RUSİYADAKI ERMƏNİ KONSULUNDAN BİABIRÇILIQ
24-04-2013, 11:11
Ermənilərin xislətində yalan və dələduzluq olması heç kimdə sirr deyil. Tarix boyu onların bu kimi çirkin xüsusiyyətləri barədə çoxsaylı faktlara rast gəlmək mümkündür. Lakin bu fırıldaqlarda diplomatların adlarının hallanması bu ölkənin xarici siyasət idarəsinin necə bir bərbad vəziyyətdə olduğunu göstərmiş olur.
Ermənistanı ölkədən kənarda təmsil edən diplomatik korpusda yaşanan qalmaqal erməni, hətta Rusiya mətbuatının baş xəbərinə çevrilib. Bəlli olub ki, Ermənistanın Rusiyadakı səfirliyinin konsulu vətəndaşları nəinki aldadıb rüşvət alırmış, hətta onları döyməkdən və pullarını mənimsəməkdən belə çəkinməyib. Məsələ o qədər böyüyüb ki, Rusiyadakı erməni səfirliyi xüsusi bəyanatla çıxış etməli olub. Diplomatik nümayəndəlik tələm-tələsik erməni kütləvi informasiya vasitələrində yayılın xəbərlərin həqiqətə uyğun olmadığını bəyan edib. Yayılan məlumata görə, konsul diplomatik nümayəndəlikdə Ermənistan vətəndaşı olan şəxsi döyüb, onun pasportunu, mobil telefonunu və pul kitabını alıb. Səfirliyin yaydığı bəyanatda konsulun diplomatik nümayəndəliyə gələn Jirayr Tadevosyanı döyməsi barədə xəbərin həqiqəti əks etdirmədiyi iddia edilib. “Burada söhbət Artak Akopyan adlı şəxsin dələduzluğundan gedir. Tadevosyan da bu “sövdələşmə”nin iştirakçısı olub. Uzun illər idi ki, həmin şəxs səfirlik ətrafında dələduzluq işləri ilə məşğul olur.
Səfirliyə sənəd almaq üçün müraciət edən şəxslər konsulluğa müraciət qaydalarını və öz hüquqlarını bilmirlər. Onun dələduz olduğu çoxdan faş edilib. Hər dəfə Artak Akopyan öz fəaliyyət sferasına yeni-yeni şəxslər cəlb edir”. O ki qaldı bu ilin aprel ayının ortalarında baş verən insidentə - səfirlik bəyan edib ki, səfirliyin konsul xidməti tərəfindən növbəti dələduzluq “sövdələşmə”sinin üstü açılıb. “Bu dəfə Akopyan bu əməlini Jirpayr Tadevosyan tərəfindən həyata keçirmək istəyib. Artak Akopyan biləndə ki, vətəndaş xanım Nazani A. adlı yetkinlik yaşına çatmayan qıza Ermənistana qayıtması üçün sənəd gərəkdir - ona öz köməyini təklif edir. Və bu zaman özünü səfirliyin əməkdaşı kimi təqdim edib. Tadevosyan da Akopyanın adından istifadə edərək Nazani A. ilə görüşür və ondan 7 min rubl alır. Zəruri sənədi almaq üçün həmin şəxsin adından səfirliyə müraciət edir. Amma vətəndaşın özünü şübhəli aparması nəticəsində bu dələduzluq faktının üstü səfirliyin konsulluq idarəsinin əməkdaşları tərəfindən açılır. Nazani A. səfirlinə çağırılır və vəziyyət ona başa salınır. Əvəzində ona Ermənistana qayıda bilməsi barədə sənəd təqdim edilir.
Tadevosyan dələduzluq faktının üstünün açılması ilə bağlı etiraf edib ki, bu işləri Artak Akopyanın tapşırığı ilə edib. Bu zaman ərazini tərk edərək gedən Tadevosyan burada özünün pasportunu, mobil telefonunu, hətta Arutunyan adlı şəxsə məxsus pasportu da qoyub gedib. Sənəd və mobil telefon müəyyən orqanlar vasitəsilə mövcud qaydalara uyğun qaytarılacaq. Hazırda səfirlik bu işə hüquqi don geyindirmək üçün Rusiya hüquq-mühafizə orqanlarını bu işə cəlb etmək istiqamətində işlər aparır” - deyə Ermənistan səfirliyinin yaydığı məlumatda iddia edilib. Lakin erməni nəşrləri vurğulayırlar ki, hər şey heç də səfirliyin verdiyi məlumatda göstərilən kimi deyil. Nəşrlərin əldə etdiyi məlumatda göstərilib ki, Tadevosyan konsul Qarik Meliksetyan tərəfindən döyülüb. “Konsul öz otağında 60 yaşlı Jirayr Tadevosyanı döyüb, onun mobil telefonunu alıb və içərisində 32 min rubl olan pulqabısını mənimsəyib. Və ondan tələb edib ki, bununla bağlı heç kimə məlumat verməsin. Sonra isə dərhal konsulluq binasını tərk etməyi tələb edib. Tadevosyan bir qəpiksiz və sənədsiz piyada evinə gəlib və xəstələnib. Hazırda isə ağciyər xəstəliyi diaqnozu ilə xəstəxanada müalicə alır” - deyə Artak Akopyan “Reqnum”a bildirib.
Qeyd edilib ki, hətta Moskva xəstəxanası xəstənin vəziyyətinin ağır olduğunu nəzərə alaraq, onu sənədsiz qəbul edib. Hazırda Jirayr Tadevosyan baş verən insidentə Xarici İşlər Nazirliyinin reaksiya verməsini, sənədlərinin verilməsini istəyir. O bildirib ki, əks təqdirdə, onu xəstəxanadan çıxaracaqlar.
Beləliklə, erməni diplomatın bu əməli Ermənistan xarici siyasət idarəsinin də artıq rüşvət və korrupsiya mənbəyinə çevrildiyini göstərmiş olub. Özü də bu insident Ermənistan xarici işlər naziri Edvard Nalbandyanın Moskvaya səfəri zamanı yaşanır. Yayılan məlumatlara görə, konsulluq idarəsini rüşvət obyektinə çevirən konsulun hakimiyyət dairələrində güclü dayağı var. O, məhz həmin dayaqlara arxalanaraq bu kimi əməlləri həyata keçirir. Bir faktı da qeyd edək ki, konsula bağlı yaşanan bu insident nadir hadisə deyil. Dəfələrlə Ermənistanın xarici ölkələrdəki diplomatik nümayəndəliklərinin əməkdaşlarının adı müxtəlif qalmaqallarda hallanıb. Məsələn, bir neçə il bundan əvvəl ABŞ-ın Los-Anceles şəhərindəki Ermənistan konsulluğunun 3 əməkdaşı həbs olunmuşdu. “Assoşeyted press” agentliyinin məlumatına görə, onlar miqrasiya sənədlərini saxtalaşdırmaqda ittiham olunublar. Həbs olunanlar Ermənistanın Los-Ancelesdəki keçmiş konsulu, konsulluğun əməkdaşı və immiqrasiya məsələləri üzrə hüquqşünasıdır. Bildirilir ki, onların barəsində istintaq iki ildir davam edirmiş. Amerikanın gömrük və immiqrasiya xidmətlərinin rəsmiləri bildiriblər ki, konsulluqda 1999-cu ildən bu yana xidmət edən Noriar Qalumyan konsulluğun dörd əməkdaşı ilə birlikdə ABŞ-dan deportasiya olunmaq təhlükəsi ilə üzləşən mühacirlərə Ermənistan hökuməti adından saxta məktublar satıb. Bu məktublarda göstərilib ki, Ermənistan hökuməti onlara keçid sənədləri verməyəcək. Bununla da mühacirləri deportasiya etmək mümkün olmayıb.
Məlumata görə, ittiham edilənlər azı 24 belə məktub satıblar. Məktubun qiyməti 35 min dollar olub. Qalumyan və digərləri onlara qarşı irəli sürülmüş ittihamlar üzrə 5 ilədək azadlıqdan məhrum edilə bilər. İki il bundan əvvəl ABŞ-ın şərq sahili boyunca yerləşmiş erməni icmalarında yerli polis idarəsi və ABŞ Federal Təhqiqatlar Bürosu (FTB) tərəfindən həyata keçirilən silsilə həbslər də erməni diplomatlarla bağlı idi. ABŞ Ədliyyə Nazirliyi və FTB-nin əlindəki məlumatlara görə, “Armenian Pover” adlanan erməni cinayətkar şəbəkə Ermənistan rəhbərliyindəki vəzifəli şəxslərlə əlaqədədir. Hazırda bununla bağlı məhkəmə gedir.
Geri qayıt