ALİ MƏKTƏB REKTORU HƏBS OLUNA BİLƏR
21-02-2012, 12:16
TƏHSİL SİSTEMİNDƏ KORRUPSİYA İLƏ BAĞLIYOXLAMALAR BAŞLAYIR
DİA.AZ: - Hələ keçən ilin sentyabr ayında iki ali məktəb rektorunun görəvindən azad ediləcəyi ilə bağlı məlumatlar yayılsa da, sonradan bu xəbərlər təsdiqlənmədi. Lakin bununla bağlı məlumatı mətbuata ötürən qaynaqlar həqiqətən də iki rektorun işinin cəncəldə olduğunu israrla bildirməklə yanaşı, hətta onlardan birinin korrupsiya ittihamı ilə həbs olunacağını vurğuladılar.
Bu arada isə redaksiyamıza yenə də rektorların bəzilərinin başının üzərinin qara buludların alması barədə xəbər daxil olub. Bu barədə «Dünya» İnformasiya Agentliyi redaksiyasını bilgiləndirən məlumatlı mənbə bildirir ki, ümumiyyətlə təhsil sistemində yeni korrupsiya yoxlamalarının start düyməsi basıla bilər:
«Qış imtahan sessiyası zamanı ali məktəb rektorlarından biri ilə bağlı korrupsiyaya qarşı mübarizə idarəsinin qaynar xəttinə şikayət daxil olub. Həmin rektor çox nüfuzlu şəxs olduğundan hələlik onun barəsində heç bir ölçü götürülmür. Amma yaxın günlərdə bu barədə qərar dəyişə bilər».
Mənbəmiz bildirir ki, söhbət təxminən 20 min manatlıq «alış-veriş»dən gedir: «Belə ki, ali məktəbdən qovulmuş tələbələrdən birindən bu qədər pul alınmaqla yanaşı, onun xeyrinə xeyli sayda qanunsuzlaqlar edilib, sənədlər saxtalaşdırılıb. Bu işdə isə birbaşa olaraq iştirakçı olan fiqur rektordur».
Onu da xatırladaq ki, bu günlərdə bir başqa ali məktəb rektoruna qarşı da açıq korrupsiya ittihamı elan olunsa da, heç bir tədbir görülmədi. Söhbət İqtisad elmləri doktoru, professor Bədirxan Musayevin prezident İlham Əliyevə ünvanladığı məktubundan gedir.
Xatırladaq ki, müraciətində professor Azərbaycan Dövlət İqtisad Universitetinin rektoru Şəmsəddin Hacıyevdən gileylənirdi. Bədirxan Musayev bildirir ki, 2011-ci il noyabr ayının 4-nə qədər Şəmsəddin Hacıyevin müşaviri, eyni zamanda həmin il noyabr ayının 11-nə qədər universitetdə iqtisadi kibernetika kafedrasının müdiri vəzifələrində işləyib: “Orada baş verən bütün qanunsuzluqlardan dəqiqliyi ilə xəbərdaram. Məhz qanunsuzluqlara qarşı barışmaz mübarizə apardığımdan Şəmsəddin Hacıyev məni susdurmağa çalışdı və bu gün də susdurulmağım üçün bütün variantlara əl atılıb. Yəqin düşünür ki, bununla məni haqlı mübarizəmdən çəkindirib qanunsuzluqları barədə möhtərəm cənab prezidentimizə və Baş Prokurorluğa ərizə və müraciətlərimin qarşısını ala biləcək.
Bəli, bu gün universitetdə rüşvət ən yüksək səviyyədə tüğyan edir. Bu gün universitetdə pul yığmağı bacarmayanlar və yaxud rektorun qanunsuz əməllərinə çəpik çalmayanlar ərizələri məcburi alınmaqla, ya da əsassız əmrlərlə işdən azad olunurlar. Bundan əlavə, Dərbənd filialına ildə 500-600 tələbə qəbul olunmaqla milyonlarla rüşvət alınır. Girişdə, yəni qəbulda küt tələbə qəbul edirlər, çıxışda (köçürmədə) isə 500-600 bal toplayan tələbələrin siyahısına daxil edirlər.
Bir qədər keçmişə gedib deyim ki, mən universitetdəki bu faktların aradan qaldırılması üçün dəfələrlə rektora şifahi və yazılı müraciətlər etmişəm. Nəticə olmayanda isə prezident İlham Əliyevə üz tutdum. Məhz buna görə də məni təqib etdirdi, nəhayət, ötən ilin noyabr ayında məni müşavir və kafedra müdiri vəzifələrindən uzaqlaşdırdı. Ömrünün 60 ilini bir təhsil ocağında keçirmiş insanı işdən azad etməklə bərabər, xidməti otağımdakı əşyalarımı da universitetin həyətinə tökdürdü”.
Bədirxan Musayevin müraciəti bu sözlərlə bitir: “Sizdən çox xahiş edirəm ki, rektor Şəmsəddin Hacıyevin mənə qarşı haqsız hərəkət və əməllərinin, mənə edilən basqıların, təzyiq və təhdidlərin durdurulmasına köməklik göstərəsiniz!”
Doğrudur, kürəkəni hakim Yeni Azərbaycan Partiyasının gənclər təşkilatına rəhbərlik edən Şəmsəddin Hacıyevin korrupsiya və yaxud da bir başqa ittihamla vəzifəsindən alınması nəinki mümkün deyil, heç inandırıcı da görünmür. Amma digərləri heç də «Narxoz» rəhbəri kimi bu qaydada sığortalanmayıblar.
Geri qayıt