BAKIDA "ATLANT" FIRILDAĞI...
14-06-2013, 11:09
SATIŞA DEFFEKTLİ MALLAR ÇIXARILIR
Ölkədə sirnikləndirici vədlərlə mal satıb istehlakçıları aldadan, onların hüquqlarını pozan şirkətlərlə bağlı dəfələrlə məlumatlar yayılıb. Bu proses son illərdə Azərbaycanda artıq adi hala çevrilmək üzrədir. Bahalı malları həddindən artıq baha qiymətə satmaqla istehlakçılara həmin malın yüksək keyfiyyətə malik olmasını demək, uzunmüddətli və saxta zəmanət verməklə insanları şirnikləndirmək, sonda isə mal və məhsul keyfiyyətsiz çıxdığı halda zəmanətdən yayınma və sair hallar demək olar ki, istehlakçıları bezdirib. Bu barədə aidiyyəti qurumların və bazara birbaşa nəzarət edən dövlət müəssisələrinin səmərəsiz fəaliyyəti, daha doğrusu fəaliyyətsizliyi də insanlarda inam hissini itirməyə gətirib çıxarır. Aidiyyəti dövlət qurumları ilə müəyyən yollarla münasibət yaradan bu şirkətlər prosesdən sui-istifadə etməklə fırıldaqçılıqlarını davam etdirir, istehlakçıların aldadılması üçün səylərini daha da artırırlar. Nəticədə, ağır zərbə istehlakçıya dəyir. Bu zərbə və ziyanın isə nə prosesə cavabdeh dövlət qurumuna, nə də fırıldaqçılıqla mal satan şirkətə təsiri olmur. Vətəndaşın, istehlakçının ziyan çəkməsi onları narahat etmir.
3 il zəmanətli soyuducu 3 gün işləməyib
Bu cür şirkətlər daha çox paytaxt Bakıda fəaliyyət göstərir. Bölgələrdə yaşayan əhali müəyyən səbəblərdən əsasən mərkəz Bakıya axışdığından həmin şirkətlər də əsasən bu ərazidə fəaliyyət göstərib müştəri yığmağa, Bakıda ofis və mağazalarını açmağa və insanları aldatmağa cəhd edirlər. Bu da onların cəhdinin uğurlu alınması, sadə və kasıb istehklakçının aldadılması ilə nəticələnir.
Redaksiyamıza daxil olan müraciətdə də istehlakçılar bu məsələ ilə bağlı şikayət edir. Şikayətçilər bu dəfə Bakıda fəaliyyət göstərən “Atlant” mağazasının istehlakçıları aldatdığını iddia edir. Müraciətdə bildirilir ki, elektron məişət avadanlığının satışı ilə məşğul olan bu mağazanın istehlakçılara satdıqları malların əksəriyyəti keyfiyyətsiz çıxsa da, onlar xarab mallarına cavabdeh olmur. Amma, mal satılana qədər onlar müştəriyə yalan vədlər verir, insanları şirnikləndirib öz keyfiyyətsiz mallarını satırlar. Mal alınana qədər istehlakçıya həmin mala görə cavabdeh olduqlarını, 3 il zəmanət verdiklərini bildirən mağaza rəhbərliyi mal satılandan sonra müəyyən yollarla məsuliyyətdən yayınır, insanları aldadır.
Redaksiyamıza müraciət edən Bakı şəhər sakini Anar Əhmədli bildirir ki, o da mağazada bu cür fırıldaqla aldadılıb. Şikayətçinin dediyinə görə, bu yaxınlarda adıçəkilən mağazadan 700 manat ödəməklə soyuducu alıb. Amma, nə az nə çox, 3 gün sonra soyuducu xarab olub. Əslində isə mağazadan ona həmin vaxt aldığı soyuducuya 3 illik zəmanət kartı verilib. Nəinki 3 il, cəmi 3 gün sonra soyuducunun həddindən artıq keyfiyyətsiz olması üzə çıxıb. Anar Əhmədli zənn edib ki, aldığı malın 3 il zəmanəti var və bu zəmanətə görə də ona dəymiş ziyan ödəniləcək və problem aradan qaldırılacaq. Amma, necə deyərlər, sən saydığını say, gör “Atlant” nə sayır.
Şikayətçi deyir ki, soyuducunun zay olması barədə məlumat versə də, problem aradan qaldırılmayıb: “Soyuducunu alıb pulun ödəyib, malı evə gətirdim. Quraşdırılan gün soyuducu işləsə də, 3 gün sonra xarab oldu. Zəng edib servis xidmətindən kömək istədik. Həmin gün bununla bağlı heç bir xəbər çıxmadı. 1 gün sonra servisdən usta göndərdilər. Usta həqiqətən soyuducunun işləmədiyinin şahidi oldu və bir neçə saat çalışandan sonra soyuducu işlədi. Amma, bu da çox çəkmədi, Usta yenidən soyuducunu işlək vəziyyətdə bizə təhvil verib getsə də, 1 gün sonra yenə xarab oldu”. Anar Əhmədli bildirir ki, soyuducunun xarab olması barədə mağazaya məlumat verilsə də, onlar keyfiyyətsiz malı dəyişməkdən boyun qaçırıblar.
700 manat ver soyuducu al, ömrü boyu əziyyət çək
“Atlant” mağazası tərəfindən aldadılan daha bir müştəri isə Fərman Ağayevdir. Şikayətçi iddia edir ki, bu mağazada satılan malların əksəriyyəti keyfiyyətsiz olur. Elə bu şikayətçi də mağazadan soyuducu alıb və bir müddətdir ki, özünün dediyi kimi, əməlli-başlı bəlaya düşüb: “”Atlant”ın satdığı məhsulların əksəriyyətində defekt var. Amma bunu qətiyyən qəbul etmirlər. Onlara sübut edəndə ki, soyuducu və digər avadanlıqlarında zavoddan gəlmə qüsur var, qəbul etmirlər. Sonra da aldığın avadanlığı geri qaytarmaq istəyirsən, yenə qəbul etmirlər. Aparırlar ki, düzəltsinlər. Nə düzəldə bilmirlər, nə də malı geri qaytarmırlar. Bir dəfə gəlib düzəldib gedirlər, yenə xarab olur. Daha ikinci dəfə evdə təmir aparmırlar. Mütləq malı gəlib aparıb servislərində saxlamalıdırlar. Sonra necə düzəldirlər, malın hansı hissəsini götürürlər, hansı hissəsini dəyişirlər bilinmir. Birinci dəfə soyuducunu aparanda deyirlər ki, onların malı 3 gündən 15 günə qədər servisdə saxlayıb yoxlamağa ixtiyarları var. Yayın bu isti günlərində ailənin 3 gündən 14 günə qədərə soyuducusuz qalması yəqin ki nə dərəcədə çətindi. Əgər mən 14 gün soyuducusuz qalmalı idimsə, niyə bu qədər xərc çəkirdim? Elə soyuducusuz qalan idimsə, pulum da özümdə qalmışdı. Min bir əziyyətlə pul yığıb 700 manat verib soyuducu alım, sonra da ömrü boyu əziyyət çəkməliyəm?” Şikayətçinin dediyinə görə, “Atlant” mağazasında hər dəfə onlarla istehlakçı aldadılır, onlara keyfiyyətsiz mallar satılır. Amma, nə şikayətçiləri dinləyib problemlərini həll edən var, nə də mağazanın özbaşınalığına son qoyan. Nəticədə mağaza istehlakçıları aldatmaqda davam edir, istehlakçılar da ziyan çəkməkdə və soyulmaqda.
Geri qayıt