HAKİMİYYƏT DAHA BİR QARDAŞ CÜTLÜYÜ YOLA SALIR
13-06-2012, 13:26
ONLARI RAFİQ VƏ FƏRHAD ƏLİYEVLƏRİN MÜDHİŞ AQİBƏTİ GÖZLƏMƏSƏ DƏ…
DİA.AZ: - Bir neçə gün əvvəl məlumat verərək bildirmişdik ki, hakimiyyət icra başçıları ilə bağlı islahatlarını bundan sonra da davam etdirmək niyyətindədir. Bu barədə danışan mənbənin sözlərinə görə, yaxın günlərdə daha bir rayonda dəyişiklik gözlənilir:
«Hələlik bir neçə rayonunun rəhbəri ilə bağlı plan var. Xaçmazın icra başçısı Şəmsəddin Xanbabayev Bakıya - Xətai rayonuna Razim Məmmədovun yerinə təyin ediləcək. Razim Məmmədov isə görəvindən birdəfəlik olaraq alınacaq. Bildirim ki, bu plan çoxdandır cızılsa da, bir sıra müdaxilələr hələlik sözügedən yerdəyişmənin təxirə salınmasına nədən olur».
Amma mənbəmiz barəsində konkret qərarın verildiyini bildirdiyi Tovuz rayon icra hakimiyyətinin başçısı Tofiq Zeynalovun taleyinin daha da qaranlıq olacağını da söylədi. Bildirək ki, Tofiq Zeynalov Respublika Dövlət Yol Polisi İdarəsinin rəisi Ramiz Zeynalovun doğmaca qardaşıdır. O, 2007-ci ildə əvəlki icra başçısı Həmid Bağırovun yerinə Tovuz Rayon İcra Hakimiyyətinin başçısı vəzifəsinə təyin edilib.
Bildirək ki, Tofiq Məhəmmədəli oğlu Zeynalov 1944-cü ildə doğulub. Əbdürrəhman Vəzirovun və Ayaz Mütəllibovun respublikaya rəhbərlik etdiyi dövrdə Tovuz Rayon Partiya Komitəsinin 1-ci katibi işləyib. İxtisasca mühəndisdir. 2005-ci ilin parlament seçkilərinədək Tovuz Ərazi Kənd Təsərrüfatı İdarəsinin rəisi olub. Parlament seçkilərində 105 saylı Tovuz seçki dairəsindən fərdi qaydada namizədliyini irəli sürüb və 2.71 faiz səslə üçüncü yeri tutub. Yeni Azərbaycan Partiyasının üzvüdür.
Mənbəmizin məlumatlarına görə, baş DYP-çinin qardaşı olmasına baxmayaraq Tofiq Zeynalova qarşı bir sıra ittihamlar da səslənə bilər: «Ona qarşı konkret faktlar var ki, hazırda müvafiq dövlət qurumları tərəfindən araşdırılır. Söhbət rayonun abadlıq işlərinə ayrılan vəsaitin təyinatı üzərə xərclənməməsindən və təxminən 1 milyon manat pulun ortadan yox olmasından gedir».
Mənbəmiz onu da bildirdi ki, hələlik qardaşının gücünə Tofiq Zeynalov toxunulmaz olsa da, onun qələminin artıq qırılması səbəbindən yaxın günlərdə müvafiq dəyişiklik baş verə bilər. Rayona icra başçısı postuna isə tanınmış simalardan birinin yaxın qohumunun təyin ediləcəyi gözlənilir.
Bu barədə DİA.AZ redaksiyasına daxilolan son məlumatlardan aydın olur ki, bu həftənin cümə günü Tofiq Zeynalov vəzifəsindən azad ediləcək. Onun yerinə isə hazırda Prezident Administrasiyasında vəzifə tutan bir şəxsin təyin olunacağı gözlənilir: «Həmin şəxs də rayon kuratorudur və həqiqətən də yüksəkçinli məmurlardan birinin qohumudur».
Mənbəmizin bildirdiklərindən belə aydın olur ki, Tofiq Zeynalovla yanaşı, qardaşının da «vurulması» yönündə işə başlanılıb. Xatırladaq ki, bir neçə gün əvvəl məlumat verərək bildirmişdik ki, polis sistemində islahatlar nəzərdə tutulub və eyni zamanda DYP-də də cərəyan edəcək kadr islahatları zamanı bir neçə məmurun görəvdən alınması və yaxud da yaş senzi ilə əlaqədar istefaya göndərilməsi planlaşdırılır. Xəbərdə onu da vurğulamışdıq ki, amma islahatlar zamanı Ramiz Zeynalov toxunulmazlığını qoruya biləcək.
Məlumatlı mənbənin son bilgisinə görə, Zeynalovlarla bağlı plan dəyişib. Doğrudur, onları hazırda həbsdə saxlanılan Rafiq və Fərhad Əliyev qardaşlarının aqibəti gözləməsə də, onlar da Əli və Nazim Nağıyev qardaşları kimi hakim düşərgədən qovulacaqlar.
Bildirək ki, hakimiyyətdə zaman-zaman məşhur qardaş cütlüklər gəlib-gedib. Onlardan hazırda mövqelərini qoruyanlar da var. Məsələn, son zamanlar əmlak Məsələləri üzrə Dövlət Komitəsinin sədri Kərəm Həsənovla onun deputat qardaşı Malik Həsənov daha qabarıq şəkildə diqqətə gəlir. Bundan əlavə, nəqliyyat naziri Ziya Məmmədovun qardaşı da deputat Elton Məmmədov da kifayət qədər tanınan fiqurdur.
Amma parlamentdə mövqeyini qoruyan Adil Əliyevdən fərqli olaraq qardaşı - Bakı şəhər Baş Polis İdarəsinin sabiq rəisi Məhərrəm əliyev iqtidar düşərgəsindən çıxdaş edildi.
İndi isə daha bir qardaşların yola salınma ərəfəsindəyik.
Geri qayıt