlətçiliyinə qarşı nifrəti dayanırsa, digər tərəfdən, sosial şəbəkələrdəki cəzasızlıq və nəzarətsizlik mühiti belə halların ortaya çıxmasına imkan verir.
Gəlin dini zəmində hökumət əleyhinə kəskin çağırışlar edən bəzi "Facebook” səhifələrinə və profillərinə nəzər yetirək. Onu da xatırladaq ki, bu səhifə və profillərin hamısı, Əli Kərimli ilə bərabər, Milli Şuranın mitinqini təbliğ etməklə məşğuldur.
Tanış üslubdur. Dövlət və dövlət nümayəndələrinə qarşı eyni aqressiyanın dini mübarizə donunda İraq, Liviya və başqa ölkələrdə hansı fəlakət və qətliamlara səbəb olduğu hər kəsə məlumdur. Milli Şuranın müttəfiqləri növbəti paylaşımlarında "qana-qan” deyirlər və dini cameəni Nardaran hadisələrinin qisasını almağa çağırırlar.
"Nur-Az.com” adlı İranmeyilli başqa bir sayt isə Azərbaycan polisini hədəf göstərərək paylaşımlar edir və xalqı mitinqə səsləyir. Eyni zamanda, saytın sosial şəbəkədəki səhifəsində dindarların İmam Hüseyin kimi hər an şəhadətə hazır olmaları təbliğ olunur.
Nur-Az.com
22 Oktyabr, 22:40 ·
ŞEYTANİ SİYASƏTLƏRLƏ MÜBARİZƏ YOLU
Əgər Allahı dost tutursunuzsa şəhadət arzusunda olun
İndi bir adam bir növ siyasət oyunları qarşısında dayanmaq istəsə nə etməlidir? Yolu nədir?
Yol, həmin İmam Hüseynin (ə) göstərdiyi yoldur. Əgər Allahı dost tutursunuzsa şəhadət arzusunda olun. Şəhadəti arzu edən, məhbubunun görüşünü arzu etməzmi? Biz gərək bunları öyrənək. Gərək bu yolla hərəkət edək. Dünya arzularına o qədər də bel bağlamamalıyıq. Dünyanın bər-bəzəklərinə aldanmamalıyıq. Allah yolunda, müqəddəs amallar uğrunda şəhadəti ən böyük iftixar bilməliyik. Belə olan surətdə dini, milli dəyərlərimizi qoruya bilərik. Bu imam Hüseynin (ə) bizə öyrətdiyi dərsdir. Necə ola bilər biz Hüseynçi olmaq istəyirik, ona ehtiram göstərib, xatirəsini əziz tuturuq, amma bununla belə ondan bu cür dərsləri öyrənə bilməmişik? Bizim yeniyetmələr arasında Qasim ibni Həsəndən nümunə götürəcək adamlar çoxdur. Eləcə də Həbib ibni Məzahirə yoldaş olacaq yaşlılarımız var. Biz bu karvandan geri qalmamalıyıq. Allah yolunda, millət uğrunda şəhadəti şərəf, iftixar bilmək bizim qəlblərimizin açarıdır. Əgər müharibə olsa, şəhadətə hazır olmalıyıq. İmamın yanına nə qədər cavan gəlib ixtimas edirdilər ki, ağa dua edin biz də şəhadətə çataq. Təəssüflər olsun ki, bu günlər belə dəyərlər unudulur. Ancaq Hüseynin (ə) adının bərəkətindən bu dəyərlər yenidən dirçəlməlidir.
***
İki polis əməkdaşını qətlə yetirən dini-terrorçu qruplaşmanın rəhbəri Tale Bağırzadə də həbsdə olmasına baxmayaraq, mitinq təşkilatçılarını qızğın şəkildə müdafiə edir, tərəfdarlarını Əli Kərimli və Milli Şura ilə həmrəyliyə səsləyir.
AXCP Gencler Komitesi
4 saat ·
Müsəlman Birliyi Hərəkatının rəhbəri Tale Bağırzadədən önəmli çağırış
Oxu və paylaş
"Biz istəyirik ki, qanunvericiliklə olsun hər şey tətbiq olunsun. Bizim gözəl qanunlarımız var. İstəyirəm ki, qanunlar hamı üçün işlək olsun. Oktyabrın 18-i Müstəqillik Günüdür. Lakin bayram kimi qeyd etmirlər. Bunlarda dövlət anlayışı yoxdur, ancaq klandır. Bunları ən çox qorxudan bizim Əli Kərimli və Milli Şura ilə birlıikdə olmağımızdır. Biz dindarlara da başa salırıq ki, Milli Şura, Əli Kərimli düz yoldadırlar və onlarla bağlı deyilən yalanlara inanmasınlar. Milli Şura dindarları müdafiə edir və bizim arxamızdadır. "
***
Bəli, terrorçu qruplaşmanın rəhbəri Tale Bağırzadə özü də etiraf edir ki, Milli Şura bizim arxamızdadır. Yəqin ki, analoji hal Türkiyədə baş versəydi, deyək ki, Fəthullah Gülən hansısa bir qurumun onu dəstəklədiyini bildirsəydi, dərhal həmin qurum haqqında Türkiyənin hüquq-mühafizə orqanları tərəfindən müvafiq hüquqi prosedurlara start verilərdi.
Milli Şura radikal şiə qrupları ilə əməkdaşlığı o qədər dərinləşdirib ki, artıq qurum, müxalif mövqeli partiya və fərdlərin birləşdiyi platformadan çox, Azərbaycanda dünyəvi hakimiyyətin mövcudluğu ilə barışmayan radikal dini qrupların qərargahına bənzəyir. Hesab edirik ki, müvafiq dövlət qurumları ayıq-sayıq olmalı, islam dininin ölkədaxili siyasi mübarizədə yerli və xarici dairələr tərəfindən istifadə edilməsinə imkan verməməlidirlər.
Publika.az
