Məhkəmə tanışına qarşı dələduzluq edən mayorla bağlı qərar çıxardı
Bu gün, 13:52
Bakı Apellyasiya Məhkəməsində dələduzluqda təqsirləndirilən V.İbrahimxəlilovun barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Murad Məmmədovun sədrliyi ilə keçirilən prosesdə qərar elan olunub. Qərara əsasən, şikayət təmin edilməyib.
İttihama görə, V.İbrahimxəlilov polis mayoru rütbəsində Daxili İşlər Nazirliyinin Nəqliyyatda Baş Polis İdarəsinin İctimai Təhlükəsizlik şöbəsinin baş inspektoru vəzifəsində xidmət edərkən tanışı, zərərçəkmiş Elxan Mustafayevin övladını tanışları vasitəsi ilə Şəki rayonu, Orta Zəyzid kənd məktəbinə müəllimə kimi işə qəbul etdirəcəyinə dair vəd verib. O, bu yolla 08 iyul 2022-ci il tarixdə Bakı şəhəri, Nizami rayonu, Qara Qarayev prospekti 94 ünvanında yerləşən “Köhnə Bakı” adlı kafedə zərərçəkmişdən 3000 manat pul alaraq dələduzluq edib. Nizami Rayon Məhkəməsinin qərarına əsasən təqsirləndirilən şəxs Cinayət Məcəlləsinin 178.1-ci (dələduzluq) maddəsində nəzərdə tutulmuş cinayət əməlini törətməkdə təqsirli bilinib, cinayət məsuliyyətinə cəlb etmə müddəti keçdiyindən o, cinayət məsuliyyətindən azad edilib və cinayət işi üzrə icraata xitam verilib. V.İbrahimxəlilov barəsində seçilmiş başqa yerə getməmək haqqında iltizam qətimkan tədbirinin xitam olunması qərara alınıb. Qərarından narazı qalan zərərçəkmiş apellyasiya şikayəti verərək qərarın ləğv edilməsini xahiş etmişdi.
Geri qayıt