KOMİTƏ SƏDRİ ABŞERONDA AT OYNADIR
3-12-2011, 14:24
KƏRƏM HƏSƏNOVUN QOHUMLARI SAKINLƏRƏ DIVAN TUTUR
DİA.AZ: - Ötən gün redaksiyamıza Daşınmaz Əmlakın Dövlət Reystiri Xidmətinin Abşeron Ərazi İdarəsində baş verən özbaşınalıqlarla bağlı ilginc məlumatlar daxil olub. Adıçəkilən qurumda insanların hədsiz süründürməçiliyə məruz qaldığını və vətəndaşlara göstərilən hər bir xidmətin müqabilində onlardan qeyri-qanuni ödəniş tələb edildiyini vurğulayan mənbə, Dövlət Əmlak Komitəsinin sədri Kərəm Həsənovun qohumlarının adıçəkilən idarədə sözün həqiqi mənasında at oynatdığını qeyd edib. Mənbə Mirəkrəm Ağayev və Adəm Quliyev adlı şəxslərin K.Həsənovla olan qohumluq əlaqələrindən istifadə edərək vətəndaşlarla istədikləri şəkildə davrandıqlarını bildirib: “Adıçəkilən şəxslərin hər ikisi komitə sədrinin yaxın qohumları hesab edilir. Xüsusilə də Adəm adlı şəxs özünü komitə sədrinin Abşeron rayonundakı valisi kimi aparır. Onun işi həm vətəndaşlardan qeyri-qanuni ödənişləri yığmaq, həm də idarə rəisinin fəaliyyətinə göz qoymaqdan ibarətdir”.
Mənbənin sözlərinə görə, Abşeron Ərazi İdarəsində sənəd qəbulu üçün hər bir vətəndaşdan 100 manat məbləğində pul tələb olunur ki, bu da insanların narazılığına səbəb olur: “Vətəndaşların qəbulu çox zaman A.Quliyev tərəfindən aparılır ki, bu qəbul da insanlara 100 manata başa gəlir. Lakin vətəndaşın öz işi xətrinə ödədiyi bu pul heç də qəbul edilən sənədin təsdiqlənəcəyi anlamına gəlmir. Belə ki, qəbul şöbəsinə 100 manat verən vətəndaş sənəddə göstərilən hər sot torpaq üçün 100-150 manat arasında əlavə pul ödəməlidir ki, bu ödənişlərin də heç birinin qanuni əsası yoxdur”.
Mənbənin bildirdiyinə görə, puldan başqa heç nə düşünmək qabiliyyətində olmayan bu insanlar adi vətəndaşlar kimi şəhid ailələri, müharibə veteranlarına da heç bir güzəşt etmir, onları da digər şəxslərlə eyni səviyyədə haqsızlığa məruz qoyur: “Şəhid ailələri, müharibə iştirakçıları da mütəmadi surətdə Abşeron Rayon Ərazisində baş verən özbaşınalıqların qurbanına çevrilir, haqsızlıqlarla üzləşirlər. Onların da probleminin həlli hər kəs kimi puldan keçdiyi üçün bu insanların bəzisi öz qanuni haqlarını təmin edə bilmir və gəldikləri kimi də geri qayıdırlar. Vətəndaşların qayğısına qalan, onlara öz hüquqlarını başa salan, insanlara həqiqətən də təmənnasız xidmət edən məmurlar isə komitə sədrinin qohumları və rəhbərlik tərəfindən sıxışdırılır, son nəticədə işdən azad edilirlər. Təxminən iki-üç həftə bundan öncə hüquqşünas Camal Hümbətovun işdən uzaqlaşdırılması buna nümunədir”.
Mənbə sözügedən idarədə baş mühəndis işləyən Fazil Allahverdiyevin də proseslərdən kənarda qalmadığını qeyd edibi: “F.Allahverdiyev proseslərdə baş mühəndis deyil, baş vəzir rolunu oynayır. Qanuni sənədlərə “imtina” sözünün yazılmasında bu şəxsin rolu əvəzsizdir. Komitə sədrinin qohumlarına yarlımaq üçün əksər hallarda qanunun tələblərini qulaqardına vuran bu şəxs, insanların qınaq obyektinə çevrilən məmurlar sırasındadır”.
Mənbənin bildirdiyinə görə, adıçəkilən məmurlar tərəfindən vətəndaşlara olan ögey münasibət xeyli sayda insanı məlum qurumdan narazı vəziyyətə salıb: “Mehdiabad, Coradil, Fatmai, Digah, Məhəmmədli, Novxanı, Saray, Qobu, Güzdək sakinləri Abşeron Ərazi İdarəsində baş verən haqsızlıqlarla bağlı polis və prokurorluq orqanlarına yüzlərlə şikayət ünvanlayıb ki, bu şikayətlərin hər birində üzləşdikləri problemlər öz əksini tapıb. Lakin vətəndaşlarla münasibətdə qanunun sərhədlərini aşan məmurlar bilavasitə komitə sədri tərəfindən himayə edilir ki, bu da hüquq-mühafizə orqanlarının işini çətinləşdirir. Odur ki, son günlər narazı insanlar öz etirazlarını Prezident Aparatı qarşısında ifadə etməyi planlaşdır. Onlar belə güman edirlər ki, bu addım ölkə başçısının diqqətini cəlb edəcək və prezidentin göstərişi əsasında onların problemləri həll ediləcəkdir”.
Vəziyyətin son dərəcə dözülməz həddə çatdığını vurğulayan mənbə, proseslərin Abşeron Rayon İcra Hakimiyyətinin başçısı Zakir Fərəcovun da narahatlığına səbəb olduğunu qeyd edib: “Baş verənlər hər kəs kimi Abşeron rayonunun icra başçısı Z.Fərəcovun da narahatlığına səbəb olub. Başçısı olduğu rayonda insanların kütləvi surətdə haqsızlığa məruz qaldığını və proseslərin ciddi etirazlara səbəb olacağını görən başçı dəfələrlə Daşınmaz Əmlakın Dövlət Reystiri Xidmətinin Abşeron Ərazi İdarəsinin rəhbərliyinə öz iradlarını çatdırsa da, bu tövsiyyələrin heç bir nəticəsi olmayıb. Qolları yalnız Azərbaycan daxilində deyil, ölkə xaricində də yetərincə uzun olan K.Həsənovla mübarizə aparmaq qabiliyyətində olmayan Z.Fərəcov bu məsələdə tövsiyyə və irad səviyyəsindən uzağa gedə bilmir”.
Mənbənin bildirdiyinə görə, vəziyyətin hədsiz kritikliyi Abşeronda güclü sosial partlayışların baş verməsini qaçılmaz edir: “Rayon ərazisindəki vətəndaşların Abşeron Ərazi İdarəsi ilə bağlı hədsiz narazılığı yaxın günlərdə güclü sosial partlayışların baş verməsi ilə müşahidə oluna bilər ki, bu da vəziyyətə əl qoyulmayacağı təqdirdə hökmən reallaşacaq. Kütləvi narazılığın qarşısını almaq, bu narazılığın sosial partlayışa çevrilməməsi üçün sözügedən idarənin fəaliyyəti ciddi şəkildə təftiş olunmalı, qanunun tələblərini pozan şəxslər cəzalandırılmalı və vətəndaşların tapdanan hüquqları bərpa edilməlidir”.
Geri qayıt