FƏRHAD ƏLİYEV ÜÇÜN AZADLIQ ŞƏRTİ!
17-01-2012, 14:05
HAKİMİYYƏTİN ELÇİLƏRİ KEÇMİŞ NAZİRLƏ ANLAŞMA ƏLDƏ EDİB
DİA.AZ: - 31 Dekabr Dünya Azərbaycanlılarının Həmrəyliyi Günü münasibətilə prezident tərəfindən imzalanan əfv fərmanı çoxlarının ümidlərini alt-üst etdi. Amma artıq bu kimi darmadağınlıqlara Azərbaycan cəmiyyətində bir immunitetin yarandığı da kimsəyə sirr deyil. Yəni hakimiyyətin ictimai gözləntilərin ziddinə sərgilədiyi davranışlar artıq silsiləvaridir və ənənəvi xarakter daşıdığından yaranmış narahatçılıqların və yaxud da təəccüblənmələrin ömrü də qısa olur.
Amma əslində, hakimiyyətin bu kimi davranışları da müəyyən bir sistemə söykənir. Və xüsusən də son əfv fərmanı birbaşa olaraq konkret bir planın təzahürü kimi qəbul olunmalıdır. Bu barədə redaksiyamıza məlumat verən hakimiyyət içindəki qaynaq bildirir ki, bu gün siyasi məhbus məsələsinin yenidən gündəmə gətirilməsi iqtidarın maraqlarına heç də uymur:
«Amma bu hakimiyyət hər zaman XOFUN çiyinlərində dayanıb. Diqqət yetirdinizsə, hətta öz haqqlarını tələb edən taksi sürücülərinə qarşı da amansız davranılır. Yəni onların bu aksiyalarının siyasiləşməsinin qarşısı alına biləcəyi təqdirdə, hakimiyyət fərql mövqe nümayiş etdirir. İndi gözəl bir şərait var ki, siyasi müxalifət əslində böyük bir ordu olan taksi sürücülərini öz eloktoratına çevirsin».
Mənbəmizə görə, hətta bu halda elə hakimiyyət özünün bu çağacan nümayiş etdirdiyi prinsipləri fonunda yanlış davranmır: «Bu hakimiyyət istənilən bir narazı kəsimə TERRORÇU gözü ilə yanaşıb və necə ki, bəzi ölkələrdə terrorçularla danışığa gedilməsi məqbul hesab olunmur, eləcə də dəfələrlə bu hakimiyyət sübuta yetirib ki, terrorçu gözü ilə gördüyü narazı kəsimlə danışmaq niyyətində deyil. Bu bir ənənədir. Mərhum prezident Heydər Əliyev də o zamanlar qiyam qaldıran Qarabağ Əlilləri ilə danışıqlara getmədi. Həmin kəsim sonradan müxalifətə tansfer edərək, bu düşərgədə tamamən əriyib yoxa çıxdı. İndi köhnə Qarabağ Əlilləri korpusundan kiminsə fəallığı belə müşahidə olunmur. Yəni hakimiyyət əslində, öz üsulunda haqlı görünür. Və onlara görə, hakimiyyət məhz bu şəkildə qorunmalıdır».
Amma siyasi məhbus məsələsi artıq əndazəni aşıb. Bunu da mənbəmiz bildirir və bununla bağlı rəsmi Bakının çox ciddi problemlər içində olduğunu da etiraf edir: «Əslində, burada ənənəvi üsullardan istifadə edilib, vəziyyətdən çıxmaq olar. Amma «Avroviziya» tədarükləri artıq fərqli davranışları diqtə edir. İqtidarın texnoloqları da bunu nəzərə alaraq, yeni üsula müraciət edəcəklər».
Bu üsulun isə total əfvin, yəni amnistiyanın gündəmə gətirilməsi ilə nəticələnəcəyinin şübhəsiz olduğunu bildirən mənbəmiz qeyd etdi ki, əslində Mart ayında yox, elə may ayında amnistiya qərarı veriləcək: «Doğrudur, Novruz Bayramı bunun üçün ən münasibidir. Amma hakimiyyət yenə də ənənəvi mahiyyətini nümayiş etdirməyi düşünür. Çünki ictimai gözləntilər məhz Novruz Bayramı ərəfəsinədir».
Mənbəmiz onu da bildirdi ki, hazırda həbsdə saxlanılan keçmiş nazirlər də artıq bu barədə məlumatlandırılıblar: «Konkret olaraq, keçmiş iqtisadi inkişaf naziri Fərhad Əliyev və onun qardaşı, «Azpetrol» Neft Şirkətinin sabiq prezidenti Rafiq Əliyev azadlıq yolundadırlar. Onlar əslində əfv fərmanı ilə azad ediləcəkdilər. Amma yenə də «ictimai gözləntilərin puç edilməsi» prinsipi bu qərarın yubanmasına nədən oldu».
Mənbəmiz bildirir ki, bir neçə gün əvvəl YAP iqtidarının elçiləri məhbəsdə Fərhad Əliyevlə görüşüblər: «Yekun anlaşma əldə olunub. Fərhad Əliyev Azərbaycanı tərk edəcək. Yalnız Rafiq Əiyevin ölkədə qalmasına icazə verlib. Təbii ki, belə bir anlaşma zərurəti Fərhad Əiyevin liderə çevrilmə ehtimalları ilə birbaşa bağlıdır».
Mövzu diqqətimizdədir…
Geri qayıt