Keçmiş MTN-in şöbə rəisinə qarşı 2 milyon manatlıq iddia
16-11-2017, 15:47
Bu gün Bakı Apellyasiya Məhkəməsində ləğv edilmiş Milli Təhlükəsizlik Nazirliyinin (MTN) İstintaq Baş İdarəsinin İbtidai istintaq idarəsinin 2-ci şöbəsinin rəisi Vüsal Ələkbərovun barəsində olan hökmdən verilən apellyasiya şikayəti üzrə məhkəmə iclası davam etdirilib.
"Report"un xəbərinə görə, prosesdə "Kapital Bank"ın "Tərəqqi" filialının sabiq müdri Hüseyn Səfərov bildirib ki, bu hadisəyə görə, özünün və uşaqlarının evləri bank tərəfindən müsadirə olunub: "Mən bu işlə bağlı Mövlan Şıxəliyevdən (keçmiş MTN-in baş İstintaq İdarəsinin sabiq rəisi) Baş Prokurorluğa şikayət etmişəm. Hazırda evim yoxdur, JEK müdirinin evində qeydiyyatdayam. Mənim mülki iddiam təmin edilsin, onun cəzası ilə bağlı şikayətim yoxdur, məhkəmənin mülahizəsinə buraxıram. Məni MTN-də saxlayanda 18 yaşlı oğlumdan pulu alıb, Vüsal Ələkbərovun otağına gətirdilər. Vüsal Ələkbərov isə həmin pulu Mövlan Şıxəliyevin otağına apardı. Mənim işim Mövlan Şıxəliyevlədir".
Prosesdə digər zərərçəkmiş "Texnikabank"ın Sumqayıt filialının sabiq müdiri olmuş Müssənif Salahov da dindirilib. O, məhkəmədə mülki iddiasının təmin edilməsini tələb edib və vəsatət qaldırdığını deyib. Zərərçəkmiş vəsatətində məhkəmənin qismən keçirilməsini istəyib.
V.Ələkbərov və onun vəkilləri də vəsatətin təmin edilməsini istəyib, ancaq vəsatət təmin edilməyib.
Məhkəmənin növbəti iclası noyabrın 30-na təyin edilib.
*** 15:44
Bu gün Bakı Apellyasiya Məhkəməsində ləğv edilmiş Milli Təhlükəsizlik Nazirliyinin (MTN) İstintaq Baş İdarəsinin İbtidai istintaq idarəsinin 2-ci şöbəsinin rəisi Vüsal Ələkbərovun barəsində olan hökmdən verilən apellyasiya şikayəti üzrə məhkəmə iclası davam etdirilib.
"Report"un xəbərinə görə, hakim Qədim Babayevin sədrliyi ilə keçirilən prosesdə zərərçəkmiş Akif Qurbanovun məhkəməyə ərizə göndərdiyi elan olunub.
Hakim bildirib ki, zərərçəkmiş şikayətini geri götürüb.
Daha sonra zərərçəkmiş Hüseyn Səfərov çıxış edib. O, 2 milyon manatlıq mülki iddia qaldırdığını deyib.
Qeyd edək ki, V.Ələkbərov Cinayət Məcəlləsinin 182.3.1, 182.3.2-ci (mütəşəkkil dəstə tərəfindən, külli miqdarda əmlak əldə etmək məqsədi ilə hədə-qorxu gəlmə), 294.3-cü (sübutları saxtalaşdırma, ağır və ya xüsusilə ağır cinayətlər haqqında cinayət işi üzrə sübutları saxtalaşdırma, habelə digər işlər üzrə sübutların saxtalaşdırılması ağır nəticələrə səbəb olma), 311.3.1, 311.3.2, 311.3.3, 311.3.4-cü (qabaqcadan əlbir olan bir qrup şəxs və ya mütəşəkkil dəstə tərəfindən, təkrar, külli miqdarda, hədə-qorxu tətbiq olunmaqla rüşvət alma), 341.2.1 və 341.2.3-cü (bir qrup şəxs tərəfindən, ağır nəticələrə səbəb olmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə) maddələri ilə ittiham edilir.
Həbsdə olan V.Ələkbərova məxsus olan və həyat yoldaşı Şəhla Ələkbərovanın adına rəsmiləşdirilmiş Səbail rayonu, Badamdar qəsəbəsi, 3-cü yaşayış massivində 0,18 ha torpaq sahəsi və fərdi yaşayış evi, Yasamal rayonu, Şərifzadə küçəsi, ev 164, mənzil 42 ünvanında yerləşən mənzili üzərinə həbs qoyulub. Üzərinə həbs qoyulan əmlakların ümumi dəyəri isə 1 milyon 277 min manat hesablanıb.
Bakı Hərbi Məhkəməsinin hökmü ilə V.Ələkbərov 12 il müddətinə azadlıqdan məhrum edilib. Məhkəmə həmçinin polkovnikin rütbəsinin əlindən alınması barədə xüsusi qərar da çıxarıb. Hökmə əsasən, V.Ələkbərovun əmlakı müsadirə edilərək zərərçəkmiş iş adamı Akif Qurbanova verilməsi barədə qərar qəbul edilib. Digər zərərçıkmiş iş adamlarının mülki iddiası təmin edilməmiş saxlanıb. Məhkəmə bunu belə əsaslandırıb ki, V.Ələkbərov və digər vəzifəli şəxslər iddiası təmin olunmayan zərərçəkmişlərdən pulu rüşvət kimi qəbul ediblər. Rüşvətlə bağlı iddia isə mülki qaydada həll oluna bilər.
Məhkəmə həmçinin sabiq milli təhlükəsizlik naziri Eldar Mahmudov və həmin nazirliyin baş istintaq idarəsinin rəisi olmuş Mövlan Şıxəliyevin barəsində cinayət işinin başlanması ilə bağlı xüsusi qərar da çıxarıb və həmin qərarın surəti icra olunması üçün adiyyəti üzrə prokurorluğa göndəriləcək.
Hökmdən narazı qalan V.Ələkbərov və zərərçəkmişlər apellyasiya şikayəti ilə Bakı Apellyasiya Məhkəməsinə müraciət ediblər.
Geri qayıt