Ermənistan hakim partiyasının iclası niyə Paşinyansız keçdi?..
Bu gün, 10:18
Dünən – noyabrın 15-də Ermənistanın hakim “Vətəndaş sazişi” partiyasının iclası baş nazir Nikol Paşinyan olmadan keçirilib.
Moderator.az xəbər verir ki, “Hraparak” nəşrinin yaydığı məlumata görə, Ermənistanın Dövlət Gəlirləri Komitəsinin sədri Rustam Badasyanın iştirak etdiyi iclasda Komitənin fəaliyyəti müzakirə edilib.
Maraqlıdır ki, Paşinyan niyə “VS”-in iclasında iştirak etməyib. O, yalnız Ermənistanda olmayanda və ya ezamiyyətdə olanda həmin iclaslarda iştirak etmir.
Erməni nəşrinin yazdığına görə, hakim partiyadan bu barədə tutarlı izahat verilməyib.
“Mənbəmiz zarafatla dedi ki, yəqin ki, baş nazirin təraş vaxtıdır və bu, partiyanın iclasında iştirak etməkdən daha vacib olub”, - deyə Ermənistan qəzeti yazır.
***
Ermənistan baş naziri bəlkə də ABŞ-də Trampın hakimiyyətə gəlişindən sonra radikal dəyişikliklərə hazır olduğunu ifadə etməyə çalışıb...
"Uğurlu kişilər bir neçə səbəbə, o cümlədən orta yaş böhranına görə xarici görünüşlərini dəyişməyə başlaya bilərlər".
Moderator.az xəbər verir ki, klinik psixoloq Stanislav Samburski Life.ru saytına Ermənistanın baş naziri Nikol Paşinyanın yeni imicini şərh edərkən belə deyib.
“O, yəqin ki, xarici görünüşünü bu qədər tez dəyişən yeganə dövlət xadimidir. Az sayda tanınmış sima köklü, radikal dəyişikliklərə hazırdır”.
Ekspert ABŞ-ın yeni seçilmiş prezidenti Donald Trampı misal çəkib, o, tez-tez qeyri-kamil saç düzümünə görə tənqid olunur və bu, onun "vizit kartı"na çevrilib. Psixoloq qeyd edib ki, siyasi karyerası boyu eyni görünən Almaniyanın keçmiş kansleri Angela Merkel kimi siyasətçilər heç vaxt formalaşmış imicini dəyişmirlər.
Samburski əlavə edib ki, İsrailin baş naziri Benyamin Netanyahuya bənzəyən Paşinyana münasibətdə imicə ağlabatan münasibətin arxa plana keçdiyini güman etmək olar.
Onun fikrincə, xarici görünüş tanınma və dəstək gətirən bir aktiv kimi qəbul edildikdə, imicdəki dəyişikliklər peşəkar fəaliyyətdəki uğursuzluqları göstərə bilər.
“Psixoloji nöqteyi-nəzərdən iş adamında və ya məmurda xarici dəyişikliklər insanın başına gələn problemlərin öhdəsindən gələ bilməməsinin siqnalı ola bilər, imicdə dəyişiklik isə onun həyatının ən azı bir aspektini nəzarətə götürmək cəhdidir. ” ekspert paylaşdı.
Qeyd edək ki, Nikol Paşinyan daha əvvəl öz telegram-kanalında xarici görünüşü ilə bağlı dəyişiklikləri dərc edib. Ermənistanın baş naziri kadrda saqqalsız və bığsız görünüb. Sosial şəbəkələrdə çoxları onu israilli həmkarı Netanyahu ilə müqayisə etməyə başlayıb.
P.S. Psixoloqun sözlərindən belə çıxır ki, Paşinyan bəlkə də ABŞ-də Trampın hakimiyyətə gəlişindən sonra radikal dəyişikliklərə hazır olduğunu ifadə etməyə çalışıb...
Geri qayıt