PORTAL RƏHBƏRİ ANS-Ə CAVAB VERDİ
8-12-2012, 11:31
balANS POZULUB
Əslində, ANS TV haqqında yazmaq və ya fikir bildirmək niyyətim yox idi. Heç bu yazının yazılmasına zəmin olacaq bir əlahiddə hadisə də baş verməmişdi. Amma günlərin birində balANS pozuldu. Və bu pozuntu nəticəsində məlum oldu ki, ölkənin eşşək boyda telekanalı ağına-bozuna baxmadan, heç bir fakt-sübut ortaya qoymadan günahkar axtarmağa başlayıb. Üstəlik, «tapıb» da.
Hali-qəziyyə belə olub ki, ANS-in efirindən «Tribuna» İnformasiya Agentliyi «reket» kimi təqdim olunub. Hərçənd bu xəbər gəlib bəndeyi-həqirinizə çatanda inanmadım. Çünki belə bir iddia ilə ANS-in çıxış edə biləcəyinə nə inandım, nə də bu qədər qeyri-ciddi ola biləcəklərini düşündüm. Amma məlum oldu ki, deyilənlər həqiqət imiş. Özü də Qənirə Ataşovanın dilindən deyilmiş bir şəkildə.
Əvvəla, ANS-in peşəkar bir telekanal olduğunu düşünürdüm və osmanlı türkləri demiş, bu xəyalım suya düşdü. Məlum oldu ki, TV-nin ekranında adamın gözünü çıxaracaq boyda hərflərlə yazılmış «Qərəzsiz», «Vicdanlı» sözləri boş və görüntü üçündür. Ona görə ki, azca qərəzi və vicdanı qismən yerində olan hər hansı bir KİV tia.az-ı «reket» deyə çağırmaz. Çünki bizim xəbər portalımız əsla və əsla başqalarının cibinə göz dikmədi. Əslində, saytı işlətmək və onu yaşatmaq üçün ANS-dən fərqli olaraq bizə milyonlar, minlər belə lazım deyil. Çünki bu sayt dostların yardımları və beyinlərinin məhsulları sayəsində ayaqda dayanır. Və ANS-in rəhbərlərindən fərqli olaraq, biz əsla və əsla başqalarının əlinə baxmırıq və belə bir niyyətimiz də yoxdur. Əksinə, həmişə çalışmışıq ki, istənilən bir hadisəyə, yazıya və məlumata vicdanla yanaşaq və qərəzsiz olaq.
Fəqət, ANS-də balANS-ın pozulması başadüşüləndir. Bir zamanlar, Fərhad Əliyevin yanandı, daha sonra bir başqasının qucağında əyləşməyi adət halına gətirənlər üçün belə şeylər normaldır. Və bir də meydanda haqqını tələb edənləri «quduz kütlə» deyib çağıran bir TV-dən nə obyektivlik, nə də vicdan gözləməyə dəyməz.
Qaldı, bu TV-nin və onun başında duranların qiymətini deputat Cəlal Əliyev yaxşı verib. Hərçənd bu sözləri təkrarlamaq fikrində deyiləm. Çünki balANS-ı pozulmuşlardan fərqli olaraq, həmin fikrinlərin təkrarlanmasını etik hesab etmirik. Və bir də onu bilirik ki, hətta 30 belə köşə yazsaq belə, yenə də Cəlal Əliyevin ANS və Mirşahin haqqında dediyinə üstün gəlməyəcək. Bir sözlə akademikin Milli Məclisdəki tarixi çıxışı ANS və Mirşahinə verilən dəqiq və qərəzsiz qiymət idi.
Veriliş efirə gedəndən sonra dostlarımdan biri telefon açdı. Gülə-gülə dedi ki, «Qardaş, hazırlaş “içəri” getməyə. Axı, belə vəzifələr Mirşahinə həvalə olunur. İçəri yola salınanda mütləq ondan ... istifadə olunur». Doğrusu, bu sözlər məni bir xeyli düşündürdü və bir qədər bildiyim və yaşadığım tarixə ekskursiya elədim. Nəhayət, barmağı dişlədim ki, ey dadi-bidad dostum düz deyirmiş.
Nəhayət, biz əsla kimsənin haqqını yemədik. Biz əsla, kimsənin haqqını da tapdalamadıq. BalANS-ı pozulanlardan fərqli olaraq, öz halal zəhmətimizlə yaşadıq. Nə kimsənin əlinə baxdıq, nə də sədəqə diləndik. Nə kimsənin sifarişi ilə yazdıq, nə də kimsələrin əlinin altının uşağı olduq. Bizim adımızı bu illər ərzində heç bir yerdə balANS-ı pozulanlardan fərqli olaraq, biabırçı bir şəkildə çəkmədilər.
ANS-in rəhbərliyində oturanlara son sözüm budur: Obeyktiv olmaya bilərsiz. Çünki bəzi şeyli görməzdən gəlməyiniz adət halını alıb. Qərəzsiz də olmaya bilərsiz. Çünki zaman içində içinizdəki kin və küdurətin efirə yansıdığını çox gördük. Amma zərrəcə vicdanlı olun. Hər nə qədər ehtiyacınız olsa belə, yenə də onu kimlərinsə haram pullarına satmayın. Axı, vicdanı pulla almaq olmur. Bir də çevrilib ətrafınıza və özünüzə baxın. Görün, hansı bataqlığın içindəsiz. Azca ayılın və dibinizdəki zərrəcə də olsa qalmış vicdanınızı silkələyin. O zaman adınızı başqasına qoymaq əvəzinə, utandığınızdan ölüb-yerə girmək istəyəcəksiniz. Təbii ki, vicdanınız olarsa.
Tia.az saytının baş redaktoru Əlişir Əhəd
Geri qayıt