NƏŞRİYYAT FƏALİYYƏTİNİ DAYANDIRIR
17-01-2012, 13:44
HƏLƏLİK TƏMİR BƏHANƏSİ VAR, AMMA BİNANIN SATILDIĞI DEYİLİR
DİA.AZ: - Neçə-neçə qəzet redaksiyasının yerləşdiyi «Azərbaycan» Dövlət Nəşriyyatı fəaliyyətini dayandırır. Bu barədə redaksiyamıza nəşriyyatdakı qaynaqlar məlumat veriblər. Mənbənin bildirdiyinə görə, artıq redaksiyalara bu barədə xəbərdarlıq edilib.
Redaksiyalar yeni illə bağlı müqavilə bağlamaq istədikdə onlara nəşriyyatın rəhbərliyi tərəfindən gözləmələri məsləhət görülüb: «Ən azından 6-7 ay müddətinə binanın fəaliyyəti dayandırılacaq. Hələlik təmir ediləcəyini deyirlər, amma ortada fərqli fikirlər də var».
Xatırladaq ki, bir müdət əvvəl «Azərbaycan» nəşriyyatının özəlləşdiriləcəyi ilə bağlı məlumat vermişdik. Onu da qeyd edək ki, digər cənubi Qafqaz ölkələrində bu proses həyata keçirilib və nəşriyyatın otaqları redaksiyalar tərəfindən özəlləşdirilib. Lakin Azərbaycanda nədənsə bu məsələ yubadılır.
Mənbəmizin bildirdiyinə görə, nəşriyyat özəlləşdirməyə çıxarılacan: «Artıq binanın müştərisi də var. Binaya oliqarx-məmurlardan birinin müştəri çıxdığı məlumdur. Amma bina satıldıqdan sonra hansı məqsədlərə xidmət edəcəyi məlum deyil».
Onu da bildirək ki, hazırda «Azərbaycan» Dövlət Nəşriyyatında «Azərbaycan», «Respublika», «Bakinski Raboçiy» kimi rəsmi qəzetlər, eləcə də «Azadlıq», «Gündəm Xəbər», «Şərq», «Ədalət» və digər qəzet redaksiyaları yerləşir.
Geri qayıt