“HƏR İKİSİ MƏNİM ÖVLADIMDIR”
16-07-2012, 15:31
“HƏR İKİSİNİN MƏSULİYYƏTİ, ÇƏKİSİ EYNİDİR”
Həyat bir musiqidir. İnsan dünyaya ağlayaraq göz açır. Lay-lay ilə böyüyür. Sonra hərə öz taleyinə yazılmış fərqli ritmli melodiyaları ifa etməli olur. Kimisi ritmik, dinamik həyat sürür, kiminin həyatı hərbi marş dəqiqliyi ilə ölçülüb biçilir, kimi keşməkeşli ömür yolunu improvizasiyalarla dolu olan caz notları ilə davam etdirir, bir başqaları isə minor və ya major əhval-ruhiyə ilə yaşayır. Sonda bu musiqi hər kəsi ağladır.
Çox şükür ki, insan ömrü yeknəsəq deyil, onun müxtəlif mərhələlərində fərqli musiqilər səslənir. Məhz buna görə də biz insanlar həyatdan zövq almaqda davam edirik.
Bugünkü qonağım musiqiləri və şeirləri ilə bizlərə zövq verən Xanım İsmayılqızıdır.
- Xanım İsmayılqızının təqdimata ehtiyacı varmı?
- Bəli, təqdimata ehtiyac var. Şairə-bəstəkar Xanım İsmayılqızı.
- Necə oldu ki, birdən-birə bu cür tanınmağa başladınız?
- Yəqin ki, şansım gətirdi. Amma bu, birdən-birə olmadı. Tanınana qədər uzun bir yol var idi və mən o yolun çətinliyini dada-dada, keçə-keçə çox çətinliklərdən sonra dinləyicilərim və tamaşaçılarımla görüşə bildim. Təbii ki, mahnılarım və şeirlərimlə. Kənardan bu, bəlkə də birdən-birə kimi görünə bilər.
- Bəstəkarlıqda son zamanlar peşəkarlıq və qeyri-peşəkarlıq söhbəti gedir. Siz necə, bunun fərqinə varırsınızmı?
- Mən bu suala çox cavab vermişəm. Təkrarçılıq olsa da, bir də deyəcəyəm: “Mənim üçün mahnı faktoru var. Mahnı, şeir keyfiyyətlidirsə, səviyyəlidirsə, məzmunludursa, mənalıdırsa, kimin yazdığının fərqinə varmıram. İstər peşəkar olsun, istərsə də qeyri-peşəkar, əsas məsələ odur ki, zövqlərə xələl gətirəcək mahnılar yazılmasın. Ümumiyyətlə, bu həyatda hər bir şeyin öz məsuliyyəti var. Özünün, sözünün, əməllərinin, həyatının, yaradanların və yaratdıqlarının məsuliyyətini anlayan insan məsuliyyətsiz ola bilməz. O ki qaldı mənim yaradıcılığıma, həm şeirlərimin, həm də mahnılarımın altında mənim imzam yazılır, hər ikisi mənim övladımdır. Odur ki, hər ikisinin məsuliyyəti, çəkisi eynidir.
- Neçə ildir bu sənətdəsiniz?
- Artıq 20 ildir ki, mahnılarım səslənir və sevilir. Amma 26 ildir yazıram.
- Hansı müğənnilərlə çalışırsınız?
- Adlarını sadalasam, çox böyük bir siyahı alınar. Odur ki, qısaca deyim ki, sənət aləminin 80 faizi ilə işləmişəm və işləyirəm.
- Hansı müğənnilərlə çalışmaq sizə rahatdır?
- Ümumiyyətlə, yaradıcılıqda rahat alınan heç bir şey olmur. Əslində elə yazdıqlarım çətinliklərdən doğub və onların araya-ərsəyə gəlməsi də asanlıqla başa gəlməyib.
- Həyatdan küsdüyünüz anlar olubmu?
- Həyatdan küsdüyüm anlar da olub, bezdiyim anlar da olub, təbii ki.
- Neçə-neçə nəğmələrin müəllifi olan Xanım müəllimə hansı nəğməsini ürəyinin nəğməsi adlandırır?
- Hamısını. Mahnılarımın, şeirlərimin hər biri mənim həyatımın hansısa dönəmində yaşadığım kədərin, sevincin qığılcımlarıdır. O qığılcımlar da mənim ürəyimdən qopur.
- İndi hansı nəğmənizi bizə zümzümə etmək istərdiniz?
- Hal-hazırda heç birini. Çünki zümzümə etmək əhvalında deyiləm.
- Ailənizdə sizin yaradıcılığınızı dəstəkləyirlərmi?
- Ümumiyyətlə, yaradıcı insan və ailə – bu, çox çətindir. Ailənin öz ağırlıqları, çətinlikləri var. Yaradıcılığın da həmçinin. Dəstəkləmək deyəndə ki, mənə yaradıcılığımda indiyə qədər mane olmayıblarsa, bu elə dəstəkləmək deməkdir.
- Bir çox həmkarınız şəxsi həyatını qabartmağı sevmir. Sizin necə, bu tip suallara qarşı kompleksiniz var?
- Bir həyatın ki adı şəxsi həyatdır, o, niyə qabardılmalı, gündəmə gəlməlidir? Bu mövqedə olanlara hörmətim xüsusidir.
- Ailədə yolunuzu davam etdirən oldumu?
- Xeyr, ailədə bu sahənin adamı yoxdur. Övladlarım musiqi təhsili alıb, amma onlar başqa peşənin sahibidirlər.
- Bugünkü ünsiyyətimizdən necə, razı qaldınızmı?
- Baxmayaraq ki, mən sənətə gələndən bu günə kimi dönə-dönə eyni suallara cavab verirəm, razı qalmamağa səbəb yoxdur. Anlayıram ki, yeni gənc nəsil gəlir və sizlər bizi yenidən onlara təqdim edirsiniz. Buna, bu müsahibəyə gənc nəsillə yenidən tanışlıq kimi qiymət verirəm. Bu tanışlığa görə sizə minnətdaram.
Geri qayıt