KƏRƏM HƏSƏNOV HAKİMİYYƏTƏ QARŞI
22-07-2012, 13:22
KOMİTƏ SƏDRİNİN SAYƏSİNDƏ “NARAZILAR ORDUSU” YARANIB
Ölkə mediasında Əmlak Məsələləri Dövlət Komitəsinin (ƏMDK) sədri Kərəm Həsənovun özbaşınalıqlarında barədə kifayət qədər yazılıb. Ancaq bunlara baxmayaraq komitə sədrinin özfəaliyyətinə və ciddi qanun pozuntularına hakimiyyət göz yumaqqdadır. Buna səbəb isə bir vaxtlar keçmiş iqtisadi inkişaf naziri Fərhad Əliyevə qarşı təşkil olunan kampaniya zamanı xüsusi fəallıq nümayiş etdirən indiki Əmlak Məsələləri üzrə Dövlət Komitəsinin sədri Kərəm Həsənov bu yolla hakim düşərgənin etmadını qazanması olub. Əslində Fərhad Əliyevin kölgəsi altında çiçək açan Kərəm Həsənov keçmiş nazirin ilk ayaq büdrəməsindəcə ona qarşı getməklə, bugünkü mövqe genişlənməsinin təməlini atıb. Hazırda bu gün iqtisadi imkanlarına görə kifayət qədər samballı mövqe sahibi olan komitə sədri hətta siyasi proseslərə də müdaxilə imkanına malikdir.
“AzeriNews.org”-a bu günlərdə daxil olan məlumatlarda bildirilir ki, komitə sədri məcburi köçkün düşərgəsində məskunlaşan insanlardan geninə-boluna faydalanır. Mənbənin sözlərinə görə, son bir neçə ildir ki, ölkə ərazisindəki məcburi köçkün düşərgələrində məskunlaşan insanlara yaşadıqları ərazidə hər hansı inşaat işi apramaq qadağan edilib ki, bu qadağanın da müəllifi Kərəm Həsənovdur: “Komitə yetkililəri bildirir ki, məcburi köçkünlər məskunlaşdıqları ərazilərdə hər hansı tikinti işi apara, ev, yardımçı təsərrüfat və s. inşa edə bilməzlər. Məcburi köçkünlərə hətta hasar çəkməyi belə qadağan edən ƏMDK sədri bunu həmin ərazilərin onların sərəncamında olması ilə izah edir. Komitə yetkililəri bildirirlər ki, məcburi köçkünlərin bu ərazidə müvəqqəyi yaşamaq hüququ olsa da, tikmək, qurmaq-yaratmaq hüququ yoxdur”.
“AzeriNews.org”-a mənbənin bildirdiklərinə görə, ƏMDK məcburi köçkünlər tərəfindən inşa edilən təsərrüfat obyektlərinin sonradan onlar üçün əlavə problem yaradacağını iddia edərək, güc orqanlarının vasitəsilə bunun qarşısını alır: “Komitə və onun rayonlardakı şöbələrinə qaçqın düşərgələrindəki tikinti prosesi ilə bağlı hər hansı bir məlumat daxil olan kimi, dərhal komitə əməkdaşları əraziyə baxış keçirir, həmin tikilinin sökülməsini həyata keçirirlər. Çox zaman vətəndaşlarla ciddi qarşıdurma şəraitində keçən söküntü prosesində polisdən dəstək alan komitə əməkdaşları, bununla da məcburi köçkünləri öz məişət şəraitlərini yaxşılaşdırmağa imkan vermir”.
Əmlak Məsələləri Dövlət Komitəsinin məcburi köçkünlərə qarşı tutduğu sərt və barışmaz münasibətin məcburi köçkünlər tərəfindən ciddi narazılıqla qarşılandığını bildirən mənbə, sözügedən narazılığın bu gün də davam etdiyini söylədi: “Uzun illərdir ki, məcburi köçkünlərin onlara qoyulan qadağa ilə bağlı narazılığı davam edir. Əmlak Məsələləri Dövlət Komitəsinin vətəndaşlar üzərindəki əmirliyi səbəbilə bu gün də öz məişət şəraitlərini yaxşılaşdırmaqda çətinlik çəkən məcburi köçkünlər problemlə bağlı bir sıra yuxarı instansiyalara müraciət ünvanlasa da, onların müraciətinə əhəmiyyət verən olmayıb. Buna görə də inşa etdikləri istənilən tikilinin Kərəm Həsənovun qoçuları tərəfindən uçurulmasından əziyyət çəkən köçkünlərin əksəriyyəti ya öz niyyətlərindən əl çəkir, ya da məsələni komitə əməkdaşlarının diqtə etdiyi şəkildə həll etməyə məcbur olurlar”.
Mənbə köçkünlər üzərində ciddi nəzarət qoyan Əmlak Komitəsi insanların təməl tələbatlarını təmin edən obyektlərin inşasına belə imkan vermir: “Məcburi köçkün düşərgələrinə həbsxana gözü ilə baxan və orada məskunlaşan vətəndaşlar üzərində ciddi nəzarət qoyan Əmlak Məsələləri Dövlət Komitəsi insanlara zəruri məişət obyektlərinin belə inşasına imkan vermir. Bircə onu demək kifayətdir ki, vətəndaşların hamam və ayaqyolu tikmək cəhdlərinin qarşısı belə kobud bir şəkildə alınır, insanlara əlavə çözüm yolu göstərilmədən onların fəaliyyəti inzibati üsullarla əngəllənir”.
Əmlak Məsələləri Dövlət Komitəsinin məcburi köçkün düşərgələrindəki ağalığının yeni evlənən gənclər üçün ikiqat problem yaratdığını vurğulayan mənbə, bu ailələrin mənzil hüququndan məhrum edildiyini bildirdi: “Məlumdur ki, yeni ailə quran bütün cütlüklərin hər şeydən öncə mənzilə, kiçik də olsa bir sığınacağa ehtiyacı var. Çünki bunsuz həmin ailələrin rahatlığını təmin etmək mümkün deyil. Lakin Əmlak Məsələləri Dövlət Komitəsi gənc ailələri bu imkandan da məhrum edib. Komitə yetkililəri iddia edir ki, hətta yeni ailə quran şəxsləri mənzillə təmin etmək məqsədilə belə xırda bir otaq tikmək olmaz. Çünki bu, “qanunu pozmaq deməkdir”. Buna görə də, bəzən bünövrə işləri yenicə başlayarkən, bəzən isə hətta tikinti materialları əraziyə boşaldılan zaman özünü hadisə yerinə çatdıran komitə yetkililəri məsələyə müdaxilə edərək gənc ailələrin mənzillə təminatı yolunda başlıca əngələ çevrilirlər. Məhz bu səbbədən də bu gün məcburi köçkün düşərgələrində məskunlaşan gənc ailələrin çoxu öz valideynləri ilə eyni mənzilə sığınmağa məcburdur”.
“AzeriNews.org”-a mənbənin söylədiklərinə görə, Əmlak Məsələləri Dövlət Komitəsinin əməkdaşlarının bu cür müdaxilələrindən sığortalanmağın yalnız bir tək yolu var ki, bu da puldur: “Əmlak Komitəsi tərəfindən yaradılan süni əngəllərin öhdəsindən gəlmək, problemin həllində əlavə əngəllərlə üzləşməmək üçün Azərbaycan reallığında ən effektiv təsir mexanizmi olan pul amilindən istifadə etmək lazım gəlir. Məsələn, əgər siz bir işə başlamazdan öncə dərhal özünü çatdıracaq komitə yetkililərinə “hörmət” etməyə tədarük görmüsünüzsə, onda qətiyyətlə işə başlaya bilərsiniz. Lakin onu da bilməlisiniz ki, bu “hörmət” kifayət qədər sanballı rəqəmdən ibarət olmalıdır. Əks təqdirdə, min bir zəhmətlə qazandığınız pullar hesabına alınan tikinti materialları söküntü qalağına çevriləcək, əsəblərinizlə birlikdə pulunuzu da itirəcəksiniz. Buna görə də, Komitə əməkdaşlarının gəlişinə Kərəm Həsənova layiq bir şəkildə ciddi hazırlaşmalı, öz ehtiyatınızı əldən verməməlisiniz. Belə olarsa, əmin ola bilərsiniz ki, bünövrəsini qoyduğunuz obyektin tikilib başa çatmasını görmək sizə qismət olacaqdır”.
Əmlak Məsələləri Dövlət Komitəsinin məcburi köçkünlərə məlum yanaşma tərzinin maddi-sosial problemlər məngənəsində sıxılan insanların daxili gərginliyini daha da artırıb. Hətta mənbə, proseslər bu şəkildə cərəyan edəcəyi təqdirdə sosial partlayışın qaçılmaz olacağını söylədi: “Əmlak Məsələləri Dövlət Komitəsinin müdaxilə və təzyiqə məruz qoyduğu məcburi köçkün ailələrinin böyük əksəriyyəti ciddi yoxsulluq içərisində yaşayır. Ağır həyat şəraiti bu insanların əsəb sisteminə, ruhi-mənəvi əhval-ruhiyyəsinə də mənfi mənada təsir göstərir. Bu mənada Dövlət Əmlak Komitəsinin yürütdüyü məlum siyasətin bütün ölkədə ciddi əks-səda doğuracaq sosial partlayışa səbəb olacağı və ya belə bir partlayışı tətikləyəcəyi inkarolunmazdır”.
Mənbənin sözlərinə görə, belə bir partlayış sadəcə Əmlak Məsələləri Dövlət Komitəsini deyil, bütün hakimiyyəti hədəf alacaq: “Sözsüz ki, son həddə çatan gərginliyin açıq qəzəb və aqressiya halında kütləvi surətdə ortaya çıxması yalnız Əmlak Məsələləri Dövlət Komitəsinə yönəlik ittiham və tələblərlə məhdudlaşmayacaq. Xalq etirazları başda ölkə başçısı da olmaqla bütün hakimiyyəti hədəf alacaqdır. Bunun isə hansı nəticələr doğuracağını təxmini də olsa təsəvvür etmək mümkündür. Görünür Kərəm Həsənov artıq Suriya faktorundan sonra proseslərin Azərbaycana keçəcəyini güman edərək özünü sığortalamaq qərarına gəlib. Elə bu baxımdan da qaçqın və məcburi köçkünlərin ayağa qalxacağına zəmin yaradır. Çünki inqilabın baş verməsinə ilkin səbəb, hal hazırda qaçqın və məcburi köçkünlərin hakimiyyətə qarşı etiraz səslərinin ucaltmasıdır”.
Geri qayıt