ZAKİR FƏRƏCOVA QARŞI ŞOK FAKTLAR
9-09-2013, 11:13
“Azadlıq”ın ötən saylarında Abşeron sakini Ilahə Alıyevanın baş prokuror Zakir Qaralova müraciətini dərc etmişdik. Həmin müraciətdə Ilahə Alıyeva Abşeron Rayon Icra Hakimiyyətinin Eldəniz Səfərov adlı əməkdaşı tərəfindən aldadıldığını bildirirdi. Şikayətçinin sözlərinə görə, Eldəniz Səfərov ona Abşeron Rayon Icra Hakimiyyəti tərəfindən Xırdalan və Masazırda əlillər üçün tikilən evlərdən mənzil veriləcəyini bildirib və bunun müqabilində külli miqdarda pul alıb:
“Mənə dedi ki, qohumlarımdan biri ayağından əlil olduğu üçün ona həmin evlərdən birində 3-cü mərtəbədə 2 otaqlı mənzil verilib. Lakin o, həyət evi istədiyinə görə icra başçısı tapşırıb ki, ona verilən evi mənə versinlər. Eldəniz mənə dedi ki, əgər 22 min manat pul versəm bu məsələ həll olunar. Mən 9 min manat düzəldib Eldənizə verdikdən sonra bildirdim ki, qardaşım 2-3 aya qalan pulu da verəcək. Səhəri gün o zəng edərək min manat da gətirməyi təklif edərək, qalan pulu isə sonra verməyimə razı oldu. Bu məqsədlə o, kirayədə yaşadığım evə gələrək anamın yanında məndən 1100 manat aldı.
Təxminən 2 ay sonra qardaşım yerdə qalan pulu da verdi. Eldəniz bildirdi ki, 2012-ci ilin sentyabr ayının axırı və ya oktyabrın əvvəli tam təmirli evimə köçəcəyəm.
Avqust ayında isə o, kirayədə qaldığım evə gələrək bildirdi ki, prezidentin göstərişinə əsasən əlillərin evlərinə dəyəri 15 min manat məbləğində olan mebel və məişət avadanlıqları verilib. Təklif etdi ki, həmin avadanlıqlara görə ona 4 min manat versəm, mebel dəstini əlil qohumundan alıb mənə verəcək. 2013-cü ilin fevral ayında mən ona bu məqsədlə 4 min manat verdim. Həmin puldan o, mənə 250 manat qaytararaq, bunu uşaqlarıma pay olaraq verdiyini bildirdi".
* * *
Ilahə Alıyeva iddia edir ki, sonradan həmin şəxsin onu aldatdığı bəlli olub: “Mən ondan pulumu tələb etdim. O isə dedi ki, pulu Zakir Fərəcova vermişəm, geri ala bilmərəm. Ona görə də nə pulu verəcək, nə də evi. Hətta mənə dedi ki, hara şikayət edirsən et, sənə heç kim inanmayacaq.
Dedi ki, Milli Məclisin sədri Oqtay Əsədov Zakir Fərəcovun xalası oğludur. Zakir Fərəcəvoun qardaşı isə deputatdır. Onlar icra başçısına himayədarlıq edirlər. Ona görə də sənə heç kim inanmaz ki, icra başçısı sənin pulunu alıb".
Şikayətçinin sözlərinə görə, o baş verənlər barədə Abşeron polisinə müraciət edib. Lakin polis işi ört-basdır etməyə çalışır.
Eldəniz Səfərov isə “Azadlıq”a bildirmişdi ki, Ilahə Alıyevanın söylədikləri yalandır: “Hazırda bu işlə bağlı araşdırmalar gedir. Mən də vəzifəmdən getmişəm. Istintaqın obyektiv aparılması üçün. Artıq araşdırmalar zamanı bəzi məsələlər aydınlaşıb. Bu adamlar məni ləkələyir. Və yəqin ki, haqq-ədalət öz yerini tapacaq”.
* * *
Bu günlərdə Ilahə Alıyeva Eldəniz Səfərovla danışıqlarının stenoqramını redaksiyamıza təqdim edib. Məlumat üçün deyək ki, şikayətçi Eldəniz Səfərovla danışıqlarının hamısını qeydə alaraq disklərə köçürüb. Həmin disklər istintaqa təqdim edilib. Audio faktlar Məhkəmə Ekspertiza Mərkəzində ekspertizadan keçirilib və bəlli olub ki, Ilahə Alıyeva ilə danışan Eldəniz Səfərovdur. Şikayətçi ekspertizanın rəyini də qəzetimizə təqdim edib.
Eldəniz Səfərovla Ilahə Alıyevanın danışqlarına gəlincə, şikayətçinin ittihamlarının heç də əsassız olmadığı aydın olur.
Məsələn, danışıqlarda Ilahə Alıyeva Eldəniz Səfərovdan xahiş edir ki, evi ona göstərsin. Eldəniz Səfərov isə bildirir:
- Vallah, indi mən sizə söz deyim. Biri Xırdalan, icra hakimiyyətinin böyründəki binadır. Mən indi konkret hansı olacağını bilmirəm.
I.A: Hansı olacağı lazım deyil e.
E.S: Xırdalan döngəsində tikilən bina var e, bu de böyründə.
I.A: Hə.
E.S. Icra hakimiyyətinin yanında. Mən gedə bilmərəm e. Məni düz başa düşün. Hamı bu dəqiqə...Bu dəqiqə elə bir dövrdür ki...
I.A: Dur gedək qıraqdan göstərin.
E.S: Orda cəmi 3 dənə bina var.
I.A: O yox e, icra hakiminin yanındakı.
E.S: Yox o gölün yanında üçcə dənə bina var.
I.A: Göl hansı tərəfdə?
E.S: A bu Ceyrandatan gölü, Qafqaz Universitetinin yanı yoxdu?!
I.A: Ora gediblər axı. Orda deyiblər ki, burda evlər paylanıb.
E.S: Onlar gedib, paylanmış evə gediblər.
I.A: Yəni iki il bundan qabaq paylanıb.
E.S: Əşi iki il nədi. 4 il, 5 il qabaq paylanıb. Bir hissəsi paylanıb. O o birisi binadı e. Mən dediyim binada yaşayış yoxdur.
I.A: Qafqaz Universitetinin yanı?
E.S: Bir ordakı binalardan biridi, biri də bu icra hakimiyyətinin böyründə var e, o binalardan biridir. Bir də başçının qardaşı tikib.
Göründüyü kimi Eldəniz Səfərov burada Ilahə Alıyevaya mənzil təklif etdiyi binanı göstərməkdən yayınır. Ziddiyyətli danışır. Hər dəfə bir söz deyir.
Sonrakı danışıqlarda Eldəniz Səfərov deyir:
- Ev konkret nə vaxt bölünəcək bilinmir. Hamı gözləyirdi ki, Sumqayıtdan qabaq gəlib Abşerona verə, oradan Sumqayıta gedə(Ilham Əliyevi nəzərdə tutur - red ).Getdi Sumqayıta 400 nəfərə verdi, çıxdı gəldi. Onların proqramını biz hazırlamırıq axı, prezidentin proqramını. Biz düzüb-qoşum işimizi görüb... Gözləməkdən başqa çarəmiz yoxdur.
I.A: Sən sentyabr, oktyabr dedin, noyabr oldu, dekabr oldu, yanvar oldu. Indi də mart oldu. Gölün qırağı, bir də icra hakimiyyətinin yanı. Dünən gəlib bütün zonanı gəzdik elə bir şey yoxdu.
E.S: Ode o əllillərə verdiyimiz bina var ha, camaat yaşayır e. 4 ildir camaat orda yaşayır. 18 dənə binanı şəxsən mən satmışam. 21 mindən, 24 mindən.
Burada aydın olur ki, Abşeron Rayon Icra Hakimiyyəti əlillər üçün ayrılan evləri satmaqla məşğuldur.
Danışıqlarda Eldəniz Səfərov sona Ilahə Alıyevaya müxtəlif bəhanələr gətirir. Ona təklif edilən mənzilin hansı binadan olması, nə vaxt veriləcəyi barədə ziddiyyətli açıqlamalar verir.
Əldə etdiyimiz məlumata görə, Eldəniz Səfərovla Abşeronun icra başçısı Zakir Fərəcov arasında qohumluq əlaqələri var. Onun bu vaxta qədər məsuliyyətdən kənarda qalmasının sirri də bundadır. Məlumatda həmçinin bildirilir ki, hazırda bu iş DIN-inin istintaq idarəsində araşdırılır. Lakin Ilahə Alıyeva işin Korrupsiyaya Qarşı Mübarizə Idarəsinə verilməsini istəyir.
Geri qayıt