NƏQLİYYAT NAZİRİNİN FÖVQƏLARZULARI
9-11-2011, 14:38
ZİYA MƏMMƏDOVUN GİZLİ PROJESİNİN DETALLARI
DİA.AZ: - Nəqliyyat naziri Ziya Məmmədov hakimiyyətdəki mövqelərini möhkəmləndirdikcə iddiaları da artır. Əldə etdiyimiz məlumatlara görə, "Azal"ın prezidenti Cahangir Əsgərovla Xəzər Dəniz Gəmiçiliyi İdarəsinin(XDGİ) rəisi Aydın Bəşirovu küncə sıxışdıran nəqliyyat naziri artıq Bakı Metropolitenini də ələ keçirmək istəyir. Oxucuların diqqətinə çatdıraq ki, "Azal" və XDGİ Nəqliyyat Nazirliyinin tərkibində olsalar da, həm Cahangir Əsgərov, həm də Aydın Bəşirov hər zaman özlərini müstəqil aparıblar. Hətta o səviyyədə ki, Nazirlər Kabinetində İlham Əliyevin sədrliyi ilə keçirilən müşavirələrdə Cahangir Əsgərovla Aydın Bəşirov da nazirlərlə yanaşı əyləşib. Lakin oktyabrın 24-də dövlət başçısının sədrliyi ilə Nazirlər Kabinetinin 2011-ci ilin 9 ayının yekunlarına həsr olunmuş müşavirədə hər iki məmur görünmədi. Həm "Azal"ın, həm də XDGİ-nin fəaliyyəti ilə bağlı Ziya Məmmədov məlumat verdi. Bununla da aydın oldu ki, artıq nəqliyyat naziri rəqiblərinə yerini göstərə bilib.
Məlumatlarda deyilir ki, bundan sonra Ziya Məmmədov Bakı Metropoliteni ilə bağlı iddialarını "yuxarılar"ın diqqətinə çatdırıb. Nəqliyyat naziri metropolitenin rəhbərlik etdiyi qurumun tərkibinə daxil edilməsini nəqliyyatda vahid kart sistemilə əsaslandırıb. Nazir hesab edir ki, vahid kart sisteminə keçid metropolitenin də Nəqliyyat Nazirliyinin tərkibinə daxil edilməsi zərurəti yaradır. Xəbərdə deyilir ki, nəqliyyat naziri Ziya Məmmədov metronun onun başçılıq etdiyi nazirliyin tərkibinə verilməsinin zəruriliyinə prezidenti inandıra bilib və bu barədə qərarın tezliklə qəbul olunacağı gözlənilir.
Məlumata görə, nəqliyyat naziri metronu ələ keçirmək uğrunda çıxdan mübarizə aparırmış. Metro hazırda dövlət tərəfindən ayrılan dotasiyalarla işləsə də orada iri pullar dövr edir. Hər il yeni metro stansiyalarının tikintisi, yeni vaqonların ayrılması, köhnələrin təmiri üçün dövlət büdcəsindən iri həcmdə vəsaitlər ayrılır. Təkcə bu il üzrə dövlət investisiya proqramında Bakı Metropoliteninə 164 milyon 300 min manat vəsait ayrılması nəzərdə tutulub. Digər tərəfdən metro stansiyalarının keçidlərindəki ticarət köşkləri yaxşı gəlir mənbəyidir. Məlumdur ki, Bakıda Nəqliyyat Nazirliyi tərəfindən inşa edilən yeraltı keçidlərdəki ticarət mərkəzləri Z.Məmmədovun "ZQAN" şirkətinə məxsusdur. Bu şirkətə nazirin oğlu rəhbərlik edir. Həmin keçidlərdəki ticarət köşkləri yüksək qiymətlərlə icarəyə verilib. Ancaq metro stansiyalarında icarə haqları nisbətən aşağı olduğundan ticarətçilər ora axışır. Belə görünür ki, nəqliyyat naziri metronu da öz tabeçiliyinə keçirməklə stansiyaların giriş-çıxışında mövcud olan ticarət nöqtələrini də ələ alacaq. Bildirilir ki, Bakı Metropoliteninin Nəqliyyat Nazirliyinin tərkibinə verilməsinin zəruriliyini əsaslandırmaq üçün digər ölkələrin təcrübəsinə də istinad edilir. Məsələn, Rusiyada metropoliten Nəqliyyat Nazirliyinin tərkibindədir.
Bu günlərdə isə prezident tərəfindən Nəqliyyat Nazirliyinin tərkibində yeni Dövlət Avtomobil Nəqliyyatı Xidmətinin yaradılması barədə sərəncam verilib. Həmin xidmətin əsasnaməsindən məlum olur ki, o nəqliyyata dair demək olar bütün məsələlərin tənzimlənməsi ilə məşğul olan nəhəng qurum olacaq. Bakı Metropoliteninin Nəqliyyat Nazirliyinin tərkibinə verilməsi isə bu nazirliyi daha da "şişirdəcək". Beləliklə də ölkədə FHN-dən sonra yerin altına və üstünə, havaya və quruya nəzarət edən yeni super-nazirlik meydana çıxacaq.
Bakı Metropoliteninin Ziya Məmmədovun nəzarətinə verilməsi nəqliyyat nazirinin biznes imperiyasının həddən artıq böyüməsi demək olacaq. Çünki bu gün metro həm də iri biznes strukturudur. Təkcə metronun əhəmiyyətli reklam bazarı olması milyonlarla manat gəlir deməkdir. Biz hələ onun keçidlərinin ticarət mərkəzlərinə çevrilməsini demirik.
Nəqliyyat nazirinin metor sevdası isə yeni yaranan istək deyil. Nazir əvvəllər də öz nəzarətində olmayan metropolitenin işlərinə müdaxilə edib. Böyük layihələrin icraçısı və həmçinin bu layihələrdə böyük korrupsiyalara imza atan nəqliyyat naziri Ziya Məmmədov yüzminlərlə insanın rahatlığını təmin edəcək bir layihəyə son qoyub. Səbəb yenə də nazirin biznes maraqları olub. Söhbət Bakı-Sumqayıt metropoliten xəttindən gedir. Bakı Metropolitenin rəisi Tağı Əhmədov 2008-ci ildən əvvəl Sumqayıta metro xəttinin çəkilməsi ilə bağlı fikir bildirmiş, 2008-ci ildə belə bir layihənin olmadığını, 2009-cu ilin noyabrında isə metro xəttinin Avtovağzaladan Xırdalana, Xırdalandan Sumqayıta olacağını demişdi. Amma sonradan məlum oldu ki, Sumqayıt və aeroport istiqamətində metro xətti çəkilməyəcək. Metropoliten rəhbərliyi bunu müxtəlif bəhanələrlə əsaslandırsa da əslində adıçəkilən metro xətlərinin ləğv edilməsinin arxasında başqa məqamlar durur. Belə ki, metro stansiyalarının sayının artırılması Ziya Məmmədovu ciddi narahat etməyə başlayıb. Nəqliyyat nazirinin narahatlığına səbəb olan amil isə metronun onun avtobuslarının sərnişinlərini azaldacağıdır. Məsələ ondadır ki, istər bütövlükdə ölkədə, istərsə də paytaxtda avtobus-marşrut xidmətləri məhz Z.Məmmədovun inhisarındadır. İctimai nəqliyyat xidməti göstərən bütün şirkətlər nazirin oğlu Anar Məmmədovun kurasiyasındadır. Bir sözlə, nəqliyyat sektorunun rəsmi və qeyri-rəsmi yeganə sahibi Z.Məmmədovdur. Belə olan halda daha ucuz və sərfəli nəqliyyat növü olan Bakı Metropoliteninin öz stansiyalarının sayını artırması təbii ki, nəqliyyat nazirinin maraqlarına uyğun deyil.
Məlumatlara görə nazir hələ metronun Beynəlxalq Avtovağzala qədər uzanmasına etiraz edirmiş. Yeni tikilməyə başlayan "Avtovağzal" metro stansiyası iki məmuru üz-üzə qoyub. Xəbəri redaksiyamıza verən mənbənin sözlərinə görə, Beynəlxalq Avtovağzala çəkilən metro hələ avtovağzal inşa edilən zaman tikilməli imiş. Lakin nəqliyyat naziri Ziya Məmmədov buna qarşı çıxıb və proses dayanıb. Bir neçə ildən sonra isə Bakı Metropoliteninin rəisi Tağı Əhmədov arzusunu reallaşdıra bilib. "Avtovağzal" metro stansiyasının tikilməsi nəqliyyat nazirini külli miqdarda qazancdan məhrum etmiş olacaq. Bunu gözəl başa düşən Z.Məmmədov Bakı-Sumqayıt metro xəttinin tikintisini dayandırmaqla növbəti biznes zərbəsindən yayınmış olur. Amma nəticədə zərbə yenə sadə vətəndaşa dəydi...
Geri qayıt