RUSİYA YENİDƏN BAKIDA ÇEVRİLİŞ XƏYALINA DÜŞÜB?
29-11-2013, 11:24
MİLLİ ŞURA İLƏ BAĞLI YENİ SİYASİ CANLANMANIN ARXASINDA NƏ DURUR?
DİA.AZ: - Prezident seçkiləri ərəfəsində Milli Şuranın sədri və vahid namizədi kimi rəsmiləşməsinə baxmayaraq, Rusiya vətəndaşı olması səbəbindən seçkilərdə iştirak edə bilməyən tanınmış kionrejissor Rüstəm İbrahimbəyovun əslində, seçkilərə təkcə «vətəndaşlıq əngəli» səbəbindən qatılmadığını hər kəsə aydın olan bir məsələdir. Ən azından bu gün hamı yaxşı bilir ki, Rusiyanın xüsusi xidmət orqanlarının sifarişi ilə proseslərə qatılan Rüstəm İbrahimbəyov üçün montaj pultunun arxasında oturmaq daha vacib idi, nəinki Azərbaycan müxalifətinin vahid lideri kimi seçkiyə qatılmaq.
Özünün ayrı-ayrı mətbu orqanlara müsahibəsində də tanınmış kinorejissor siyasət adamı olmadığını etiraf edirdi. Və elə bir fon yaradılırdı ki, guya onu «vahid namizəd» kimi önə sürən qüvvələr də məhz bu məqamı diqqətə alıblar. Yəni siyasət adamı olmayan birisinin rəhbərliyi altında hakimiyyətə gəlib, keçid hökumətini formalaşdırıb, sonradan seçkilərin keçirilməsinə nail olmaq…
Bütün bunlar müxalifətin açıqladığı planlar idi. Amma bu planın «müəllifləri» də yaxşı anlayırdılar ki, əslində Milli Şura Rusiyanın Azərbaycanda yenidən «şurəvi hökumət» qurma cəhdləri yolunda sıradan bir alətdir. Artıq bu, tam sübuta yetirilib. Rüstəm İbrahimbəyovun və digər rusiyanlı müxaliflərin emosiyalarının Putinin Bakı səfərinin ardından soyuması faktı da bunun sübutu kimi qəbul oluna bilər.
Və bundan sonra Milli Şuranın «milliləşdirilməsi» prosesinə start verildi. Qısa müddət içində Cəmil Həsənli layihəsi işə salındı. Amma yenə də Milli Şuradan rusiya barmağının çəkilmədiyi açıq şəkildə hiss olunmaqda idi. Elə buna görə də artıq Milli Şura nümayəndələri Rusiya bağlılığının olmadığını sübuta yetirmək üçün açıqlamalar verməyə başladılar. Yəni yalnız açıqlama, konkret addımlar isə atılmadı. Çünki sovet dövründən qalma Azərbaycan müxalifəti genetik kodların nostaljisinə qapılaraq artıq ümid dolu gözlərini Kremlə, Qırmızı Meydana doğru tutmuşdu. Və Rusiyaya ümid bəslənilirdi.
Amma bu baş vermədi. Rusiya kimlərisə hakimiyyətə daşıdıqdan sonra öz istədiyinə nail olmağın çətinliyini görməyəcək qədər axmaq olmadığını sezdirdi. Ani bir gedişdə Milli Şuranın üzərindən əlini çəkdi və rəsmi Bakı ilə danışıqlar masasına oturdu. Ki, bununla da Milli Şuradan, «Milyarderlər İttifaqı» kimi tanınan Rusiya Azərbaycan Təşkilatları İttifaqından və digər buk imi vasitələrdən bir alət olaraq yararlandığını, bu alətlər hesabına rəsmi Bakını öz maraqları fonunda yola gətirməyi qəsd etdiyini tam çılpaqlığı ilə ortaya qoymuş oldu.
İndi isə vəziyyət yenidən dəyişmək üzərədir və Rusiyanın yenidən Milli Şura bazasına yatırım qoyma yolunda olduğu açıq şəkildə duyulur. Elə buna görə də dünənə qədər Milli Şuranın sədrliyindən ikiəlli yapışan Rüstəm İbrahimbəyov yenə də Kremlin direktivləri əsasında hərəkət edərək növbəti mərhələ üçün Azərbaycan dövlətinə qarşı «DƏYƏNƏYİN» hazırlanması prosesinə start vermiş oldu.
Bununla bağlı DİA.AZ-a danışan məlumatlı mənbə iddia edir ki, Rüstəm İbrahimbəyovun Milli Şura sədrliyindən getməsi barədə verdiyi razılıq, əslində artıq Cəmil Həsənli ilə Rusiyanın arasında yeni bağların qurulmasının ardından baş tutub. Hər halda, bu iddianı sübutlayan yetərincə faktlar ortadadır ki, onlardan biri də baş nazirin keçmiş müavini, «Milyarderlər İttifaqı»nın sədri, «Azərros» Ağsaqqallar Şurasının prezidenti Abbas Abbasovla Cəmil Həsənlinin mübhəm Türkiyə görüşüdür.
Bu məqamı xatırladan bilgili qaynaq iddia edir ki, artıq Rusiya yenidən Milli Şura ilə oynamağa başlayıb: «Təbii ki, ruslar rəsmi Bakıdan istədiklərini ala bilmədilər. Və ona görə də az əvvəl Rüstəm İbrahimbəyovla basdıqları «game over» modundan çıxaraq, «new game» moduna keçid etdilər. Bəli, yeni oyun başlayır və bu oyunda yazıqlar olsun ki, qosqoca Azərbaycan müxalifəti də alət olma funksiyasından vaz keçə bilmir. Halbuki onlar da girdikləri prosesin sonunda hakimiyyətə gəliş yekununun olmadığını yaxşı bilirlər. Və onlar sadəcə olaraq «tutar qatıq, tutmaz ayran» prinsipi ilə hərəkət edirlər. Burada «qatıq» kimi anlaşılan onların iqtidara gəlişi, «ayran» kimi anlaşılan isə proses boyunca əldə edəcəkləri maddi və siyasi dividentlərdir. Bu yolda isə kimlərin qurban gedəcəyi artıq onlar üçün əhəmiyyətsizdir».
Mənbəmiz iddia edir ki, son günlər Milli Şura nümayəndələrinin Rusiyaya zidd beynəlxalq dairələrlə sıx təması da daha çox iz azdırmağa hesablanmış gedişlərdir…
Geri qayıt