ELMAR VƏLİYEV GƏNCƏNİ AĞLAR GÜNƏ QOYUB
25-04-2012, 15:09
İCRA BAŞÇISININ VURDUĞU MİLYONLARLA ZİYAN
Helsinki Vətəndaş Assambleyası Azərbaycan Milli Komitəsi Qərb bölgə nümayəndəliyinin rəhbəri Aslan Vəliyev redaksiyamıza başına gətirilən oyundan, İcra Hakimiyyətlətinin laqeydsizliyindən, Polis İdarələrinin öz vəzifələrini yerinə yetirməməsindən, dövlət və şəxsi vəsait hesabına salınan meşə zolağının başına gətirilən oyunlara göz yumulmasından fəryad edən şikayət məktubu ünvanlayıb.
Məktubu oxusanız, təkcə bu günümüz üçün deyil, gələcək nəsillər üçün əkilmiş 30 min ağac, 1200 kq palıd qozası göz görə-görə necə məhv edilir.
“Gəncə şəhəri Hacıkənd qəsəbəsində məskunlaşmış 514 məcburi köçkün ailələrindən Kəlbəcər rayonundan olan bir qrupunun son zamanlar qəsəbə ətrafında yerləşən meşə fondu torpaqlarına daha da aqressiv münasibət bəsləmələri müşahidə edilirdi. Xatırladırıq ki, bəzi məcburi köçkün ailələri tərəfindən xarabalığa çevrilmiş meşə ərazilərində meşə bərpa işlərinin həyata keçirilməsi üçün 8 aydan artıqdır ki, davamlı olaraq işlər görülürdü. Ərazinin 4 tərəfi çəpərlənərək əraziyə 30.000 ağac əkilmiş və 1200 kq palıd qozası səpilmişdir.
Nədənsə qeyd olunan əməliyyatlar 8 ay dövründə həyata keçirilərkən buna heç kəs tərəfindən heç bir etiraz edilməmişdir. Əksinə olaraq indi barələrində qeyd edəcəyimiz şəxslərin bəziləri bu işlərə könüllü olaraq yardım etmişdirlər. Lakin Qaçqınkomun fəaliyyətsizliyinin nəticəsində xarabalıqlara çevrilmiş ərazilərdə “dövlət maraqlarına vurulmuş zərərin əvəzinin ödənilməsi” başlıqlı iddia ərizəsi ilə Qaçqınkomu məhkəməyə verdikdən dərhal sonra, yəni, məhkəmə prosesi başlandıqdan sonra (27 mart 2012-ci il) mənim də iştirakım ilə 8 ay ərzində görülən işlərə, həmin ailələr tərəfindən təlimata uyğun aqressiv münasibətlərin göstərilməsi müşahidə olunmağa başladı. Hətdda onlar aşkar şəkildə hədələyici hərəkətlərdən çəkinməməklə, çəkilən zəhmətin faydasız olacağını diqqətimizə çatdırırdılar.
Qeyd etydiklərimiz narahatçılıq doğurduğundan rəsmi olaraq Gəncə, Kəlbəcər və Göygöl rayon (şəh.) İcra Hakimiyyətlərinin başçılarına, həmçinin adları sıralanan şəhər və rayonların Polis Şöbələrinin rəislərinə bu haqda rəsmi məktublarla müraciət edərək gözlənilən dağıntının qarşısının alınmasını və hədələmə əməliyyatının başında duranlardan birinin adını qeyd etməklə, baş verə biləcək qanunsuz hərəkətlərin önlənməsini xahiş etmişdik.
Lakin, məktublarımız ünvanlarına daxil olduqdan dərhal sonra, yəni, ertəsi günü ehtiyyatlandığımız insident baş vermiş, yəni çəpərlərimiz məsuliyyətsizcəsinə dağıdılaraq, ərazidə əkilmiş ağaclar köklərindən çıxarılmış, mal qaralar əraziyə buraxılmaqla, yeni cücərmiş palıd qozaları mal-qaraya yem edilmişdir.
Bundan sonra həmin şəxsləri qanunsuz hərəkətlərdən çəkindirmək üçün Kəlbəcər rayon İH başçısı ilə, həmçinin həmin rayonun Polis Şöbəsinin rəisi və onun müavinləri ilə görüşərək məsələnin nizama salınması onlardan xahiş edilmişdir. Hər dəfə istər İH-nin başçısı istərsə də Polis nəfərləri qanunsuzluqlar törətmiş şəxsləri sözdə qınayaraq, məsələni qaydaya qoyacaqlarını bizə bildirirdilər. Lakin hadisələrin sonunda bəlli oldu ki, bütün bunlar sadəcə olaraq sözmüş.
Buna baxmayaraq, problemin həllinə dair olan marağımız bizi həmin ailələrlə 6 dəfə görüş keçirməyə, istəklərini öyrənilməyə və irəli sürdükləri tələblərin yerinə yetirilməsi üçün hər dəfə tərəfimizdən kompromis variantlar təklif etməyə sövq etmişdir. Qeyd olunan görüşlər Ekologiya və Təbii Sərvətlər Nazirliyinin əməkdaşı ilə, həmçinin, Kəlbəcər rayon İcra Hakimiyyətinin eləcə də, Göygöl və Kəlbəcər rayon Polis şöbələrinin əməkdaşlarının iştirakı keçirilmişdir.
Lakin hər dəfə həmin şəxslər kompromis variantlı təkliflərimizlə razılaşsalar da, ertəsi günü razılaşmaları özləri dərhal pozaraq, yeni tələblər irəli sürməklə, sonuncu dəfəki tələbləri siyasiləşdirilərək qəbuledilməz şərt irəli sürərək, təmami ilə başqa istiqamətə yönəlmiş və elə bir format almışdır ki, bu tələbin yerinə yetirilməsi mümkünsüz olmuşdur. Yəni bu tələb olduqca böyük həcmdə xərclənmiş dövlət və şəxsi vəsaitin suya axıdılması, onlarla insanların 8 ay ərzində çəkldikləri zəhmətin yerə vurulması demək idi. Buna baxmayaraq, görüşdə iştirak edən Kəlbəcər rayon İH və rayon polis şöbəsinin vəzifəli şəxslərinin xahişləri nəzərə alınaraq tərəfimizdən sonuncu tələbə uyğun addım da atılmışdır.
Sonuncu razılaşmanın nəticəsi olaraq 35 nəfərdən ibarət olan şəxslərin iştirakı ilə yenidən yerində qalmış çəpər hissələri sökülərək yeni sərhəddə köçürülmüşdür. Bu işə yenidən olduqca böyük əmək sərf edilmiş və əlavə vəsait xərclənmişdir. Ən maraqlısı isə budur ki, növbəti çəpərləmə əməliyyatı həmin ailələrin gözləri önündə həyata keçirilmişdir və onlar tərəfindən işin icrasına dair heç bir narazılıq ifadə olunmamışdır.
Lakin yeni çəpərləmə əməliyyatı başa çatdırıldıqdan sonra, ertəsi günü Kəlbəcər rayon Polis şöbəsinin rəis müavininin və Kəlbəcər rayon İcra Hakimiyyəti aparatının 2 nəfər vəzifəli şəxslərinin gözləri qarşısında çəpərlər yenidən feodal üsul-idarəsinə uygun olaraq dağıdılmış meşə bərpa işlərində iştirak edənlərin ünvanları təhqir və ölüm hədələri ilə dolu sözlərlərlə bəzədilmiş bir nəfərə fiziki zor göstərilmiş, kişilərinin seyriçiliyi ilə qadınları çoxlarımızın eşitmədiyimiz söyüş, böhtan, şantaj ifadələrini geninə-boluna istifadə etmişlər. Bu hərəkətlərin yenidən qarşısının alınması istiqamətində yenidən 6 nəfərdən ibarət Kəlbəcər rayon Polis əməkdaşlarının iştirakı ilə həmin məcburi köçkün ailələrinin yanına getsək də, bu dəfə nümayişkar şəkildə, şəxsimizə düşmən münasibəti bəslənilməklə, şərəf və ləyaqətimiz aşağılanaraq, şəxsimizi, şantaja, təhqirə, böhtana məruz qoydular, mənə bədən xəsarəti yetirmək üçün ölüm hədələri ilə üstümə gəldilər və sonuncu xəbərdarlıq edərək “sən bir də buralara yaxın gəlsən səni qanlayacağıq” ifadələrini işlətdilər.
Ən maraqlısı isə odur ki, bu işlərin baş verməməsində məsul olan qurumlar, o cümlədən Göygöl rayon və Gəncə şəhəri icra hakimiyyətləri başçıları, xəbərdaredici məktublarımızı öncə almalarına baxmayaraq, tamami ilə heç nə olmamış kimi seyrçi mövqe seçmişlər, Kəlbəcər rayon İH-nin və Polis şöbəsinin hərəkətləri isə təsiredici gücə malik olmamaqla, əksinə, qızışdırıcı xarakterə malik olmuşdur. Halbu ki, görüşümüz zamanı hər şeyi qaydaya salacaqları barədə bizi inandırmışlar. Lakin proseslərin gedişatında onlar görünəcək və hiss olunan səviyyədə qanunların deyil, qanunları pozan şəxslərin tərəfini saxlamışlar.
Anlamaq olmur ki, əməlləri ilə hər addımında toplum maraqlarımızı ayaq altına alan, dövlət maraqlarına külli miqdarda zərər yetirən, mühafizə işlərinə məsul olan qurumun əməkdaşlarını təhqir edən, böhtana məruz qoyan, şantaj edən, fiziki zor tətbiq edən bir dəstə hansı səbəblərdən cəzasız qalırlar.
Maraqlısı budur ki, 18.04.2012-ci il tarixdə növbəti məhkəmə prosesində iştirak edən Qaçqınkomun nümayəndələri bütün bu qeyd edilənlər barəsində tərəfimizdən məlumatlandırılaraq bu işlərin təxribat olduğu qənaətimizi onların diqqətlərinə çatdırmaqla belə qanunazidd işlərə son qoyulması üçün təsirli tədbirlər görülməsini onlardan xahiş etsək də, cavabımız sükut oldu.
El arasında susmağın iki mənasını qeyd edirlər.
Birincisi, susmaq ifadə edilənə razılıq əlaməti kimi qəbul olunur;
İkincisi susmaq rəhbərə hörmət əlaməti kimi qiymətləndirilir.
Mən, Aslan Vəliyev Qaçqınkomun məhkəmə prosesində iştirak edən nümayəndələrinin rəhbəri olmadığımdan, məntiqim diqtə edir ki, yuxarıda barəsində bəhs etdiyim qeyri insani hərəkətlərə dəstək verən və yönəldicisi məhz hörmətli Qaçqınkomun mənə məlum olmayan əməkdaşlarıdırlar.
Bu isə özlüyündə çoxsaylı suallar doğurmaya bilmir!
Söz var, zalıma rəhm etmək, məzluma zülm etmək deməkdir.
Səkkiz ay ərzində davamlı olaraq həmin ərazidə qarda-boranda zəhmət çəkənlərin zəhmətlərinin sonunun belə nəticələnməsi və xeyli miqdarda xərclənmiş dövlət və şəxsi vəsaitin aqibətinin belə sonluqla yekunlaşması, sanıram ki, zalıma rəhm olunması deməkdir.
Söz var ki, xəyanət yöxsulluq gətirər!
Sanıram ki, barəsində bəhs etdiyim hadisənin təfərrüatları özlüyündə diqtə edir ki, həmin insanlar, istər sövq olunmanın nəticəsində, istərsə də, öz bəsit maraqları naminə dövlət maraqlarına xəyanət etmişlər!
Söz var ki, nadanlıqdan pis yoldaş yoxdur!
Sanıram ki, hadisənin təfərrüatları başdan-başa nadanlıq nümunəsidir.
Bütün hallarda doğrusunu ALLAH bilər.
Hər halda, mən, Aslan Vəliyev bütün Azərbaycan dünyasına bəyan edirəm!
Barəsində nəql etdiyim hadisənin törədənlərin şəxsiyyətləri bəllidir və onların qanunvericiliklə cəzalandırılması xahişini özündə ehtifa edən rəsmi məktubumuz aidiyyatı üzrə məsul olan qurumların poçtlarına çoxdan daxil olmuşdur.
Odur ki, ən qısa zaman çərçivəsində dövlət və toplum maraqlarımıza meydan oxuyan bir qrup şəxslər, bu işin baş verməməsinə məsul olan qurumlar tərəfindən cəzalandırılmasalar, vəzifəli şəxslərin hərəkətlərinin (hərəkətsizliyinin) nəticəsində Vətənə, Dövlətə, Milli dəyərlərimizə vurulmuş zərərin əvəzinin ödənilməsi tələbi ilə məhkəməyə müraciətim və beynəlxalq qurumların bu işlə bağlı məlumatlandırılması qaçılmaz olacaqdır.
Aslan Vəliyev”
P.S. Obyektivlik naminə məqalədə adı çəkilən qurumların da mövqeyini işıqlandırmağa hazırıq.
Geri qayıt