PREZİDENTƏ İCRA BAŞÇISINDAN ŞİKAYƏT
25-04-2012, 14:57
SURAXANI RAYON İCRA HAKMİYYƏTİNİN İŞÇİSİ PRESİDENTİ DƏ TANIMIR
DİA.AZ: - Zəngilan rayonundan məcburi köçkün düşmüş, hal-hazırda Bakı şəhəri Suraxanı rayonu Bülbülə qəsəbəsi, Deputat küçəsi, ev№41 ünvanında yaşayan Hüseynova Məleykı İsbəndiyar qızı tərəfindən redaksiyamıza şikayət məktubu daxil olub. Bildirək ki, bu məktub eyni zamanda prezident İlham Əliyevə, PA rəhbəri Ramiz Mehdiyevə, Qaçqın və Məcburi Köçkünlər üzrə Dövlət Komitəsinin sədri Əli Həsənova və Suraxanı rayonu İcra Hakimiyyətinin başçısı İlqar Abbasova ünvanlanıb.
DİA.AZ-a daxil olan məktubda deyilir: “Hörmətli cənab prezident! 1993-cü il oktyabr ayında Zəngilan rayonu ermənilər tərəfindən işğal olunduqdan sonra mən də bütün köçkünlər kimi öz ailəmlə birgə Bakı şəhəri Sabunçu rayonunda bir otaqlı yataqxanada məskunlaşdım. Lakin bir otaqda 8 nəfərlik ailə üzvünün yaşaması bizim üçün çox ağır idi. Nəhayət 1996-cı ildə həmin əraziyə yaxın Suraxanı rayonuna aid olan bir yarım yararsız bina var idi. O binanın içinə yığışdıq. Yağış yağanda binanın hər tərəfindən başımıza su damlayırdı.
Bizi bu vəziyyətdə görən yaxın qohumum həmin həyətin yanında ev tikdi. Bizə yazığı gəlib o evə yığdı. Və bizə köməklik etdi, həmin evi bizə bağışladı. Qaynatam həmin həyətdə çoxlu ağac əkmişdi. Çoxlu daş alıb həyətə tökdürdük ki, həyətimizi hasara alaq. Rayon İcra Hakimiyyətinin bizim əraziyə baxan nümayəndəsi, Emil adlı bir şəxs gəlib dedi ki, hasarı tiksən evinizi başınıza uçuracam. Bundan sonra həyətimiz zibil yeşiyi olub, kimin əlinə nə düşürsə bizim bağa atır. Qapı qonşum Zeynəb, Səfurə və Elza öz ərazilərinə düşən torpağın hamısında ev tikib satıb. İndi isə gəlib bizim pəncərənin qarşısında sənədsiz, qanunsuz ev tikib.
Evi tikib qurtardıqdan sonra günümüzü qara ediblər. Ailədə 8 nəfərik, 4 övladım var. Böyük oğlumu evləndirmişəm. Kiçik oğlum hərbidə işləyir, nişanlıdır. Kiçik oğlumu evləndirmək üçün böyük oğluma şərait qurmalıyam ki, onu da evləndirəm. Pəncərəmizin qabağına bir maşın daş tökmüşəm ki, böyük oğluma bir otaq tikib ayırım. 10 ildir mənim çəkdiyim kanalizasiya xəttini dönə-dönə qonşu Elza vurub sındırıb. Bizə deyir ki, daşını pəncərəmin qabağından götür, kanalizasiyanı da oradan çıxart.
Bu barədə həyat yoldaşımla birlikdə İcra Hakimiyyətinin başçısı İlqar Abbasovun qəbulunda da olmuşuq. Dəfələrlə bizim şikayətə getməyimizə baxmayaraq, heç bir tədbir görən yoxdur. Bizim əraziyə baxan Emil adlı bir şəxs qarşı tərəfin sözünü deyir. Biz qaçqınların hüququ tapdalanır. Emil müəllimə bildirdim ki, daha sizə şikayət etməyəcəyəm. Biz qaçqınları başa düşən prezidentimiz var. Prezidentimizə məktub yazacam. Mənə cavabı o oldu ki, get, kimə müraciət edirsən et. Dəfələrlə Emil müəllimin gözü qarşısında 75 yaşlı qaynanam qonşu tərəfindən tənqid və təhqir olunub. İki qızımı hədələyiblər ki, oğurlayıb başınıza oyun açacağıq. Məni hədələyirlər ki, səni öldürəcəyik. Dəfələrlə üzümüzə deyirlər ki, erməni başınıza oyun açdı, sizi torpağınızdan qovdu”.
Daha sonra şikayətçi prezidentdən kömək istədiyini də deyir: “Qarşı qonşumu susduran yoxdur. Bizə qarşı hər cür söz deyilir. Onu da qeyd edim ki, sözügedən qonşunun, Zeynəb xanımın oğlunun əlində külli miqdarda saxta pul və narkotik maddə tutulub, cəza evində yatır. Bizi onunla hədələyirlər ki, bu gün-sabah cəza evindən çıxanda başınıza oyun açdıracağıq. Son ümidimiz sizədir. Xahiş edirik, bizə köməklik edin”.
Geri qayıt