Bu gün Azərbaycan Respublikası Ali Məhkəməsi vətəndaş Sübhan Zayıdovla “Yeni Həyat Şirkətlər Qrupu” arasında yaşanan mülki məsələyə aydınlıq gətirəcək. Mülki məsələ olmasına baxmayaraq, bir çox müşahidəçilər Ali Məhkəmənin bu gün verəcəyi qərarın olduqca böyük əhəmiyyət daşıdığı fikrində həmrəydirlər. Sözügedən məhkəmə prosesinin əhəmiyyətini artıran məqam isə prosesin özündən çox, onun ətrafında yaradılan dedi-qodulardan qaynaqlanır.
“Hürriyyət”in məlumatına görə, iş adamı Sübhan Zayıdovun 15 il öncə “Mərmər” ASC-dən aldığı, Xətai rayonu, Zığ qəsəbəsində yerləşən 5 hektarlıq ərazi 10 ildən sonra “Yeni Həyat Şirkətlət Qrupu” tərəfindən ələ keçirilmiş və tərəflər arasında ciddi məhkəmə çəkişmələrə səbəb olmuşdur. İlk əvvəl tərəflər arasındakı çəkişmələrə incələyən Xətai rayon məhkəməsi “Yeni Həyat”ın lehinə qərar vermiş, daha sonra Bakı şəhər Apellyasiya məhkəməsi bu qərarı qüvvədə saxlamışdı. Son instansiya məhkəməsinin bu gün çıxaracağı qərar açıq-aşkar qanun pozuntularının yer aldığı sənədlərə hüquqi qiymət verəcək.
Məsələni qəlizləşdirən ən əsas məqam isə ondan ibarətdir ki, “Yeni Həyat Şirkətlər Qrupu”nun rəhbəri Babək Babayev Prezident ailəsinin adından istifadə edərək özgə mülkiyyətini qanunsuz yolla ələ keçirə bilmişdir. Halbuki, Dövlət Əmlak Komitəsinin 2014-cü ildə “Yeni Həyat”ın adına rəsmiləşdirdiyi həmin ərazinin 10 il əvvəl Babək Babayevə satıldığı barədə hüquqi sənədlər var. Notarus tərəfindən təsdiqlənən həmin sənədlərdən bəziləri:
Azərbaycan Respublikasının Prezidentinin yanında Qiymətli Kağızlar üzrə Dövlət Komitəsinin 10/2-118 nömrəli 20.09.2003 –cü il tarixli arayışı, Azərbaycan Ədliyyə Nazirliyi tərəfindən 30.12.2004-cü il tarixində verilmiş 0102-A1-1313 nömrəli Dövlət Qeydiyyatı Haqqında Şəhadətnamə, eyni nazirliyin Hüquqi Şəxslərin Dövlət Qeydiyyatı üzrə Bakı Bölgə şöbəsinin 30.12.2002-ci il tarixli Kommersiya Təşkilatlarının Dövlət Reyestrindən Çıxarışı, Əmlakın İnventarlaşdırılması Bürosunun 26.08.2004-cü il tarixli Texnik Pasportu və s. Bakı “Mərmər” ASC-yə 26 avqust 2004-cü ildə verdiyi № 006906 saylı Textiniki pasport, Bakı şəhər İcra Hakimiyyətinin ozamankı sədri Hacıbala Abutalıbovun 16.11.2007-ci il tarixli, № 7-972/17 saylı məktubu, Azərbaycan Respublikasının Dövlət Əmlakının İdarəedilməsi ürə Dövlət Komitəsinin “Mərmər” ACS-yə 01.07.2007-ci il tarixində göndərdiyi № 08-2/4075 saylı arayışı, alqı-satqı, təhvil-təslim aktları və s.
Bütün bu sənədlərə baxmayaraq, Dövlət Əmlak Komitəsinin həmin ərazini “Yeni Həyat Şirkətlər Qrupu”nun adına özəlləşdirməsi və məhkəmələrin sözügedən özəlləşdirmə əməliyyatını qanuni hesab etməsi təəccüb doğurur və bu suala yol açır:
Görəsən, “Yeni Həyat” bu imtiyazını və gücünü hardan alır?
B.Babayev Sübhan Zayıdovla söhbətlərində dəfələrlə “Yeni Həyat”ın ona deyil, Prezidenti qızı Arzu Əliyevaya məxsus olduğunu, özünün isə sadəcə sifariş yerinə yetirdiyini bildirmişdir. İnformasiya qaynağımız onun eyni iddialarla məhkəmə orqanlarını və Dövlət Əmlak Komitəsinin yetkililərini də aldada bildiyinə inanır:
“Mənim bildiyimə görə, Babək Babayevin himayədarı sabiq Vergilər naziri Fazil Məmmədov olub. Fazil Məmmədovun vasitəçiliyi ilə bir çox mülkiyyətləri qanunsuz yolla ələ keçirən Babək Babayevin zərər vurduğu mülkiyyətçilərdən biri də Sübhan Zayıdovdur. Fazil Məmmədovdan sonra o, Prezident ailəsinin adından istifadə edərək, öz qanunsuz əməllərinə haqq qazandırmağa çalışır. Məhkəmələrin məsələni dərindən araşdırmamasının səbəbi də budur”.
Məhkəmə orqanlarının bu yanlış qərarı “Yeni Həyat”ın Prezident ailəsinin adından istifadə etməsi ilə əsaslandırılsalar da, hadisənin arxasında daha təhlükəli məqamların dayanması ehtimalı mövcuddur və bu ehtimallar, zənnimizcə, daha inandırıcıdır. Məsələ burasındadır ki, Prezident İlham Əliyev son zamanlar etdiyi çıxışlarında bir çox islahatlara gedəcəyini bildirmişdi. Onun vədlərindən biri də hüquqi islahatlardır. Məhkəmə-hüquq sistemində aparılacağı gözlənilən həmin islahatlar zamanı bir çox hakimlərin və məhkəmə sədrlərinin də kitabının bağlanacağı güman olunur. Görünür, məhkəmə sisteminin başbilənləri vətəndaşın mülkiyyət hüququnun pozulmasında Prezident ailəsinin adını hallandırmağa şərait yaradan qərarları ilə ölkə başçısını çətin vəziyyətə salmaq istəyirlər. Başlıca məqsəd bəlkə də bu iddiaların beynəlxalq məhkəmələrə daşınması və ölkə başçısının islahatçı imicinə kölgə salmaq ola bilər.
Bu ehtimalı artıran arqumentlər də az deyil. Yadınızdadırsa, bir neçə gün əvvəl Ali Məhkəmə bir şahid ailəsinin mülkiyyəti barədə cəmiyyətdə böyük xəyal qırıqlığı yaradan qərar qəbul etmişdi. İş adamı Şərurlu İsfəndiyarın lehinə verilmiş bu qərar şəhid ailəsini yaşadığı evdən çölə atılmasıyla nəticələnmişdi. Öz canını vətən torpağı üçün qurban verən bir şəhidin ailəsinə 50 kvadrat metrlik dörd divarın çox görülməsinin toplumda yaratdığı narazılığa daha sonra I Vitse-prezident Mehriban xanım tərəfindən son qoyulmuşdu. Mehriban xanım həmin ailəyə ev bağışlamaqla mürtəce qüvvələrin ölkə rəhbərliyinə qurduğu tələnin qarşısını almışdır. Mümkündür ki, irticaçılar “Yeni Həyat” vasitəsilə Prezident ailəsinə növbəti tələ qurmaq fikrinə düşsünlər. Nədən ki, Ali Məhkəmənin bu gün verəcəyi qərar həm yerli, həm də beynəlxalq istimai rəydə Prezident İlham Əliyevin islahat vədinin sınağı kimi qəbul oluna bilər.
Vətəndaş Sübhan Zayıdov bu versiyanın həqiqəti nə dərəcədə əks etdirdiyi barədə hər hansı fikir söyləmək istəmir. Çünki bu barədə dəqiq informasiyaya malik deyil və konkret dəlillərə söykənməyən mülahizələrlə kiminsə fəaliyyətinə kölgə salmaq doğru olmaz. O, sadəcə öz mülkiyyəti uğrunda mübarizə aparır və məsələnin ölkə daxilində həll edilməsində maraqlıdır. Əvvəl-axır öz şikayətinin ölkə başçısına çatdıra biləcəyini və Prezident İlham Əliyevin hadisələrə müdaxilə edib haqqın, ədalətin bərpa olmasına çalışacağına ümidlidir. İş adamı bu məqsədlə ölkə başçısına və I Vitse-prezidentə məktublar yazıb və həmin məktubların ünvanına çatdığına əmindir. Sadəcə Azərbaycan qanunvericiliyində məktublara cavab ən tez 15 günə cavab verilir və bu müddət ərzində irəli sürülən iddiaların doğruluğu araşdırılır. Sübhan Zayıdov da ölkə rəhbərlərinə yazdığı məktubların hazırda araşdırma mərhələsində olduğuna inanır.
İş adamı onu da bildirdi ki, “Yeni Həyat”ın rəhbəri Babək Babayev məhkəmələrin bu qərarı qəbul etməsində Ədliyyə naziri Fikrət Məmmədova yaxın adamların və hüquq şirkətlərinin adını hallandırırmış: “Guya, onların vasitəçiliyi ilə məhkəmə orqanları bu qərarı qəbul ediblər. Həmin şəxslər isə yaxın dostlarımla söhbətlərində bu faktı inkar etdilər. Açığı, Ədliyyə naziri Fikrət Məmmədovun bu işdə əl olması inandırıcı da deyil. Hamı bilir ki, Fikrət Məmmədov ədalətli şəxsiyyət, vicdanlı dövlət xadimidir. Məhz onun sayəsində Azərbaycan hüquq sistemi az-çox adını qoruya bilib. Yəqin, elə bu səbəbdən də son prezident seçkilərindən sonra qurulan islahatçı hökumət komandasına onun adı salındı. Amma görünür, keçmiş sovetlərdən qalma hüquq sisteminə irticaçı qüvvələr o qədər dərin kök salıblar ki, islahatçı nazirlər də onlarla bacara bilmirlər. Ədalətsiz hakimlər öz qanunsuz fəaliyyətlərini Fikrət Məmmədovun şəxsi nüfuzunun arxasında gizlənərək həyata keçirirlər. İnanıram ki, Prezident ailəsinin də adından bu cür istifadə olunur. Ölkə rəhbərliyinin bu təxribata layiqli cavab verəcəyinə əminəm”.
“Hürriyyət”
