GÖMRÜK KOMİTƏSİNİN ŞEFİNƏ NOVRUZ “SÜRPRİZ”İ
2-03-2012, 13:12
AYDIN ƏLİYEVİN MƏSƏLƏSİ BAYRAMDAN SONRA HƏLL OLUNACAQ
DİA.AZ: - Dövlət Gömrük Komitəsinin sədri Aydın Əliyev yaxın vaxtlarda işdən çıxarılacaq. Bu barədə DİA.AZ-ı bilgiləndirən mötəbər qaynağın sözlərinə görə, Gömrük Komitəsi özbaşınalığı, saymazlığı ilə hər zaman bütün qurumlardan fərqlənib.
Onu da bildirək ki, bu arada sahibkarlardan biri də redaksiyamıza gömrükdəki məmur özvaşınalığı ilə şikayət edib. Şikayətçi hələlik adının çəkilməməsini istəyir və bunu belə izah edir ki, onun işini daha da çətibləşdirə bilərlər: "Son zamanlar isə lap ağını çıxarıblar. Biz iş adamları onların əlindən bezmişik. Ölkəyə gətirilən yüklər qanunsuz olaraq aylarla gömrükdə saxlanılır.
Gömrük Komitəsinin saytına baxanda düşünürsən ki, bunlar nə yaxşı işləyir. Amma reallıqda vəziyyət tamam başqa cürdür. Ölkəyə gətirilən yükün sahibinə verilməsi saytlarında deyildiyi kimi, 20 dəqiqə deyil, 2-3 ay çəkir. Gedib soruşanda ki, malımı nə vaxt ala bilərəm, deyirlər "rəis hələ istəmir, biz heç nədən qorxmuruq, gedin kimə şikayət edirsiniz edin".
Qeyd edək ki, iş adamlarının bu kimi gileylərinə mətbuatda tez-tez rast gəlinir. Onlar bildirir ki, gömrük işçiləri dövlət qurumunu öz şəxsi bizneslərinə çeviriblər. Faktiki olaraq bu adamlar Azərbaycanın iqtisadiyyatına və dövlətçiliyimizə, hakimiyyətin imicinə zərbə vururlar. Ancaq öz ciblərini və mənafelərini güdürlər. Vətənə, dövlətə deyil, özlərinə qulluq edirlər. Qlobal böhranın iş adamlarına vura bilmədiyi ziyanı Gömrük Komitəsi vurur. Sahibkarlar işini artırmaq, rəqabətə girmək əvəzinə, gömrüklə mübarizə aparırlar. Bütün bu kimi narazılıqların Gömrük Komitəsinin rəhbərliyinin tətbiq etdiyi qaydalardan irəli gəlir.
Artıq hakimiyyətdə bir çoxları Aydın Əliyevin fəaliyyətindən narazı olduqlarını bildiriblər. Bu barıədə danışan mənbə onu da deyib ki, bir müddət öncə Maliyyə Nazirliyi Gömrük Komitəsində yoxlamalar aparıb və bir sıra nöqsanlar aşkar edilib: "Hazırda Aydın Əliyev çıxılmaz duruma düşüb. Hətta onun Bakı Baş Gömrük İdarəsinin rəisi Vüsal Novruzovla əvəzlənməsi söhbəti də gedir".
Gömrük Komitəsinin korrupsiya bataqlığı olaraq qalması heç kimə sirr deyil. Bu komitədə işləyən vəzifəli şəxslər, dahi Azərbaycan şairi Məhəmməd Füzulinin təbiri ilə desək, "salam verirsən, rüşvət deyil deyə almırlar". Hər gün narazılıq, hər gün korrupsiya, hər gün rüşvət...daha nə qədər olar? Onların fəaliyyəti azad insan iradəsinin təzahüründən artıq, mexanizmlərin işini xatırladır. Gündəlik əmək dünyası yalnız korrupsiyadan ibarət olan bu adamlar, heç kimdən qorxub-çəkinmədən insanlardan rüşvət tələb edirlər.
Gömrük Komitəsinin rəhbərləri KİV-də çıxıb elan edirlər ki, avtomobil idxal edən vətəndaşlar üçün komitənin saytında kalkulyator qoymuşuq. Yeri gəlmişkən, eyni kalkulyatordan biri də rüsum.az saytında quraşdırılmışdır. Ancaq problem ondadır ki, gömrük işçiləri, rüsum hesablayarkən kalkulyatordan istifadə etmirlər. İstəyirsən saytda kalkulyator deyil, lap "makintoj" yerləşdir, bu məmurlara oradakı rəqəmlərin dəxli yoxdur.
Gömrük postlarının qarşısına hər gün onlarla adamın toplaşması səbəbsiz deyil. Çünki belə şəxslər avtomobillərinin qeydiyyata alınması üçün rüsumdan əlavə fantastik məbləğdə pul tələb olunmasına etiraz edirlər. Vətəndaşlar fəryad edərək, avtomobillərin "rastomojka"sı üçün istənilən qeyri-rəsmi məbləğin qiymətinin həddindən artıq qaldırıldığını bildirirlər.
Qeyd edək ki, Gömrük Postlarında baş verənlər bir çox hallarda ölkəmizin adının digər dövlətlərdə pis hallanmasına gətirib çıxarır. Çünki böyük gəlirlər əldə etməyə çalışan bir sıra gömrük əməkdaşları xarici vətəndaşları, biznes sahiblərini Gömrük Postlarında incidirlər.
Azərbaycan prezidenti İlham Əliyev Dövlət Gömrük Komitəsi əməkdaşlarının sosial müdafiəsinin gücləndirilməsi, gömrük işi sahəsində prosedurların sadələşdirilməsi və şəffaflığın artırılması ilə əlaqədar bəzi tədbirlər haqqında keçən ilin fevral ayında Fərman imzaladı. Fərmana əsasən, Dövlət Gömrük Komitəsinin xüsusi rütbəsi olan əməkdaşlarının və mülki işçilərinin sosial müdafiəsini gücləndirmək, gömrük işi sahəsində proseduraları sadələşdirmək və şəffaflığı artırmaq məqsədi ilə gömrük sisteminin büdcədənkənar inkişaf fonduna daxil olan vəsaitin 25 faizi Dövlət Gömrük Komitəsinin xüsusi rütbəsi olan əməkdaşlarının və mülki işçilərinin aylıq vəzifə maaşlarına əlavənin verilməsi üçün istifadə olunacaq.
Təbii ki, ölkə başçısının imzaladığı hər bir fərman və sərəncam vətəndaşların sosial vəziyyətlərinin yaxşılaşdırılmasına, dövlət və dövlətçiliyin inkişafına xidmət edir. Lakin təəssüflər olsun ki, ölkə başçısı dövlət qulluqçularının əmək haqlarının artırılması istiqamətində müvafiq addımlar atsa da, korrupsiya və rüşvətxorluğun, yersiz süründürməçiliyin qarşısını almaq istiqamətində iradə nümayiş etdirsə də, Gömrük Komitəsi kimi bir sıra qurumlar heç nəyə əhəmiyyət verməyərək öz "siyasət"lərindən geri çəkilmək istəmirlər.
Mötəbər qaynağın DİA.AZ redaksiyasına bildirdiklərində o da vurğulanır ki, ola bilsin ki, Novruz bayramından sonra Aydın Əliyev görəvindən azad edilsin: “Çünki son olaraq əhalinin əsəblərinin tarıma çəkilməsinin yaratdığı şiddət hakimiyyəti də müəyyən addımları atmağa vadar edib”. Mənbəmizə görə, belə bir məqamda Aydın Əliyevin “vurulması” hakimiyyətin xalqa, xüsusən də sahibkarlara etdiyi jest kimi qəbul olunmaqla yanaşı, həm də ciddi effekt yaradacaq, hakimiyyətə müsbət divident qazandırmış olacaq.
Geri qayıt