“Я ДРУГ, ТЫ ДРУГ, МЫ КР�?М�?НАЛЬНЫЙ КРУГ”
1-07-2012, 16:42
YENİ BİR MEYXANA RUSİYANI FƏTH ETMƏYƏ BAŞLADI
Son zamanlar musiqili meyxana janrının populyarlığı sürətlə artmaqdadır. Hətta rus dilində səslənən ifalar ölkə sərhədini aşaraq, rusdilli auditoriya arasında sevilməyə başlayıb. Maraqlıdır ki, meyxanaların mətnləri və onların səslənməsi qüsurlu olsa da, bu parçalar səmimiliyi və incə yumoru ilə qəlbləri fəth etməyi bacarıb. Əvvəlcə “ Ты кто такой, давай до свидания (Sən kimsən ki, haydı, görüşənədək)” adlı musiqili meyxana populyarlıq qazandı. Meyxananın sözləri ildırım sürəti ilə bütün Rusiyaya, onun ardınca MDB respublikalarına yayıldı. Hətta siyasətçilər arasında və səhnə ulduzları arasında qalmaqal mövzusuna çevrildi.
İndi isə “Я друг, ты друг, мы криминальный круг (Mən dost, sən dost, biz kriminal əhatəyik)” adlı musiqili meyxana Rusiyanın prodüser mərkəzlərinin diqqətini cəlb etməyə başlayıb.
Meyxananın söz müəllifi Asiman Sovqatovun oxumeni.az-a verdiyi məlumata görə, Rusiyanın aparıcı kanallarından biri çoxseriyalı bədii filmdə həmin parçanı saundtrek kimi istifadə etməyə çalışır. Hətta buna görə müəllifə pul da təklif olunub. Film Moskva şəhərində etnik münasibətlərdən bəhs edəcək və Rusiyanın aparıcı kanallarının birində nümayiş etdiriləcək. Hələlik filmi çəkəcək prodüser mərkəzinin və nümayiş etdiriləcək kanalın adı məxfi saxlanılır.
Asiman Sovqatov onu da bildirdi ki, “Я друг, ты друг, мы криминальный круг (Mən dost, sən dost, biz kriminal əhatəyik)” adlı musiqili meyxananın araya-ərsəyə gəlməsində onunla yanaşı Elnur Məxfi və Mahir Aybrat adlı dostları da yaxından iştirak ediblər. Daha doğrusu, meyxananın 3 müəllifi var: “Biz bu meyxananı internetə yerləşdirdikdə, ağlımıza belə gəlməzdi ki, onu dünyanın müxtəlif ölkələrində 500 minə yaxın insan izləyəcək. Nəticələr bizim üçün gözlənilməz oldu. İndi isə həmin meyxanadan bir fraqmenti serialda səsləndirmək istəyirlər, özü də Rusiyanın mərkəzi televiziya kanallarının birində. Bu, nəinki bizim, bütün meyxanasevərlərin uğurudur. 2003-cü ildən bəri Azərbaycana getməmişəm. İstəyirəm ki, vətənimə uğurla dönüm”.
Xatırladaq ki, adıçəkilən meyxananın söz müəllifi Asiman Şahəddin oğlu Sovqatov əslən lənkəranlıdır. 16 ildən çoxdur Rusiyanın Kazan şəhərində yaşayır. Kazan Dövlət Universitetinin Hüquq fakültəsinin tələbəsidir.
Meyxana Azərbaycan xalqının folklordur. Folklor ona görə yaşayır və sevilir ki, səmimi olur və heç bir sənət çərçivəsinə, sərhədlərə sığmır...
Geri qayıt