NEFT PULLARININ GÖMÜLDÜYÜ YAŞIL MEYDAN
8-03-2013, 11:44
RÖVNƏQ ABDULLAYEV FUTBOL ADI ALTINDA MİLYONLARI HAVAYA SOVURUR
DİA.AZ: - Rövnəq Abdullayev AFFA-nın prezidenti "seçiləndən" sonra Azərbaycan futbolunun daha acınacaqlı vəziyyətə düşdüyü hər kəsə bəllidir. Baxmayaraq ki, futbol ictimaiyyəti Rövnəq Abdullayevə böyük ümidləri var idi. Hər kəs zənn edirdi ki, AFFA-nın yeni prezidenti sələfi mərhum Ramiz Mirzəyevdən fərqli olaraq intriqa ilə məşğul olmayacaq və bütün gücünü futbolun inkişafına yönəldəcək. Amma Rövnəq Abdullayev də bu ümidləri doğrultmadı.
***
DİA.AZ AzeriNews-a istinadən bildirir ki, Rövnəq Abdullayev futbolumuza birinci zərbəsi Avropadan 70-ci illərdə Almaniya yığmasının oyunçusu olmuş və dünya çempionu adını qazanmış Berti Foqtsu Azərbaycan yığmasına baş məşqçi gətirməsi oldu. Oyunçu kimi karyerasına son qoyandan sonra məşqçi karyerasına, 1979-cu ildə Almaniyanın milli gənclər komandasında başlayan Foqst, 1986-cı ildən etibarən əsas millidə baş məşqçinin köməkçisi, 1990-cı ildən etibarən isə Almaniya Milli futbol komandasının baş məşqçisi olub.
Onun başçılığı altında Almaniya millisi 1996-cı ildə İngiltərədə keçirilən Avropa çempionatının qalibi adını qazanıb. Lakin 1998-ci ildə, dünya çempionatının 4/1 finalında Xorvatiya millisinə böyük hesabla uduzuduqdan sonra, Berti Foqts millinin baş məşqçisi vəzifəsindən qovulub.
Daha sonralar Foqst Leverkuzenin "Bayer" klubunun, Küveyt, Şotlandiya, Nigeriya milli yığma komandalarının baş məşqçisi olduğu vaxta da eyni aqibəti yaşayıb.
Foqst 2008-ci ilin mart ayından Azərbaycan Milli Futbol Komandasının baş məşqçisi təyin edilməsi çoxlarının təəccübünə səbəb oldu. Mütəxəssislərin əksəriyyəti Foqtsun baş məşqçi təyin edilməsini səhv addım kimi qiymətləndirdilər. Lakin Rövnəq Abdullayev indiyə qədər iddia edir ki, hər şey yaxşı olacaq. AFFA-nın prezidenti hamını inandırmağa çalışır ki, Foqts Azərbaycan yığmasını Almaniya yığması ilə bir səviyyəyə çatdıracaq. Amma nədənsə bu baş vermir? Azərbaycanda digər idman növləri uğurla irəli addımlamağına baxmayaraq futbolumuz Rövnəq Abdullayev və baş məqçi Berti Foqtsun qarşılıqlı razaılaşmaları müqabilində getdikcə geriyə gedir. Bir sözlə bu adda idman növü dünyada Azərbaycanı rüsvay edib. Azərbaycan futbolunun gülünc vəziyyətə düşməsinə görə isə ARDNŞ şefinə və Avropalı baş məşqiçiyə "təşəkkür" etməyə dəyər.
***
Azərbaycan futbolunun nədənsə bəxti gətirmir. Xüsusilə də baş məşqiçilər tərəfindən. Yəqin ki, Berti Foqtsdan əvvəl Azərbaycan Milli Futbol Komandasının baş məşqiçisi Torresi xatırlayırsınız. Torres o zaman futbol ictimaiyyətinin yaddaşında dava-dalaşları ilə qaldı. Yüksək maaşla təmin olunmasına baxmayaraq Torres Azərbaycan futboluna can yandırmadı. Azərbaycan futbolu Torres üçün düşərli oldu, o milyonlar qazandı. Futbolumuz isə itirdi, günü-gündən geriyə getdi.
Azərbaycan yığması sonuncu dəfə böyük hesabla məğlubiyyətə uğrayanda Torressin vicdan hissi oyandı. O, "daha bəsdir, istefa verəcəyəm, artıq Azərbaycan xalqının üzünə baxa bilmirəm" deyib pullarını da götürüb Braziliyaya yola düşdü. O zaman AFFA-nın mərhum prezident Ramiz Mirzəyev isə "Azərbaycan xalqı kimdir ki" deyə Torresi bu addımı atmaqdan çəkindirməyə çalışsa da buna nail ola bilmədi.
***
Dünya futbolunun ünlü simalarından olan baş məşqiçi və futbolçuların bir çoxunun adını çəkmək olar. Lakin bu Azərbaycan futbolu üçün önəmli deyil. Çünki Rövnəq Abdullayevə bu sərf etmir. Ona görə də Avropadan Foqts kimi bir dələduz Azərbaycan yığmasına baş məşqçi təyin edilib. Onun ARDNŞ şefi ilə xüsusi razılığı var. Bu barədə "AzeriNews.org"u məlumatlandıran futbol ekspertləri hesab edir ki, Rövnəq Abdullayev Foqtsla şərikli futbol biznesi qurub. Adətən Azərbaycan futbol klublarına transfer olunan lazımsız futbolçuların axtarıb-tapılmasında Berti Foqtsun əməyi var. Dünyanın heç bir futbol klubunun marağında olmayan futbolçular Azərbaycan futbol klublarına yüksək məbləğdə transfer olunurlar. Bundan isə Rövnəq Abdullayevlə Berti Foqts külli miqdarda vəsait əldə edirlər. Milyonlarla dollarlıq müqavilələrə imza atan əcnəbi futbolçulara müqavilədə göstərilən məbləğ çatmır. Lazımsız əcnəbi futbolçulara isə bu da sərf edir. Ən azından ona görə ki, onlar müəyyən məbləğdə pul qazana bilirlər. Elə bu səbəbdən fəallıq göstərmirlər. Ümumiyyətlə, Rövnəq Abdullayevin Azərbaycan futboluna qarşı münasibəti başa düşülən deyil. Təsəvvür edin ki, Azərbaycanda uşaq futbolunun inkişafına külli miqdarda vəsait ayrılıb. Amma uşaq futbolunda inkişaf gözə dəymir. Bilirsiniz niyə? Ona görə ki, uşaq futboluna ayrılan vəsaitlər AFFA-nın prezident Rövnəq Abdullayevin cibinə daxil olur. Görünür, Rövnəq Abdullayevi futbolun inkişafı yox, sərvət toplamaq maraqlandırır.
Rövnəq Abdullayev futboluna can yandıran iş adamlarına qarşı da savaş açıb. Məsəl üçün qeyd edək ki, "Palmali" şirkətlər qrupunun prezidenti, iş adamı Mübariz Mənsimov Lənkəranda milyonlarla dollar sərf edərək FİFA-nın standartlarına uyğun stadion inşa etdirib. Bundan əlavə "Xəzər-Lənkəran" kimi bir futbol komandası yaradıb. Amma Rövnəq Abdullayev hər vəchlə ona mane olur. Müxtəlif vasitələrlə Mübariz Mənsimovun futbolun inkişafına yönəlik addımlarının qarşısını almağa çalışır.
***
İndi Azərbaycan yığmasının baş məşqçisi Berti Foqtsun olmağına baxmayaraq 67 yaşlı Avropalı qoca Azərbaycan futbolunun inkişafında maraqlı deyil. Fikrimizcə, bu gün Azərbaycan yığmasına futbolun incəliklərini dərindən bilən bir mütəxəssis lazımdır. Dünyada və elə Azərbaycanda da belə mütəxəssislər var. Amma nə edəsən ki, Rövnəq Abdullayevin başı yuxarıda qeyd etdiyimiz futbol biznesindən əldə etdiyi sərvət toplamağa qarışıb. AFFA prezidentinin şəxsi ambisiyaları üzündən Azərbaycan futbolu demək olar ki, məhvə doğru gedir.
Amma inanırıq ki, futbol ictimaiyyəti bunun qarşısını alacaq və Azərbaycan futbolu Berti Foqtslardan təmizlənəcək.
Geri qayıt