İMİŞLİNİN İCRA BAŞÇISINDAN "CANIYANANLIQ"
3-08-2012, 12:07
"VİLYAM HACIYEVƏ XAHİŞƏ GETDİM, MƏNƏ İKİ ŞAM AĞACI GÖNDƏRDİ"
2010-cu ilin Kür və Araz daşqınlarından evi yararsız hala düşən İmişli rayonunun Rəsullu kənd sakini İndirə Ağayeva redaksiyamıza müraciət edib. Ötən gün redaksiyamızda olan İ.Ağayeva bildirdi ki, 2 ildir evinin yenidən tikiləcəyini gözləyir. Elə bu gözləməklə də o, 9 nəfərdən ibarət ailə üzvü ilə birgə iki ildir kənd yaxınlığındakı fermaya sığınıb. Şikayətçi deyir ki, Fövqəladə Hallar Nazirliyinin sahə komissiyası evlə bağlı akt tərtib edib. Sənəddə evin yaşayış üçün yararsız olduğu göstərilsə də, nədənsə, ev tikintisi ilə bağlı addım atılmadı.
"Fermada yaşayırıq"
İ.Ağayeva deyir ki, evləri uçub-dağılıb, özü isə Bakı ilə İmişli arasında yollarda qalıb, şikayətinə baxan yoxdur. İ.Ağayeva qəzalı vəziyyətdə olan evi ilə bağlı Şəhidlər Xiyabanını ziyarətə gələn dövlət başçısı ilə görüşməyə cəhd edib. Dediyinə görə, mühafizəçilər onu dərhal ərazidən uzaqlaşdırıblar, ancaq şikayət ərizəsini götürüblər: "Ötən ilin may ayında Şəhidlər Xiyabanında cənab Prezident İlham Əliyevlə görüşməyimə imkan verməsələr də, şikayət ərizəmi mühafizəçilər aldılar. Bir müddətdən sonra məni İmişli rayon İcra Hakimiyyətinə çağırdılar. Dedilər ki, bizdən dövlət başçısına şikayət ərizəsi yazmısan, bu nə məsələdir? Dedim, nə olacaq, daşqından kənddə ən çox zərərçəkənlərdən biri bizim ailədir, amma bir ev nədi, onu tikib bizə vermirsiniz ki, adam kimi yaşayaq. Evdir, uçub, yazıblar ki, bərpa olunsun. Uçan ev necə bərpa oluna bilər? Başa düşə bilmirəm. Dedilər, komissiya gələndə evimi yenidən göstərəcəklər. Ancaq komissiyanı da gətirmədilər, özüm komissiyanı məcbur şəkildə gətirib evimi göstərdim. Komissiyanın üzvləri evimi görəndə dəhşətə gəldilər ki, yazıq camaat, gör nə gündə yaşayır?! Dedilər ki, sizə mütləq ev tikiləcək".
"Ev tikilməsi qərarı təmir qərarı ilə əvəzləndi"
Ancaq il yarım komissiyadan səs-soraq çıxmadığını deyən İ.Ağayevanın sözlərinə görə, Fövqəladə Hallar Nazirliyinə dəfələrlə müraciət etdikdən sonra ev tikilməsi qərarı təmir qərarı ilə əvəzlənib. "Bundan sonra müraciətlərimə gələn cavab məktublarında daşqınla əlaqədar baş vermiş fəlakət nəticəsində rayon ərazisində ziyan çəkmiş evlərə Fövqəladə Hallar Nazirliyinin sahə komissiyaları tərəfindən baxış keçirildiyi və müvafiq aktlar tərtib edildiyi qeyd edilirdi. Guya ki, həmin aktlara əsasən, mənim evim təmirə ehtiyacı olan evlər siyahısına daxil edilib. Bununla əlaqədar həyətyanı sahəmizə və ev əşyalarımıza dəymiş ziyana görə bizə 1600 manat maddi yardım göstərildi. Etiraz edəndə, icra nümayəndəsi Fəxrəddin Əhmədov dedi ki, bu kifayətdir, apar xərclə. Fikirləşdik ki, axı bu pulla necə ev tikək? Qərara gəldik ki, dövlətin pulunu boş yerə xərcləməyək, gedib həmin pula bir inək aldıq. Əgər evim tikilməsə, inəyi satıb pulu Fövqəladə Hallar Nazirliyinin özünə qaytaracağam. Çünki vacib problemin həllinə kömək etməyən o pul bizə gərək deyil".
"Gecələr uşaqlarımın ağzına, burnuna qarışqa girir"
İ.Ağayevanın sözlərinə görə, daşqınlardan zərərçəkənlərə qoyulan ayrı-seçkiliklə də bağlı aidiyyəti qurumlara müraciət edib: "Necə ola bilir ki, bizim evimiz qəzalı vəziyyətdədir, bizə ev tikilmir, amma ehtiyacı olmayana evlər tikilib. Heç kəs maraqlınmır ki, necə yaşayırıq. Fermada gecələr caqqalların səsindən qorxan uşaqlarım sarılıq xəstəliyinə tutulmuşdu. Dəfələrlə malyariya xəstəliyinə düçar olmuşuq. Uşaqlar fermada yata bilmədikləri üçün bir hissəmiz kənddəki həyətimizdə yaşamağa məcbur olmuşuq. Uçuq evin üstünə cadır çəkib orada qalırıq. Gecələr uşaqlar torpağın üstündə yatır. Ona görə də uşaqların ağzına, burnuna qarışqa girir. İşıq da yoxdur ki, uşaqları gecələr cücülərdən qoruyum".
"Get, elektrik dirəyi al, montyor gəlib işığı çəksin"
İ.Ağayeva işıqla bağlı probleminin həlli üçün İmişli rayon İcra Hakimiyyətinin başçısı Vilyam Hacıyevdən, işıq idarəsinin rəhbərliyindən xahiş etsə də, cavabları bu olub: "Get, elektrik dirəyi al, montyor gəlib işığı çəksin. Mən də qayıtdım ki, dirək almağa imkanım olsaydı, daha ferma da niyə qalırdıq?! Elə özümüzə bir gün ağlayardıq. Təzədən icra başçısı Vilyam Hacıyevə xahişə getdim, o da mənə iki dənə şam ağacı göndərdi. Onlar da qalıb yerdə, gəlib işıq xəttini bağlayan yoxdur".
İ.Ağayeva xahiş edir ki, onun üzləşdiyi problemi aidiyyəti qurumların diqqətinə çatdıraq, bəlkə bundan sonra onlar üçün evin tikiləcəyi ilə bağlı qərar verilə. \ Təzadlar \
Geri qayıt