Bugünkü müsahibimiz Əli Kərimlinin rəhbərlik etdiyi təşkilatın Nəzarət-Təftiş Komissiyasının sabiq sədri Aydın Əliyevdir.
Qeyd edək ki, Aydın Əliyev Əli Kərimliyə qarşı məhkəmə iddiası qaldırıb. A.Əliyev iddia ərizəsində Əli Kərimlinin partiyaya daxil olan ianə və s. pulları mənimsədiyini, ancaq öz nəzarətində saxladığını, bu pulları özünün, ailəsinin və xaricdə yaşayan övladlarının dəbdəbəli həyatına sərf etdiyini, yüzlərlə cəbhəçini aldatdığını, hər birindən öz şəxsi mənafeyi üçün istifadə etdiyini bildirib. “Yurd” sədrinin anti-demokratik hərəkətlərinə etraz edənləri ləkələdiyini, böhtanlara məruz qoyduğunu və partiyadan uzaqlaşdırdığını, partiyada sərt diktatura rejimi qurduğunu bildirən A.Əliyev Əli Kərimlini “siyasi dələduz” adlandırıb.
A.Əliyev iddia ərizəsində həmçinin, Əli Kərimli tərəfindən vəzifə səlahiyyətlərinin həyata keçirilməsinə imkan verilmədiyini, onun Nəzarət-Təftiş Komissiyası haqqında Əsasnamənin tələblərini kobud şəkildə pozduğunu qeyd edib və Komissiyanın sədri vəzifəsini icra etməyə maneçilik törətməsinin aradan qaldırılması barədə qətnamə çıxarılmasını istəyib. Hazırda məhkəmə prosesi davam edir.
Aydın Əliyev son vəziyyətlə bağlı Cebhe.info-nun suallarını cavablandırıb.
“Əli Kərimlinin vəkili jurnalistlərin məhkəmə prosesində iştirakında etiraz etdi”
-Aydın bəy, Əli Kərimli ilə bağlı məhkəmə prosesi nə yerdədir?
-Məhkəmə prosesi koronavirusla əlaqədər dayandırılıb. Yəqin ki, mayın 31-dən sonra bununla bağlı qərar veriləcək. Amma bütün hallarda bu müddətdə məhkəmə işinə baxılması ilə bağlı qərar yoxdur. Mən məhkəmədə vəsatət qaldırmışam ki, proseslərə jurnalistlər buraxılsın, proses canlı yayımlansın. Çox güman ki, bu vəsatət qəbul olunacaq. Hətta Əli Kərimlinin vəkili jurnalistlərin məhkəmə prosesində iştirakında etiraz etdi. Çünki onlar mənim haqlı olduğumu bilirlər və ona görə də istəmirlər ki, jurnalistlər prosesdə iştirak etsin.
“Rəyasət Heyətinin məni partiyadan çıxarmaq səlahiyyəti yoxdur”
-Siz partiyadan niyə çıxarılmısınız?
-Əli Kərimlini “siyasi dələduz” adlandırdıqdan sonra Nəzarət- Təftiş Komissiyasının sədri vəzifəsini icra etməyimə maneçilik törədilib. Bu maneənin aradan qaldırılması ilə əlaqədar 27 noyabr 2019-cu ildə Nəsimi rayon Məhkəməsinə müraciət etmişəm. Nəsimi rayon Məhkəməsində iş hakim Cəmilə Musayevanın icraatındadır. Məhkəmə baxışı zamanı Əli Kərimlinin nümayəndəsi və vəkili Fəxrəddin Mehdiyev tərəfindən mənim iddia ərizəmə etiraz təqdim edildi. Həmin etirazda 10 iyun 2019-cu il tarixli Ali Məclisin Rəyasət Heyətinin ümumi yığıncağının çıxarışı protokola əlavə olundu. Çıxarışda qeyd olunurdu ki, həmin tarixdə Rəyasət Heyətinin iclası 12 nəfərin iştirakı ilə keçirilib və həmin yığıncağın qərarı ilə partiyadan xaric edilmişəm. Mənim partiyadan xaric edilməyimin səbəbi Nəsimi rayon Məhkəməsində iddia qaldırmağım olub. Əli Kərimlinin göstərişi ilə Rəyasət Heyəti köhnə tarixə guya ümumi yığıncaq keçirib və xəbərim olmadan partiyadan xaric olunmuşam. Həmin qərar mənə 9 yanvar 2020-ci ildə məhkəmə iclası zamanı təqdim edilib. Ali Məclisin 10 iyun 2019-cu il qərarı qanunsuz və əsassız olduğundan, 30 yanvar 2020-ci il tarixində Nəsimi rayon Məhkəməsinə yeni iddia ərizəsi ilə müraciət etmişəm. Qərar qanunsuz olduğu üçün ləğv edilməsini və mənim partiya üzvülüyünə, Nəzarət- Təftiş Komissiyasının sədri vəzifəsinə bərpa olunmağımla bağlı qərar qəbul olunmasını xahiş etmişəm. Belə ki, Rəyasət Heyətinin məni partiyadan çıxarmaq səlahiyyəti yoxdur. Bu səlahiyyət ancaq partiyanın qurultayına aiddir. Partiya nizamnaməsinin 6.5 maddəsində göstərilir ki, qurultaylararası müddətdə partiyanın ali orqanı Ali Məclisdir. Ali Məclis qurultayın müstəsna səlahiyyətinə aid olan məsələlərdən başqa partiyanın bütün məsələlərini müzakirə və həll edir. Ali Məclisin səlahiyyət müddəti isə 2 ildir. Ümumiyyətlə, bu qərarın qanunsuz olması ilə bağlı yetəri qədər sübutum var. Belə ki, Rəyasət Heyətinin 10 iyun 2019-cu ildə mənim partiyadan uzaqlaşdırılmağımla bağlı verilən qərardan çıxarışda partiya mövqeyinə zidd olan siyasi hərəkt etməyimlə, nizamnamənin 3.2, 3.4, 3.6 maddələrini pozmağımla, partiyanın məqsəd və vəzifələrini icra etməkdən imtina etməyimlə bağlı sübutlar qeyd edilməyib və ya qərara əlavə olunmayıb.
Bununla bağlı 28 fevral 2020-ci ildə Nəsimi rayon Məhkəməsində vəsatət qaldırmışam. Həmin vəsatət məhkəmədə Əli Kərimlinin vəkili Bəhruz Bayramova təqdim edilib. Həmin məhkəmə iclasında müşahidəçi qismində partiyanın Ali Məclisinin sədr müavini, Rəyasət Heyətinin üzvü İradə Əliyeva və Nəzarət- Təftiş Komissiyasının üzvü Təzəxan Mirələmli iştirak edib. Məhkəmə qaldırdığım iddia əsasında Nəsimi rayon Məhkəməsinin hakimi Rəşid Səmədovun sədrliyi ilə 5 iclas keçirilib. Eyni zamanda, 27 noyabr 2019-cu ildə məhkəmə iclası zamanı Əli Kərimlinin vəkili Fəxrəddin Mehdiyevin, Ali Məclisinin sədr müavini, Rəyasət Heyətinin üzvü İradə Əliyevanın və Nəzarət -Təftiş Komissiyasının üzvü Təzəxan Mirələmli iştirak etməsinə baxmayaraq, Əli Kərimlinin nümayəndəsi və vəkili Bəhruz Bayramov bildirdi ki, partiyanın hüquqi ünvanı olmadığından məhkəmə bildirişi partiya nümayəndəsinə çatmayıb. Bəhruz Bayramov bu bildirişi götürməkdən imtina edib. Göründüyü kimi, bu prosesin Əli Kərimli tərəfindən uzadılmasına cəhdlər var.
-Əli Kərimli Rəyasət Heyətində hansı tapşırıqlar verirdi ki, sizin etirazına səbəb oldu? Sizi narazı salan məqamlar nə oldu?
-Ümumiyyətlə, Rəyasət Heyətinin Nəzarət- Təftiş Komissiyasının sədri, üzvü haqqında hər hansı bir qərar vermək və ya müzakirə etmək səlahiyyəti yoxdur. Nizamnamə çərçivəsində də buna yol verilmir və bu hal nizamnaməyə tamamilə ziddir. Ona görə də onların mənimlə bağı qərar verməsi qeyri-qanunidir.
-Məhkəmə iddianızda belə bir məqam var. İddia edirsiz ki, Əli Kərimli sizə ziyan vurub. Söhbət maddi ziyandan gedir?
-Sağlamlığıma zərər vurub. Maddi məsələni mən qabartmıram. Çünki 30 il bu partiyada fəaliyyət göstərmişəm. Mənim haqqımda qeyri-qanuni, nizamnaməyəzidd qərar çıxarıblar, 30 il bir yol gəlmiş şəxsə qarşı yaraşmayan hərəkət ediblər. Bu baxımından, mənə zərər vurduğunu demişəm. Mən bu partiyanın fəal üzvü, rayon təşkilatının sədri olmuşam. Çox təəssüf edirəm ki, Əli Kərimlinin tapşırığı ilə keçirilən, heç bir əsası olmayan, onun biznes marağına uyğun bütün icazəsiz aksiyalarda fəal iştirakçı olmuşam. Ona görə də polis dəyənəyinə tuş gəlmişəm. Hazırda da stressdən, qorxudan aldığım travmaların ziyanını çəkirəm. Hazırda həkim nəzarətindəyəm, müalicə olunuram. Ona görə deyirəm ki, Əli Kərimli mənim sağlamlığıma birbaşa zərər vurub. Amma məhkəmə iddiamda hər hansı bir kompensasiya tələbi yoxdur. Sadəcə, ictimaiyyətə bildirmək istəyirəm ki, Əli Kərimliyə qoşulan insanlar onun bu oyununda iştirak etməsinlər.
“Çünki onlar bilirlər ki, bu məsələdə mən haqlıyam, Əli Kərimli isə haqsızdır”
-Sizə qarşı bir müddətdir ki, sosial şəbəkələrdə söyüş kampaniyası aparılır. Ümumiyyətlə, Əli Kərimlinin təşkilatında söyüş kampaniyasının birbaşa onun tapşırığı ilə həyata keçirildiyi deyilir. 30 il orada olmusuz. Söyüş kampaniyası rəhbərlik səviyyəsində hazırlanırmı?
-Təbii ki, sosial şəbəkədəki söyüş kampaniyası birbaşa Əli Kərimli etiraf etməsə də, o partiyanın rəhbər orqanlarının tapşırığı əsasında aparılır. Onlar müxtəlif gizli saxta profillərlə sosial şəbəkəyə girib söyüş kampaniyasında iştirak edirlər. Məni tanıyan istər partiya funksionerləri, istərsə də siravi üzvlər açıq şəkildə heç vaxt söyməyiblər. Çünki onlar bilirlər ki, bu məsələdə mən haqlıyam, Əli Kərimli isə haqsızdır. Amma Əli Kərimli onlara vəd verir ki, guya hakimiyyətə gələcək və onlara vəzifə verəcək. Mən isə heç bir vəd verə bilmirəm, belə bir niyyətim də yoxdur. Mən ancaq haqq-ədalət vədini verirəm. Özləri də deyirlər ki, hansı cəmiyyətdə yaşayırıqsa, orada haqq-ədalət, demokratik quruluş olsun. Mən birbaşa Əli Kərimliyə demişəm ki, bu söyüş kampaniyası durdurulsun. Bilirəm ki, bu tapşırıq birbaşa Əli Kərimli tərəfindən verilir. Mən öz səviyyəmi gözləyərək məni söyənlərin heç birinə də cavab verməmişəm. Təbii ki, mən ədalətli məhkəmə qərarı ilə Əli Kərimlinin iyrənc işlərlə məşğul olduğunu, nizamnaməyəzidd qərarlar verdiyini ifşa etməklə bir daha haqlı olduğumu sübut edəcəyəm.
“Söyüş kampaniyasının başında duran elə Əli Kərimlinin özüdür”
- Əli Kərimli söyüş kampaniyasında birbaşa iştirak edirmi?
-Sosial şəbəkələrdən izləyirəm. Xaricdə yaşayan söyüşçül blogger Qəbul Məmmədov birbaşa deyir ki, Əli Kərimlinin başına yığışın, onu müdafiə edin. Amma Əli Kərimli bir dəfə çıxıb demir ki, mənim adımdan istifadə etməyin. Bu, nəyin göstəricisidir? Əgər söyüş, təhqir dolu çıxışlar edən bir adam Əli Kərimlini dəstəkləyirsə və onun da bundan xəbəri yoxdursa, çıxsın müraciət etsin ki, Qabil Məmmədov, mənim adımdan istifadə etmə. Amma bunu etmir. Ona görə də düşünürəm ki, söyüş kampaniyasının başında duran elə Əli Kərimlinin özüdür.
