İcra başçısı yerli polisi də özünə ram edib?
6-07-2015, 14:27
Təəssüflər olsun ki, bu gün bəzi rayon və bölgələrdə yerləşən polis şöbələrinin rəhbərləri, sanki Daxili İşlər Nazirliyinin deyil, bilavasitə yerli icra strukturlarının tabeliyindəymiş kimi fəaliyyət göstərməkdədirlər. Daha təəssüf doğurucu məqam isə bundan ibarətdir ki, belə RPŞ rəisləri yerli icra başçılarına məhz sonsuz sədaqətlərini (!) nümayiş etdirmək naminə, bir çox hallarda hətta müxtəlif qanun pozuntularına belə rəvac verməkdən çəkinmirlər. Belə təhlükəli tendensiyaların son vaxtlar daha çox müşahidə olunduğu rayonlardan biri də Gədəbəydir. Məlum olduğu kimi bu rayona başçı təyin olunduğu ilk gündən etibarən yerli sakinlərə qarşı bütün mümkün olan məqamlarda zor və fiziki təsirlər, təqib və təzyiqlər, hədə və təhdidlər tətbiq edən Ramiz Yediyarov bu məqsədlərlə mütəmadi olaraq yerli polis şöbəsinin imkanlarından yararlanmışdır. Artıq rayonda elə bir vəziyyət yaranmışdır ki, bu gün Məhərrəm Quliyevin rəhbərlik etdiyi Gədəbəy RPŞ yerli sakinlərin gözündə onların hüquqlarını, bölgədə asayişi mühafizə edən bir polis orqanı kimi deyil, sırf Ramiz Yediyarovun rejiminə xidmət göstərən jandarm təşkilatı kimi formalaşmışdır. Bir həqiqətdir ki, bu gün icra başçısı rayonda törətdiyi bütün özbaşınalıqları birbaşa Məhərrəm Quliyevin vəzifə imkanlarından yararlanaraq həyata keçirir. O cümlədən vətəndaşlara məxsus özəl obyekt və mülklərin qanunsuz olaraq sökülməsi, vətəndaşların zorla onlara məxsus ərazi və obyektlərdən çıxarılması və həmin ərazilərin zəbt olunması, rayonda məmur özbaşınalıqlarına qarşı etirazlarını bildirən şəxslərin özlərinə və yaxınlarına qarşı repressiv üsulların tətbiqi, bu əsasda vətəndaşların əsassız olaraq saxlanılması və hətta şərlənərək həbs olunması – bütün bu ciddi hüquq pozuntuları məhz Ramiz Yediyarovun təhriki və Gədəbəy RPŞ-nin rəisi Məhərrəm Quliyevin göstərişi ilə dəfələrlə həyata keçirilib və bütün bu ittihamları təsdiq edən çoxsaylı şahid ifadələri, foto və video görüntülər və digər dəlillər də mövcuddur. Lakin Gədəbəy RPŞ-nin rəhbərliyi bu gün də öz fəaliyyətini Ramiz Yediyarova sədaqət prinsipləri əsasında düzənləməkdə davam edir. Məlum olduğu kimi üç il bundan əvvəl Gədəbəy rayon sakini, sahibkar Oktay Əliyev rayonda turizmin inkişaf etdirilməsi və yeni iş yerlərinin açılması zəminində, Ekologiya və Təbii Sərvətlər Nazirliyi tərəfindən verilmiş razılıq və icazə sənədləri əsasında Gədəbəy rayonu Qalakənd meşə zolağında (meşə fonduna aid olan) xüsusi ayrılmış ərazidə turizm-istirahət mərkəzinin tikintisinə başlamışdı. Qeyd edək ki, həmin torpaq sahəsi ETSN-nin balansındadır və RİH-nə heç bir aidiyyatı yoxdur. Lakin ötən ilin iyul ayının 11-də RİH başçısının müavini Rüstəm Nağıyev, aparatın bir neçə əməkdaşı və RPŞ-nin rəis müavini Bəhmən Məmmədov çoxsaylı polis əməkdaşları ilə əraziyə gələrək, heç bir yazılı sənəd təqdim etmədən, ağır texnikanı cəlb etməklə artıq çox hissəsi hazır olan binanın bir hissəsini uçurdurlar. Bundan sonra Oktay Əliyevə qarşı pul tələbi irəli sürülür və yenə gələcəklərini deyən məmurlar çıxıb gedirlər. Həmin şəxslər təkrarən ayın 23-də geri qayıdırlar və bu dəfə də binanın qalan hissəsini uçurdurlar. Nəticədə Oktay Əliyevə külli-miqdarda maddi və mənəvi ziyan dəyir. Bütün bunlar haqqında qəzetimizin səhifələrində dəfələrlə materiallar dərc olunub. Lakin hadisələrin hazırda davam edən gedişi, məhz Gədəbəy Rayon Polis Şöbəsinin rəhbərliyinin tutduğu son dərəcə qərəzli mövqeyi, qanunlarımıza nümayiş etdiriyi etinasızlığı və hətta Azərbaycan Respublikası Ali Məhkəməsinin qərarına hörmətsizliyi və saymazlığı ilə diqqəti cəlb edir. Artıq xəbər verildiyi kimi, bir müddət əvvəl sahibkar Oktay Əliyevin qaldırdığı iddia əsasında Gəncə İnzibati-İqtisadi Məhkəməsində aparılan araşdırmadan sonra, Gədəbəy Rayon İcra Hakimiyyəti tərəfindən iddiaçının obyektinin sökülməsinin qeyri-qanuni olduğuna və RİH-in Oktay Əliyevin xeyrinə 66.626 (altımış altı min altı yüz iyirmi altı) manat məbləğində cərimə olunmasına dair qərar qəbul olunmuşdu. Sonradan, Gəncə Apellyasiya Məhkəməsi Oktay Əliyev tərəfindən təqdim olunan sənədləri nəzərə belə almadan, söküntü işlərinin guya ki, Gədəbəy RİH tərəfindən deyil, Meşə Mühafizəsi və Bərpası Müəssisəsi tərəfindən həyata keçirildiyini əsas gətirərək, birinci instansiya məhkəməsinin qərarını ləğv etdi. Amma, son instansiya olaraq Ali Məhkəmə işin bütün hallarını araşdırdıqdan sonra Gəncə Apellyasiya Məhkəməsinin qərarını ləğv etmiş və birinci instansiya məhkəməsinin qərarını qüvvədə saxlamışdır. Bu isə həm də o deməkdir ki, Oktay Əliyev ən azından öz vəsaitləri hesabına (Ramiz Yediyarovun Ali Məhkəmənin qərarına rəğmən, sahibkara kompensasiya ödəyəcəyini düşünmək heç də inandırıcı deyil) olsa belə, sökülmüş obyektini yenidən inşa etdirmək hüququna malikdir və onun sərəncamında olan sənədlər tikinti işlərinə başlamaq üçün tamamilə yetərlidir. Lakin görünür nə icra başçısı, nə də polis rəisi bu fikirlə də razılaşmaq niyyətində deyillər. Məsələ bundadır ki, artıq əlində Ali Məhkəmənin qərarı olan Oktay Əliyev ona ayrılmış (bir də təkrar edirik, ETSN tərəfindən) ərazidə tikinti işlərini bərpa etmək üçün oraya inşaat briqadası gətirdiyi zaman, Gədəbəy RPŞ-nin əməkdaşları da özlərini əraziyə çatdırmışlar. Məhərrəm Quliyevin tapşırığı ilə gəldiklərini bəyan edən polislər Oktay Əliyevə bildirmişlər ki, başçı hələ də bu ərazidə tikinti aparılmasına icazə verməyib. Axı necə olur ki, Ramiz Yediyarovun şifahi göstərişi Məhərrəm Quliyev üçün Ali Məhkəmənin qərarından daha önəmli olur? Belə bir vəziyyətdə Gədəbəy RPŞ-nin heyətinin Azərbaycan qanunlarının keşiyində durmalarını necə ehtimal etmək olar? Bəs görəsən biz hamımız Gədəbəydə harınlamış məmurların qanunlarımızı tapdalamasını hələ nə qədər dinməzcə seyr etməli olacağıq?
Geri qayıt