MÜXALİFƏTÇİ KEÇİD HÖKUMƏTİNƏ BAŞÇILIQ EDƏCƏK
28-11-2011, 11:15
ÜSYAN ÖZ NƏTİCƏSİNİ VERDİ
Yəmən prezidentinin səlahiyyətlərini icra edən vitse-prezident Əbd-Rəbbihi Mənsur Hadi yeni sərəncam verib. “Media forum” saytının məlumatına görə, noyabrın 27-də imzalanmış sərəncamla müxalif lider Məhəmməd Basindva baş nazir təyin olunub.
Vaxtilə xarici işlər naziri postunu tutmuş Məhəmməd Basindva 2001-ci ildə hakim partiyadan çıxaraq müxalifətə keçib. Bu ilin əvvəlindən başlayan Yəmən üsyanının liderlərindən olan Məhəmməd Basindva keçid hökuməti quracaq. Həmin hökumət 2012-ci il fevralın 21-də keçiriləcək prezident seçkisinədək səlahiyyətli olacaq.
1978-ci ildən prezident kürsüsünü tutan Əli Abdulla Saleh ötən həftə hakimiyyətin müvəqqəti hökumətə təhvil verilməsini əks etdirən sənədləri imzalayıb. Mərasim noyabrın 23-də Səudiyyə Ərəbistanının paytaxtı Ər-Riyadda keçirilib. Hakimiyyətdən getməsi müqabilində Əli Abdulla Saleh toxunulmazlıq hüququ qazanıb.
Yəməndə yanvar ayından başlayan xalq üsyanında 1500-dən çox adam həlak olub.
Geri qayıt