"Mənim və oğlum Elxanın “erməni olduğu” barədə təsəvvür yaratmaqla"...
3-05-2016, 11:11
Almaniyada yaşayan yəhudi əsilli Azərbaycan vətəndaşı, Azərbaycan Dağ Yəhudiləri İcmasının nümayəndəsi, 1937-ci il təvəllüdlü Marus Yevda qızı Axundova (qızlıq soyadı Mixaylova) Azərbaycanın birinci xanımı, Heydər Əliyev Fondunun prezidenti, millət vəkili, BMT-nin, YUNESKO və İSESKO-nun xoşməramlı səfiri Mehriban Əliyevaya müraciət edib.
M.Axundova müraciətin surətinin bir nüsxəsini Qafqaz Xəbər Agentliyinə göndərib. DİA.AZ olaraq müraciətin mətnini oxuculara təqdim edirik:
“Hörmətli Mehriban Əliyeva!
Siz hər zaman Azərbaycanda tolerantlıq və həmrəylik tərəfdarı olmusunuz. Azərbaycanda yaşayan milli azlıqlara, o cümlədən dağ yəhudilərinə qarşı olan isti münasibət haqqında dünyanın bir çox siyasətçiləri, ictimai xadimləri də danışıblar. Biz, Azərbaycanda doğulub boya başa çatan yəhudilər olaraq, daim bu qayğı və diqqəti dəyərləndirmiş, dünyanın hansı ölkəsinə getsək belə, vətənimiz Azərbaycanı unutmamışıq. Sizin və Azərbaycan Prezidenti İlham Əliyev cənablarının yəhudilərə olan diqqət və qayğısı Azərbaycan-İsrail münasibətlərinə də müsbət təsir göstərib. Təsadüfi deyil ki, İsrailin siyasi rəhbərliyi də Azərbaycandan danışarkən, “qardaş ölkə” ifadəsini işlədirlər. Biz bu diqqət və səmimi münasibətə hər zaman layiq olmağa çalışırıq və bundan sonra da çalışacağıq.
Dövlət başçısı İlham Əliyev də hər zaman milli və dini azlıqlara qarşı ədalətli yanaşmanın tərəfdarı olub.
Eyni zamanda, Azərbaycan Prezidenti dəfələrlə vurğulayıb ki, məmurlar bizneslə məşğul olmamalı, açıq və ya gizli şəkildə hər hansı sahibkara xüsusi himayədarlıq etməməlidir.
Lakin təəssüflər olsun ki, bəzi məmurlar, onların himayə etdiyi işbazlar və şəxsi mənfəətini milli maraqlardan üstün tutan məsuliyyətsiz jurnalistlər Sizin və Cənab Prezidentin daim qorumağa çalışdığınız bu birlik və həmrəyliyə kölgə salırlar. Təəssüflər olsun ki, Azərbaycan cəmiyyətində etnik qarşıdurma və diskriminasiya yaratmaqdan belə çəkinməyən, Azərbaycan-Ermənistan müharibəsindən sui-istifadə edən bəzi naqislər öz maraqları naminə müxtəlif təxribatlara əl atırlar.
Onlar öz maraqları naminə Azərbaycanı sevən, heç bir cinayətə və ölkəsinə qarşı xəyanətə imza atmayan şəxsləri “erməni əsilli” adlandırmağı belə özlərinə rəva görürlər.
Bu günlərdə, daha dəqiq desək, 28 aprel 2016-cı il tarixində “Gündəlik Teleqraf” MMC-yə daxil olan teleqraf.com, publika.az və axar.az saytlarında mənim və oğlum haqqında böhtan xarakterli məqalə dərc olundu, orda mən “Bakıdan Almaniyaya qaçan erməni” kimi qələmə verildim. Maraqlıdır ki, “Gündəlik Teleqraf”ın rəhbəri Aynur Camalqızı bu barədə ona sual verən Qafqaz Xəbər Agentliyinin jurnalistinə belə deyib: “Qoy bizi məhkəməyə versin, ondan qorxmuruq”.
Qeyd edim ki, Azərbaycan Dağ Yəhudiləri İcmasından da rəhbər şəxslər Qafqaz Xəbər Agentliyinin sorğusuna cavab olaraq, mənim əslən yəhudi olduğumu və Oğuz rayonundakı yəhudi qəsəbəsində doğulduğumu təsdiqləyiblər. Beləliklə, mənim haqqımda yazılan bu böhtanların bir məqsədi var: Cəmiyyətdə mənim və oğlum Elxanın “erməni olduğu” barədə təsəvvür yaratmaqla, mənzilimin qanunsuz mənimsənilməsinə haqq qazandırmaq.
Belə bir böhtan və haqsızlıqdan sonra, Sizə yazmağı qərara aldım.
Əzizim Mehriban xanım!
Artıq bir neçə ildir ki, övladlarımla birlikdə Almaniyada yaşayıram. Oğlum Elxan Yaşar oğlu Axundov Almaniyada daimi yaşayış icazəsi alaraq, burada sahibkarlıqla məşğuldur.
Oğlum Elxan Axundov 3 il bundan əvvəl ortaq tanışlar vasitəsi ilə əslən Qərbi Azərbaycandan olan, Gəncədə yaşamış Sidqi Abbasov adlı şəxslə tanış olub.
Sidqi Abbasovun Bakıda bir neçə yerdə, o cümlədən Mərkəzi Univermaqda (MUM) qızıl mağazaları, lombardları var.
O, mənim oğlum Elxana təklif etdi ki, Almaniyada birgə biznes açaq, avtomobil satışı ilə məşğul olaq. Birlikdə şirkət açıblar, həmin şirkətin əsasnamə kapitalı 25 min avro olub. Elxan və Sidqi 50 faiz pay şəriki sayılırdılar. Elxan Bakıya gələndə Sidqi oğlumu Konstitusiya Məhkəməsinin İşlər müdiri olan Akif Hümbətovla tanış edib. Sidqi oğluma özünün biznesdəki sərmayəsinin, o cümlədən Almaniyada işə qoyduğu pulun da Akifə məxsus olduğunu deyib.
Bir müddət sonra Elxana təcili pul lazım olub, Sidqidən 30 min manat borc istəyib. O, Elxana deyib ki, “məndə Akif müəllimin pulu var, pulu sənə faizlə, ipoteka müqaviləsi ilə verə bilər”. 2013-cü il iyunun 4-də bağlanan müqavilədə imza atan tərəflər mən – Marus Yevda qızı Axundova və Sidqinin əmisioğlu Abbasov Xaqani Mikayıl oğlu oldu. Girov olaraq mənim adıma olan, Əlövsət Quliyev küçəsi, ev 133-də yerləşən, 53 saylı mənzili girov qoyuldu. Mənzilə baxmağa Konstitusiya Məhkəməsinin işlər müdiri Akif Hümbətov da şəxsən Sidqi ilə birlikdə gəlmişdi.
Mənzilin qiyməti 300 min manatdan çox olsa da, qiymətləndirmədə 35 min manat yazdılar. Borcun müddəti iki il olsa da, oğlum Elxan il yarım ərzində onun borcunu tam şəkildə ödədi, hətta 9 min faiz ödənişini də verdi. Şahidlərimiz və sübutlarımız da var. Sonuncu dəfə oğlumun dostu Olim aparıb ona pulu əlbəəl verib, deyib ki, gedək notariusda mənzili girovdan çıxaraq, o isə “qadın Azərbaycana gəlsin, özünün iştirakı lazımdır” deyə bəhanəylə boyun qaçırıb. Bir müddət sonra isə Almaniyadakı ortaqlığımız tutmadı, Sidqi oğlumdan xəbərsiz şirkətin nizamnamə kapitalını – 25 min avronu da götürdü, hələ mənzili də mənimsədi (Nəsimi Rayon Məhkəməsinin 29 iyul 2015-ci il tarixli qərarı ilə, hakim Etibar Zülfüqar oğlu Hümbətov). O, bizim iştirakımız olmadan Nəsimi Rayon Məhkəməsində məhkəmə açıb və öz xeyrinə qərar çıxarıb.
Mən 2016-cı ilin yanvar ayında Dağ Yəhudiləri İcmasının sədri Melix Yevdayevin qəbulunda oldum, deputat Yevda Abramovla da görüşdüm. Həmçinin, Konstitusiya Məhkəməsinin işlər müdiri Akif Hümbətovla görüşmək üçün, onun işlədiyi qurumun binasına getdim, lakin məni içəri buraxmadılar.
Möhtərəm Xoşməramlı Səfir!
Yazıb Sizdən xahiş edirəm ki, cəmiyyətimizdə çaşqınlıq yaradan və günahsız insanlara böhtan atan bu şəxslərin cəzalandırılması, həmçinin mənim qanuni mənzilimin geri qaytarılması istiqamətində mənə yardım edəsiniz.
Son ümid yerim kimi, Sizin məni tək və köməksiz buraxmayacağınıza inanıram.
Hörmət və sevgilərlə Marus Yevda qızı Axundova”.
Geri qayıt