Nazir suallardan yayınır, amma faktlardan yayınmaq olmaz...
16-11-2015, 08:40
DİA.AZ: - Redaksiyamıza Səlim Müslümovla bağlı ilginc iddiaların yer aldığı və daha çox təəssürat xarakteri daşıyan bir məqalə göndərilib. DİA.AZ olaraq məqalənin oxucu marağına səbəb olacağını təxmin edərək diqqətinizə çatdırırıq:
"Jurnalist Mirşahin Ağayevin Əmək və Əhalinin Sosial Müdafiəsi naziri Səlim Müslümodan aldığı müsahibəyə yəqinki çoxları baxıbdır. Müsahibə boyu Səlim Müslümovun hansı vəziyyətə düşdüyünü görməmək mümkün deyil.
İndiyə qədər Səlim Müslümov elə bilirdi aparat rəhbəri Əjdər Cəbiyevi qabağa verib bütün çirkin işləri ona gördürəcək özü də çıxıb gözdən pərdə asmaq üçün pafoslu çıxış edəcək və hamı ona inanacaq. Onun bu düşüncəsi həmin müsahibədə darmadağın oldu.
1. Səlim Müslümov dediklərində səmimi deyil, ancaq iz itirmək və vaxt udmaqla məşğuldu.
2. Səlim Müslümov nazir təyin olunandan bu günə qədər ünvanlı sosial yardımda rüşvət zərrə qədər də olsa azalmayıb və əksinə, birazda artıb. Yardım kartları həmişəki kimi 6-8 ay ƏSMM-lərin işçilərində olur. Təkcə Bakının Yasamal rayonunda günü bu gün də 1000-dən yuxarı kart Sosial Müdafiə Mərkəzinin işçilərindədir. Bu barədə Səlim Müslümova dəfələrlə yazılıb və bunun üzə çıxarılmasının asan yolu da göstərilib. Ona təklif olunub ki, əgər dediklərində səmimisənsə onda mərkəzə qəfil yoxlama göndərilsin və yardım təyin olunan vətəndaşlara zəng edib vətəndaşlardan tələb olunsun ki, yardım kartını gətirib mərkəzdə göstərsin. Kart mərkəzin işçisində olduğu halda vətəndaş bunu edə bilməyəcək. Bu məsələnin ən asan yolu budu. O isə bunu etmir. Kaş jurnalis ondan soruşardı: sizə belə bir təklif olunub niyə onu tətbiq eləmirsiz? Çox maraqlıdı buna nə cavab verərdi.
3. 768 işçini işdən çıxardığı ilə öyünür. Kaş jurnalis ona sual edərdi: 768 işçi çıxarmısız bəs həmin 768 işçinin yerinə kimləri işə götürmüsüz? Dövlət Qulluğu Məsələləri üzrə Komissiya xətti ilə müsabiqə elan edib müsabiqədən keçənləri yoxsa nazirliyin aparat rəhbəri Əjdər Cəbiyevin əli ilə qohum və tanışları müqavilə ilə? Bakının 11 rayonunda ƏSMM-lərdən həm direktorları həm də müavinləri işdən çıxarıb. Direktorlar heç, özü təyin edir. Müavinlər isə Dövlət Qulluğu Məsələləri üzrə Komissiyasından keçməlidirlər. Görün Əjdər Cəbiyev nəcə saxta yol icad edib. Öz adamlarını həmin yerlərə yerləşdirmək üçün Bakıda bir yerə belə Dövlət Qulluğu Məsələləri üzrə Komissiya xətti ilə vakansiya vermədilər. Ona görə ki, birdən bir savadlı insan da həmin yerə sənəd verər və onlar öz adamlarını keçirə bilməzlər. Nə etdilər? Əvvəl öz adamlarını müqavilə ilə həmin yerlərə işə götürdülər sonra Respublikanın ən ucqar rayonundakı yeri müsahibəyə çıxartdılar və həmin adamları həmin müsahibəyə yönəltdilər ki, heç bir rəqibləri olmasın sonra da Bakıda işlədiyi vəzifəyə rəsmiləşdirdilər. Ya da öz adamlarını müqavilə ilə işə götürdükdən sonra yeri ümumi müsahibəyə deyil, ancaq daxili müsahibəyə çıxarırlar ki, başqaları sənəd verə bilməsinlər. Bütün bunlar Dövlət qulluğu haqqında qanunun kobud pozulmasıdır və cinayətdir. Məsələn, Bakının Yasamal rayon ƏSMM-nin direktor müavini 2014-cü ilin oktiyabr ayında Yardımlı rayonuna elan olunan müsahibədə iştirak edib və Yasamal rayon ƏSMM-yə rəsmiləşdirilib. Budur Səlim Müslümovun kadr siyasəti. Kaş jurnalist Səlim Müslümovdan soruşardı: kadr işini niyə belə aparırsız? 2013-cü ildə təzə nazir təyin olunanda təkcə Bakı şəhərindən 70 nəfəri işdən çıxardı cəmi 16 nəfəri Dövlət Qulluğu Məsələləri üzrə Komissiyasından keçəni işə qəbul elədi. Onu da mətbuatı çağırıb elə şou düzəltdi ki, qoy desinlər Səlim şəffaf işləyir. Ancaq özünü reklam elətdirməklə məşğul oldu. Qalan bütün yerlərə Əjdər Cəbiyevin əli ilə insanlardan pul alaraq onları müqavilə ilə işə götürdü. Adama sual edərlər? Belə dürüstsənsə niyə yerləri müsabiqəyə çıxartmırsan? Saxta yolla direktor müavini təyin olunan Gülnarə Salahovanın işə başlayan kimi ilk işi mərkəzdə rüşvət bazarını genişləndirmək olub. Təkcə Yasamal rayon ƏSMM-də hər ay orta hesabla 150-200 ailəyə hərəsinə 160 manat olmaqla 25-30 min manat ünvanlı sosial yardım təyin olunur. Azı 100-120 ailənin 2 illiyə təyin olunan yardımın 8-9 ayı mənimsənilir. Bu da hər ay 120-130 min manat pul deməkdir. Həmin pulun azı yarısını Gülnarə Salahova mənimsəyir. Bu hesabla bir ildə Yasamal rayon ƏSMM-də rayonun ən kasıb, aztəminatlı ailələrinə çatacaq 1,2 milyon manat ünvanlı sosial yardım pulu qəddar Gülnarə Salahovanın rəhbərliyi altında mənimsənilir. Dəfələrlə tutarlı faktlarla Səlim Müslümova yazılıb heç bir tədbir görmür. Nazirliyin aparat rəhbəri Əjdər Cəbiyev Gülnarə Salahovanı var gücü ilə müdafiə edir. Təklif vermişik ki, mərkəzə qəfil yoxlama göndərin onlar yardım alan vətəndaşlara zəng etsinlər onlara desinlər ki, yardım kartlarını gətirib mərkəzdə göstərsinlər. Vətəndaşlar bunu edə bilməyəcək çünki həmin kartlar mərkəzin işçilərindədir. Bu qədər sadə. Səlim Müslümov bunu eləmir. Eləmək fikri də yoxdur. Amma deyir mübarizə aparıram.
4. Göygöldə vətəndaşları qəbul edərkən direktordan soruşur səni bura təyin edəndə səndən bir qara qəpik alan olub və ya sən mərkəzi aparata nəsə verirsən? O da deyir yox. Əgər o direktor pul verib ora getməyibsə və hər ay aparat rəhbəri Əjdər Cəbiyevə haqq vermirsə bu yazıların sətrinə lənət olsun. Sonra deyir Ağcabədinin direktorunu çıxartdım. Adamdan soruşarlar: sən onu ora direktor təyin edəndə güya bilmirdinki həmin adam Ağcəbədidə həmin idarədə direktor işləyib və keçmiş nazir Füzuli Ələkbərovun əmri ilə rüşvət məsələsinə görə işdən azad olunub? Gözəl bilirdin. Sadəcə Əjdər Cəbiyev sənə demişdi ki, o adam işləyən adamdı,rüşvəti yaxşı yığır və yuxarı yaxşı ötürür. Səndə onu ora direktor təyin etdin. Sonra da gördün ki, çox ağ edir qurama bir iş düzüb qoşdun ondan başladın özünü reklam elətdirməyə, şou düzəltməyə. Göygöldəki çıxışında deyir direktorun səsi yazılan diktofon məndədi, Mirşahinə müsahibəsində isə deyir ki, diktofon vətəndaşdadı. Kaş Prezident bunları biləydi.
5. Avtomatlaşdırma ilə bağlı.2 ildir avtomatlaşdırmadan danışır. Çox güman ki, 1 ildə ona don geyindirəcək ki, hələ təzədir neqativ hallar tam aradan qalxmayıb. Bu adamın işi budu: pafosla danışıb özünü reklam elətdirmək. O bunu DSMF-nin sədri olanda da məharətlə edirdi. Yadımdadı o vaxt hər kəsin fondun saytına daxil olub şəxsi sığorta hesabında nə qədər vəsaitin topladığına baxa bilməsini necə pafosla təqdim edirdi elə bil inqilab baş veribdi və ya nəsə böyük bir şey icad edibdi. Nazir təyin olunan kimi başladı avtomatlaşdırmanı ortaya atmağa ki, bunu edəndən sonra hər şey düzələr. İki ildi bununla manipulyasiya edir. İndidə də jurnalistin hansı vaxtdan sonra deyə bilərsiz vəziyyət düzələr sualına cavab verir ki, 6 aydan sonra. Həm də bəhanə edərək deyir ki, mürəkkəb sistemdir. Əmin olun ki, o sistem işə düşsə belə yenə orada da elə əmma qoyacaqlar ki, onların gəlir mənbələri kəsilməsin.
6. Baxın köhnə işçilərdən kimi işdə saxlayıb. Əhmədov Rza Səttar oğlu. Yasamal rayon ƏSMM-də 2013-cü ildə direktor müavini olub. Direktor müavini olduğu vaxt qanunsuz olaraq baş məsləhətçi işini görərək vətəndaşlardan ünvanlı sosial yardım sənədlərini qəbul edib və rüşvət toplamaqla məşğul olub. Güya Azərbaycan Beynəlxalq Universitetinin nəqliyyat fakültəsini bitirib. Səlim Müslümova dəfələrlə yazılb ki, onun diplomu saxtadır, o bal toplayaraq TQDK xətti ilə həmin Universitetə qəbul olmayıb. TQDK-ya sorğu göndərib dəqiqləşdirin. Onu etmirlər. Əvəzində onun üçün Xəzər rayon ƏSMM-də daxili müsahibə elan etdilər və onu ora direktor müavini kimi rəsmiləşdirdilər. Ona görə ki, yaxşı rüşvət toplayıb yuxarı çatdıra bilir. Kaş Səlim Müslümovdan soruşulardı: Əhmədov Rzaya hansı keyfiyyətlərinə görə vəzifə vermisiz?Axı deyirsiz Prezident tapşırdı oranı təmizlə. Beləmi təmizlədiniz?
7. Qəti əminəm ki, cənab Prezident təkcə Səlim Müslümov və Əjdər Cəbiyevin kadr siyasətindən xəbər tutsa onları bir gün olsun belə o vəzifədə saxlamaz. Nə qədər ki, Əjdər Cəbiyev nazirlikdə aparat rəhbəri vəzifəsində işləyəcək, o sistemdən rüşvət yığışmayacaq.
8. Ünvanlı sosial yardım alanların sayının azalması ilə bağlı. Səlim Müslümov yardım alanların sayının 20 faiz azalmasını öz uğuru kimi qələmə verməyə çalışır. Ailənin banklara kredit borcu olduğuna və ailənin 50 yaşdan yuxarı əmək qabiliyyətli olub işi olmayan üzvünə görə maddi drumu ağır olan ailələrə yardım verməmək məncə qəhrəmanlıq deyil. Onların dedikləri paradoksialdır. Çünki ikinci tərəfdən də yardım alanların 80 faizinin yardım məbləğini 126 manatdan 160 manata qaldırıblar. Bu isə onu göstərir ki, ölkədə yoxsulluq daha da dərinləşib. Necə oldu ki, 20 faizin maddi vəziyyəti yaxşılaşdı yardıma ehtiyacı qalmadı, 80 faizinin isə vəziyyəti daha da pisləşdi onlara daha çox yardım təyin olunmağa başlandı. Sadəcə pafosa hesablanıb ki, cənab Prezidentin yanında xal qazansınlar. Daha bilmirlər ki, cənab Prezidentə həqiqət lazımdı, sosial narazılıqların hansısa formada öz məqsədləri üçün üzə çıxarılmaması yox.
9. Səlim Müslümov deyir korrupsiyanı dağıtmışam rüşvəti dağıda bilmirəm. Qəti inandırıcı deyil. Nazirlikdə çox mütəşəkkil şəkildə korrupsiya şəbəkəsi qurulub. Ona başçılığı isə Səlim Müslümovun tapşırığı ilə nazirliyin aparat rəhbəri Əjdər Cəbiyev həyata keçirir. Rayon ƏSMM-lərin direktorları vəzifəyə rüşvət verməklə təyin olunmaqla yanaşı hər ay da ünvanlı sosial yardımdan topladıqları rüşvətin bir hissəsini Əjdər Cəbiyevə ötürürlər, o da Səlim Müslümova ötürür. O da həmin rüşvətlə gedib dünyanı gəzir, kef çəkir, yeyir, içir kefi kök şəkildə jurnalistin kasıb malını yemək cinayətdir, günahdır xatırlamasına günahsız şəkildə şərhlər verir. Baxın budur məsələnin mahiyyəti.
Əmin olun ki, Səlim Müslümov istəsə təklif olunan yolla ünvanlı sosial yardım sistemindən rüşvəti bir həftənin içində yığışdırar. Sadəcə o bunu istəmir, indiki vəziyyət ona sərf edir. Rüşvət toplamasını və qanunsuzluqlara yol verməsini pafoslu çıxışları ilə kompensasiya eləməyə çalışır.Yadımdadır Səlim Müslümov təzə nazir təyin olunanda Mirşahin Ağayev ondan müsahibə götürəndə ona gözəl sual vermişdi: təzə gələnlər 180 manata işləməyəcəklər ki? Çaşıb qalmışdı. Görünür mən onlara siz orada 180 manata işləyirsiniz ritorik sualını verdim deyəndə yəqin ki, qarşısındakının sıravi jurnalist olmadığını unutmuşdu. Və dərhal da cavabını aldı.
Cavid Əliyev"
Qarşı tərəfi də dinləməyə hazırıq...
Geri qayıt