ƏYALƏTDƏKİ DURUM BUNU ZƏRURİ EDİR
Mikayıl Cabbarov təhsil naziri təyin ediləndən sonra bölgələrin təhsil sistemində elə də ciddi islahatlar aparılmadı. Sabiq nazir Misir Mərdanovun dönəmində vəzifəyə gələn bəzi Rayon Təhsil Şöbələrinin (RTŞ) müdirləri heç bir cəzaya məruz qalmadan işlərini davam etdirməkdədirlər. Qeyd edək ki, nazir dəyişəndə bəzi şöbə müdirləri əl-ayağa düşüb vəzifələrini itirəcəklərindən ehtiyat etmişdilər. Ancaq gənc nazirin əyalət təhsilinə istənilən səviyyədə diqqət ayırmaması nəticəsində bu sahədə mövcud olan problemlər öz aktuallığını qoruyub saxladı.
Ölkə rəhbərliyi tərəfindən regionlarda təhsil sisteminin inkişaf etdirilməsi məqsədilə bir sıra mühüm tədbirlər həyata keçirilsə də, fəaliyyəti başdan-başa qüsurla zəngin olan bəzi vəzifə sahibləri bu etimadı doğrultmurlar. Onlar yaradılan şəraiti düzgün qiymətləndirməyərək bu sahəyə yad olan meyllərə müraciət edirlər. Şirvan düzünün şimal-qərbində yerləşən Ağdaş rayonunun təhsil sistemi haqqında da xoş sözlər söyləmək çox çətindir. Məlumat üçün söyləyək ki, rayonda 68 ümumtəhsil məktəbi və 3 məktəbdənkənar tərbiyə müəssisəsi fəaliyyət göstərir. Ümumtəhsil məktəblərindən 41-i tam orta, 18-i ümumi orta, 9-u ibtidaidir. Həmçinin Ağdaşda M.Şeyxzadə adına Texniki, Təbiət və Humanitar təmayüllü Gimnaziya, Uşaq Yaradıcılıq Mərkəzi, Uşaq Gənclər Şahmat Məktəbi və Uşaq Gənclərİdman Məktəbi də fəaliyyət göstərir. Rayon Təhsil Şöbəsinin müdiri isə artıq bu vəzifədə «əbədilik» qazanmış Lütvi Paşayevdir.
Onun fəaliyyətinə yaxından bələd olan məlumatlı şəxs bizə olduqca ilginc informasiyalar çatdırıb. Mənbənin sözlərinə görə, Ağdaşda mövcud olan təhsil ocaqlarında qanunsuzluğun pik nöqtəyə çatması birbaşa şöbə müdirinin adı ilə bağlıdır: «Lütvi Paşayev təhsil şöbəsinə müdir keçəndən sonra Ağdaşda təhsilin səviyyəsi çox aşağı düşüb. Rayonun orta ümumtəhsil məktəblərində normal təhsil verilmir. Müəllimlərin yetərli hissəsi dərsə vaxtlarını keçirməyə gəlirlər. Şöbə müdiri fəaliyyət göstərdiyi neçə il ərzində çoxlu qanun pozuntularına imza atıb. Keçmiş nazir Misir Mərdanovun kadrı kimi məşhur olan şöbə müdiri bəzi məktəb direktorlarını və müəllimləri nəyinsə müqabilində işə götürüb. Bu direktorlar isə vəzifəyə gələ bilmək üçün verdiklərini şagirdlərin hesabına çıxarırlar. Rayon mərkəzində yerləşən məktəblərdə hər ay təmir və digər işlər adı ilə pul yığılır. Təhsil şöbəsinin müdiri bu məsələlərdən xəbərdar olsa da, direktorları cəzalandırmır». Məlumatda bildirilir ki, Təhsil Nazirliyi tərəfindən Ağdaş məktəblərinə pulsuz dərsliklər göndərilsə də, bəzi müəllimlər yeni dərs ili başlayan kimi birinci və ikinci sinif sagirdlərinə dərs vəsaitlərini pulla satıblar. Valideynlər bununla bağlı Təhsil Şöbəsinin müdirinə şikayət ediblər: «Şöbə müdiri isə dərs vəsaitlərinin pulla satılmasından xəbərsiz olduğunu deyib. Əslində isə direktorun hər şeydən xəbəri var. Belə ki, müəllimlərə bu göstərişi şöbə müdiri şəxsən özü verib. Heç bir müəllim, yaxud direktor onun icazəsi olmadan nəysə edə bilmir. Məndə olan məlumata görə, geridə qalan yay tətili ərzində rayonda bəzi məktəblərin təmir olunması məqsədilə dövlət büdcəsindən vəsait ayrılıb. 2011-2012-ci dərs ilinə hazırlıqlaəlaqədar məktəblərin əsaslı və cari təmiri üçün yerli büdcədən 35 min 200 manat ayrılıb.
Bu dərs ilinə hazırlıq məqsədilə isə qeyd olunan rəqəm iki dəfə artıq olub. Lakin həmin məbləğ şöbə müdirinin rəhbərliyi altında təyinatdan kənar işlərə sərf edilib. Şeyxzadə adına gimnaziya, 7 saylı şəhər, Qəsil kənd tam orta, Zeynəddin kənd ümumi orta, Aşağı Qəsil kənd ibtidai məktəblərində bir neçə il əvvəl əsaslı təmir işləri görülüb. Təmirin üstündən az vaxt keçsə də, məktəblər pis günə düşüb. Çünki təmirə ayrılan pulların çoxu mənimsənilib. Şöbə müdirinin yaşı çox olsa da, vəzifədən getmək istəmir». Deyilənə görə, RTŞ müdiri rayonda fəaliyyət göstərən 3000-ə yaxın müəllimi başqa-başqa işlərə məcbur edir: «Şöbə müdiri rayonda aparılan quruculuq-abadlıq işləri üçün hər müəllimin maaşından ayda müəyyən məbləği tutur. Və bildirir ki, bunu Rayon İcra Hakimiyyətindən istəyiblər. Halbuki, icra hakimiyyəti təhsil şöbəsinin müdirindən bu cür istəklərdə bulunmur».
Hesab edirik ki, bu qədər fakt bəs edər.İndiəsas iş Mikayıl Cabbarova qalır. Nazir RTŞ müdirinin fəaliyyəti ilə maraqlanıb onun barəsində lazımi ölçü götürməlidir.
Yazı ilə bağlı qarşı tərəfin də mövqeyini işıqlandırmağa hazırıq.
