Keçənlərdə vətəndaş Gündüz Ramazanovun şikayət ərizəsi əsasında hazırladığımız tənqidi material dərc olunmuşdu. Qeyd edək ki, materialda toxunulan mövzu son vaxtlar xoşagəlməz tendensiya halını almış bir problemlə bağlı idi. Təəssüflər olsun ki, bu gün ölkənin müxtəlif inşaat meydanlarında müqaviləsiz-filansız çalışan fəhlələrin son nəticədə haqlarının kəsilməsi, podratçı və subpodratçı qismində çıxış edən briqadalara razılaşmaya əsasən nəzərdə tutulmuş pulun verulməməsi artıq adi bir hala çevrilmişdir. Həm də bu kimi hallar kifayət qədər tez-tez rast gəlindiyi kimi, eyni zamanda da bir növ çarəsizliyi ilə diqqəti cəlb edir. Sifarişçi şirkətlə icraçılar arasında vasitəçi rolunu oynayan şəxslər, bir çox hallarda ümumiyyətlə heç bir müqavilənin bağlanmamasından istifadə edərək usta və fəhlələrin haqqını “yeməyi” artıq özlərinin daimi gəlir mənbəyinə çevirmişlər. Təbii ki, bu kimi hallara çox zaman işgüzar dairələrdə elə də yüksək nüfuza malik olmayan şirkələrin fəaliyyətində rast gəlinir. Lakin Gündüz Ramazanovun şikayəti belə qənaətə gəlməyə əsas verir ki, ölkəmizin ən iri, ən nüfuzlu holdinqləri belə bəzən özlərini əliəyri icraçıların əməllərindən sığortalaya bilmirlər.Məlum olduğu kimi “Gilan” Holdinq ölkənin əsas iqtisadi nəhənglərindən biridir. Ölkə iqtisadiyyatının əksər sahələri – qida məhsulları istehsalı, yüngül səaye, kənd təsərrüfatı, turizm və digər bu kimi istiqamətlər “Gilan” Holdinqin maraq dairəsinə daxildir. İnşaat sektorunda “Gilan” Holdinqi təmsil edən şirkət isə “Gilan İnşaat” MMC-dir. Bu şirkət yaşayış komplekslərinin, istirahət mərkəzlərinin, idman komplekslərinin, körpülərin, yeraltı qarajların, yeraltı keçidlərin layihələndirilməsi və tikintisi ilə məşğul olur. Əlbəttə ki, bu günə mövcud olan bütün iqtisadi göstəricilər “Gilan İnşaat” MMC-ni ilk növbədə etibarlı bir tərəf müqabili kimi təqdim edir. Lakin qeyd olunduğu kimi bu gün ölkənin inşaat sektorunda artıq son dərəcə arzuolunmaz bir tendensiya formasını almaqda olan fırıldaqçılıq halları “Gilan İnşaat” MMC-dən də yan keçməmişdir. Elə redaksiyamıza şikayət ərizəsi ilə müraciət edən G. Ramazanov da belə bir fırıldaq əməlinin qurbanı olduğunu iddia edir. Öz ərizəsində Gündüz Ramazanov bildirmişdi ki, o, rəhbərlik etdiyi briqada ilə birlikdə artıq beş ildən artıq bir müddətdir ki, “Gilan İnşaat” MMC ilə əməkdaşlıq edir. Şikayətçinin sözlərinə görə bir müddət əvvəl onun briqadası “Gilan İnşaat” MMC-nin sifarişi əsasında, Qəbələ şəhərində inşa olunan “Karvansara” otel kompleksinin və konfrans zalının tikintisində iştirak etmişdir. İnşaat işləri artıq tamamilə başa çatsa da, “Gilan İnşaat” MMC-nin təmsilçiləri Gündüz Ramazanovun briqadasına görülmüş işlərə görə yaranmış borcu ödəməkdən boyun qaçırırlar. G.Ramazanov bildirir ki, yaranmış borcun məbləği 15 000 (on beş min) manat təşkil edir. Lakin, icraçıların “Gilan İnşaat” MMC-nin ərazi kuratoru kimi tanıdıqları və indiyə qədər maliyyə məsələlərinə baxan Elxan adlı şəxs həmin məbləği ödəməkdən imtina edir. Maraqlıdır ki, tərəflər arasında borcun məbləğinə dair heç bir mübahisəli məqam da yaranmayıb. Sadəcə olaraq Elxan fəhlələrin pulunu verməkdən imtina edir. Yeni aldığımız məlumatlarda isə mübahisəli məsələyə artıq Qəbələ Rayon İcra Hakimiyyətinin rəhbərliyi səviyyəsində də baxıldığı bildirilir. Qeyd olunur ki, problemin həll olunmasında köməklik göstərilməsi xahişi ilə Gündüz Ramazanovun briqada üzvləri Qəbələ RİH-nin başçısı Səbuhi Abdullayevə müraciət etmişlər. Bundan sonra isə şikayətçilər başçının birinci müavini Abil Ağasəfov tərəfindən qəbul edilmişlər. Söhbət zamanı briqada üzvlərinə məsələnin araşdırılacağı bildirilmişdir. Bir müddət keçdikdən sonra Gündüz Ramazanova bildirilmişdir ki, araşdırmalar nəticəsində qarşı tərəfin həqiqətən də borclu olduğu, lakin bu borcun 15 min deyil, cəmi 10 min manat təşkil etdiyi müəyyənləşdirilmişdir. Bəy verən atın dişinə baxmazlar, deyən G.Ramazanov bununla da razılaşmışdır. Lakin məsələnin həlli bu məbləğin təyin olunmasından sonra yenidən “dondurulmuşdur”. Aradan kifayət qədər müddətin keçməsinə baxmayaraq şikayətçilər hələ də öz pullarını ala bilmirlər..
