QƏRİB MƏMMƏDOVUN «KORRUPSİONER OVU»
2-11-2011, 16:34
KOMİTƏ RƏHBƏRİNİ GORANBOYA HANSI TELLƏR BAĞLAYIR?
DİA.AZ: - Bu ilin fevral ayının 7-də Dövlət Torpaq və Xəritəçəkmə Komitəsinin rəhbəri Qərib Məmmədov da həmin ərəfədə startı verilən və az-qala bütün dövlət strukturlarının cəlb olunduğu antikorrupsiya tədbirlərinə öz töhşvəsini verdiyini bəyan etdi. Qərib Məmmədov bildirdi ki, həmin tarixdən etibarən onun rəhbərlik etdiyi DTXK-də korrupsiyaya qarşı mübarizə üzrə komissiya yaradılıb və “qaynar xətt” fəaliyyət göstərir.
“Vətəndaşlar üzləşdikləri neqativ hallarla bağlı həm komissiyaya, həm də “qaynar xətt”ə müraciət edə bilərlər. Məqsədimiz korrupsiya və özbaşınalığa səbəb olan amilləri kəsməkdir”. Bunu da Qərib Məmmədov söyləmişdi və əminliklə bildirmişdi ki, artıq bələdiyyələrin özbaşına torpaq satmasına son qoyulub: “Bilirsiniz ki, artıq torpaqlar hərraclarda satılır”.
Amma heç kimə sirr deyil ki, Azərbaycanın demək olar ki, bütün bölgələri nazirlər, komitə rəhbərləri, millət vəkilləri tərəfindən bölünüb. Hər kəs bilir ki, filan bölgə filan nazirə aiddir və burada yalnız o nəzarət edə bilər. Bir sözlə, hər bir sahənin nəzarəti olduğu kimi rayonların da nəzarətçiləri var. Hörmətli oxucular dünən axşam saatlarında aldığımız məlumat çox maraqlı olduğu üçün sizlərə də çatdırırıq.
Belə ki, Goranboydakı etibarlı mənbədən aldığımız məlumata görə, sən demə, Goranboy rayonu Dövlət Torpaq Komitəsinin rəhbəri Qərib Məmmədovun nəzarətində imiş. İstədiyi qədər torpaq satan, istədiyi obyekti burada çox asanlıqla ucaldan Qərib Məmmədovu Goranboya bağlayan tellər barədə bir qədər sonra.
Hələliksə hörmətli komitə rəhbərinin rayondakı iş fəaliyyətindən danışaq. Məlumata görə, rayonda aparılan tikinti, abadlıq işləri komitə rəhbərinin nəzarəti altında həyata keçirilir və onun icazəsi olmadan bir addım belə atıla bilməz. Tikinti, abadlıq işlərinə də öz adamlarını nəzarətçi təyin etdirən Qərib Məmmədov bu şansdan istifadə edərək, özü üçün çox bahalı obyektlər də tikdirməkdən çəkinmir. Bütün bunlar azmış kimi, dövlət hesabına tikilən, dəyəri milyon manatlarla ölçülən yeni tikililəri satmaq üçün yollar axtarır.
Belə ki, etibarlı mənbənin məlumatına görə, Qərib Məmmədov bu dəfə satmaq üçün rayonda fəaliyyət göstərən və dövlət balansı hesabına tikilən "Goranboy Hotel"i hədəfə alıb. Məlumata görə, komitə sədri hoteli 5 milyon manata satmağa çalışır. Etibarlı mənbə onu da qeyd edir ki, bu hotelin avadanlıqları xarici ölkələrdən gətirilib və hotel çox yüksək standartlara uyğun təmir olunub. 10 hektara yaxın ərazisi olan hotelin yerləşdiyi məkan isə ən bahalı ərazi sayılır.
Lakin mənbə onu da bildirir ki, komitə sədrinin iştahası bununla küsmür. Mənbə əlavə edir ki, hazırda rayonda Naftalanda məskunlaşan məcburi köçkünlər üçün 15 binanın tikintisi nəzərədə tutulur ki, artıq o binalardan 5-nin açılışı olub. Bildirilir ki, bu işlərə Qərib Məmmədovun adamı Qulam adlı şəxs rəhbərlik edir. Mənbə bildirir ki, Qərib Məmmədov bu binalara da göz dikib və tikinti işlərinin tamamlanmasını gözləyir.
Qaldı ki, Qərib Məmmədovu Goranboya bağlayan tellərə mənbəmiz bu barədə də ciddi bilgilərə malikdir. Sadəcə onu deyək ki, komitə sədrinin bu rayona doğma edən ciddi səbəblər var. Yəni rayonla Məmmədovun yaxın qohumluq əlaqələri mövcuddur. Hətta o da bildirilir ki, 30 illik təcrübəsi olan Qərib Məmmədovu məlum posta qədər gətirib çıxaran "bazarkom" Şükufə xanımın komitə sədrinə dəstək durması, canfəşanlıq etməsi də təsadüfi deyil.
İndi isə gələk yuxarıdakı xatırlatmamıza. Yəni Qərib Məmmədovun korrupsiya ilə mübarizə üçün komissya yaratmasına. Hər halda, yuxarıda sadalanan faktlar da sübut etdi ki, əslində özü Ən böyük korrupsioner olan bir komitə rəhbərinin korrupsiya ilə mübarizəsnin hər hansı effektinin olması qeyri-mümkündür. Və bu belə də oldu. Gözlənilənlər özünü doğrultdu. Fevral ayının 7-dən etibarən DTÇK-də yaradılan korrupsiya ilə mübarizə komissiyası hansısa korrupsiya faktının aşkara çıxarılması istiqamətində bir addım belə atmadı. Hər halda, kimsə iddia edə bilməz ki, cənab Qərib Məmmədovun rəhbərlik etdiyi struktur aydan arı, Sudan durudur…
Bu məsələ ilə bağlı redaksiyamıza danışan mötəbər qaynağın sözlərindən məlum olur ki, Qərib Məmmədov hətta özü belə bir bir komissiyanın yaradıldığını unudub: «Çünki 7 fevral tarixində bu günə kimi komissiya bir dəfə də olsun yığışmayıb, iclas keçirməyib. «Qaynar xətt» isə simvolik mahiyyət daşıyır. Çünki edilən müraciətlərə təxminən eyni cavablar verilir: «Baxarıq», «Araşdırarıq», «Məsələ diqqətimizdədir». Belə olan şəraitdə isə Qərib Məmmədovun hansısa addımı atmaması heç də təəccüblü deyil».
Mənbə bildirir ki, Qərib Məmmədov «artıq bələdiyyələr torpaq sata bilmir» şəklində açıqlama verməklə yeni ortaqlarının adını da nişan vermiş oldu: ƏDLİYYƏ NAZİRLİYİ. Məlum olduğu kimi, torpaqların satışı ədliyyə nazirliyinin müvafiq qurumlarının nəzarəti altında hərraca çıxarılır. Bu barədə aldığımız informasiyada isə qeyd olunur ki, artıq bələdiyyələrin torpaq satışı biznesindən uzaqlaşdırılması nəticəsində Qərib Məmmədov da Fikrət Məmmədovun idarəsi ilə şərikli torpaq alveri ilə məşğuldur.
Mənbənin bildirdiyinə görə, DTXK-nin bu günə qədər korrupsiya ilə mübarizəyə hər hansı tövhə verə bilməməsi də onun rəhbərlik etdiyi kadr bazasına münasibəti ilə bağlıdır: «Qərib Məmmədov kənar bir adamı yaxın da buraxmır. Başına yığdıqları ya qohumları, ya dostları, ya da qohumlarının dostlarıdır. Kənar bir şəxslə çalışmayan Qərib Məmmədovun bu gün bir nəfəri belə «korrupsioner» adı altında qurban verməsi qeyri-mümkündür. Məsələn, Misir Mərdanov heç olmasa Orxan Kərimovu qurban Verdi. Yəni qurbanlıq fiqur tapdı. Amma Komitə rəhbərinin belə bir namizədi də yoxdur».
Geri qayıt