Yasamalın icra başçısı başqa rayonlarda obyekt sökdürür?
16-02-2016, 11:13
Bəzən elə bir vəziyyət yaranır ki, bütün lazımi sənədlər, hətta məhkəmə qərarı ola-ola, sizə icazəsini aldığınız obyektin tikintisi və fəaliyyəti üçün heç bir şərait yaratmırlar. Həm də bu maneəçilik təkcə yaşadığın rayonun icra hakimiyyəti tərəfindən deyil, birbaşa başqa rayonun icra başçısı tərəfindən törədilir. Ən maraqlı məqam da odur ki, maneəçilik törədən şəxslər də, bir neçə il əvvəl bu sənədlərə imza atan, möhür vuran şəxslərdir. Qafqaz Xəbər Agentliyi olaraq, bu cür “maraqlı” və absurd halları daim araşdırmış, vətəndaşların şikayətləri və tərəflərin dinlənilməsi əsasında ictimaiyyətə təqdim edirik.
Bu il fevralın 11-də Xətai rayonu S.Vəzirov 11 ünvanında, “KAT” MTK şəhərciyində Xətai RİH-in əməkdaşları tərəfindən Sevinc Oqtay qızı Hacıyevaya məxsus avtomobillərə xidmət məntəqəsi (“moyka”) söküldü və yüngül konstruksiyalı tikilinin bütün avadanlıqları müsadirə edilərək aparılıb. Lakin Sevinc Hacıyevanın sözlərinə görə, bu söküntü işi ilə bağlı ona heç bir rəsmi sənəd göstərilməyib.
O, Qafqaznews.az-a bildirib ki, bu obyektin inşası və fəaliyyətinə icazə 2005-ci il martın 9-da, Xətai RİH tərəfindən verilib. “O vaxt Xətai RİH başçısı İbrahim Mehdiyev idi və sərəncamda onun adı var. 2010-cu ildə isə Xətai RİH-in memarı Vadim Surxayev tərəfindən avtomobillərə texniki xidmət məntəqəsinin eskizi təsdiq olunub. O zaman biz bu obyekti inşa etdik, 40 min manata qədər vəsait xərclədik. Lakin təzə açılmışdı ki, Telman adlı şəxs (sakinlərlə söhbət zamanı onun “Təmiz Şəhər ASC-də işləyən Telman Teymurov olduğu, həmin vaxtlar bu şəhərcikdə yaşadığı məlum oldu – red.) dedi ki, “əgər “moyka” işlətmək istəyirsinizsə, ayda mənə 300 manat verəcəksiniz, mən də “yuxarı”lara verəcəyəm”. Sonra Telman guya “sakinlərə narahatlıq” bəhanəsi ilə qapı-qapı düşüb imza topladı, bu ərizə RİH-ə getdi. Hətta bəzi əcnəbi vətəndaşlardan da imza almışdılar. Əksər qonşular sonra dedilər ki, “biz nəyə imza atdığımızı bilmirdik, bizə burda abadlaşdırma və yaşıllaşdırma olacağını deyiblər”. Beləliklə, bir neçə il əvvəl obyekt söküldü.
2015-ci il iyul tarixində Xətai Rayon Məhkəməsi bizim həmin ərazidə yüngül konstruksiyalı məntəqə açmağımıza icazə verdi, bu işin icrasına nəzarət isə Ədliyyə Nazirliyi Xətai Rayon İcra Şöbəsinin icraçısı Rüstəm İbrahimova tapşırıldı. O bizə dedi ki, narahat olmayın, yenə sökməyə gəlsələr, mənə bildirin. Bundan 15 gün əvvəl R.İbrahimovun nəzarəti ilə həmin “moyka”nı bərpa etdik. Lakin fevralın 11-də Xətai RİH-dən gəlib heç bir sənəd göstərmədən sökdülər. İcraçıya zəng etdim, dedi mənim bu məsələdə işim bitib, siz 102-yə yığın. Sahə inspektoru Valeh Səfərli isə gəldi, həmin adamlarla dedi-güldü, zarafatlaşıb getdi. Daha sonra adı Füzuli olan RİH əməkdaşı mənə dedi ki, “RİH-in memarı Vadim müəllimlə danışın, o desə, söküntü dayanar”. Mən getdim Vadim müəllimlə görüşdüm (Vadim Surxayev – red.), o isə bildirdi ki, “siz yenidən icazə almalısınız”. Beləliklə, bu məsələdə biz tək qaldıq. Vəkilim sənədləri hazırlayıb, prokurorluğa və məhkəməyə müraciət edəcəyik”. Qafqaznews.az olaraq, obyektivlik naminə Xətai RİH-ə zəng etdik, adı keçən şəxslərin heç biri yerində yox idi. Bizə dedilər ki, “Vadim müəllimin qəbulu 2-ci və 5-ci günlərdir, onda gəlib danışarsınız”.
Yazıda adı hallandırılan məhkəmə icraçısı Rüstəm İbrahimovla əlaqə saxladıq. O, Sevinc xanıma dediklərini nə təkzib, nə təsdiq etdi: “Mən telefonda sizə heç nə deyə bilmərəm. Xahiş edirəm, Ədliyyə Nazirliyi İctimaiyyətlə Əlaqələr Şöbəsinə zəng edəsiniz”. Biz Ədliyyə Nazirliyinin mətbuat xidmətinin əməkdaşı Səyyad Məcidovla əlaqə saxladıq. “Mənim bu məsələdən tam məlumatım yoxdur, araşdırmadan tam fikir bildirə bilmərəm. Amma onu deyə bilərəm ki, məhkəmə qərarının icrasının təminatında icraçı məsuliyyət daşıyır. İcraçı məsuliyyət daşıyır ki, orda daş üstündən daş əksik olmasın”.
Tikilinin yüngül konstruksiyalı olduğunu xatırlatdıq, S.Məcidov isə öz növbəsini fikrinə düzəliş etdi: “Hər halda, icraçı bu tikilinin yenidən sökülməsi ehtimalına görə məsuliyyət daşıyır”. “Qafqaz Hüquq Mərkəzi”nin baş direktoru Samir İsmayılov isə bildirib ki, 2005-ci ilin martında verilən sərəncamın 10 il iddia müddəti keçən il bitib: “Əgər Xətai RİH özünün 10 il əvvəlki qərarını ləğv etməyi qərara alıbsa, o zaman Xətai Rayon Məhkəməsinin qərarından appelyasiya şikayəti verməli, bu qərarın qüvvədən salınmasına nail olmalıdır. Xətai RİH-in hüquqları pozulursa, bunu da məhkəmədə əsaslandırmalıdır. Daha yüksək məhkəmə instansiyasının qərarı olmadan, hər hansı fiziki və ya hüquqi şəxs orda gəlib obyekti sökə bilməz. O ki qaldı hansısa tikilini sökməyə, lap qanunsuz olsa belə, tikinti başlamamışdan rəsmi xəbərdarlıq göndərilməli idi”. Sahə inspektoru, polis mayoru Valeh Səfərliyə zəng etdik. O, Sevinc Hacıyevanın dediklərini təkzib etmədi: “Gəldim, gördüm ki, söküntü gedir.
Yaxınlaşdım, RİH-dən Füzuli müəllim və 110 saylı MİS-in rəisi Səbuhi müəllim var idi orda. Dedilər ki, “sökmək tapşırılıb”, tikili qanunsuzdur. Sevinc xanım qərar göstərdi, mən də onlara bildirdim ki, “axı vətəndaşda qərar var”. Dedilər ki, bizdə təsdiq edilməyib. Mən nə edə bilərəm, icra başçısına nə deyə bilərəm?”. Biz vətəndaşın mülkiyyət hüququnu və asayişin təminatında polisin rolun sahə inspektoruna bir daha xatırlatdıq, RİH nümayəndələrinin hər hansı sənəd göstərib-göstərmədiyini soruşduq… lakin yenə eyni cavab aldıq: “Axı mən icra başçısına nə deyə bilərəm?”. 110 saylı MİS-in rəisi Səbuhi müəllim isə bizimlə danışmaqdan imtina etdi: “Bu mənim şəxsi telefonumdur. Danışmamaq hüququmdan istifadə edirəm, bu barədə sizə heç nə bildirmək istəmirəm”. Məsələ ilə bağlı sakinlərin də fikirlərini soruşduq.
Məlum oldu ki, Xətai RİH-in sabiq icra başçısı, hazırda Yasamalın icra başçısı olan İbrahim Mehdiyev bu şəhərcikdə (S.Vəzirov 11H, mənzil 13-14) yaşayır, iki mənzili alıb birləşdirib. Və “moyka”nın sökülməsində də məhz İbrahim Mehdiyevin rolunun olduğu deyilir. Sakinlərin sözlərinə görə, Telman adlı şəxslə İbrahim müəllimin yaxın münasibəti olub. “Obyektin birinci dəfə sökülməsi də məhz İbrahim Mehdiyevin sifarişi ilə olmuşdu, bunu özü də dəfələrlə sakinlər arasında etiraf edib. On beş gün əvvəl bu obyekt tikiləndə İbrahim Mehdiyev gəlib soruşmuşdu, ona demişdilər ki, məhkəmə qərarı var. O isə “baxarıq” deyərək getmişdi”, – deyə sakinlərdən biri qeyd edib. İbrahim Mehdiyevin hələ fəaliyyətə başlamayan obyekti sökdürməkdə əsas səbəb kimi “səs-küy olmasını” göstərdiyi deyilir.
Lakin onunla qonşu olanlar isə deyir ki, “İbrahim müəllimin nəvələrinin səs-küyündən rahatlığımız yoxdur”. Maraqlıdır ki, İbrahim Mehdiyevin yaşadığı bina ilə “moyka”nın yeri arasında 100-150 metr məsafə, o cümlədən bir bina var. O da maraqlıdır ki, rəhbərlik etdiyi Yasamal rayonunda binalara bitişik obyektlərin, yuyucuların işləməsinə heç bir maneə törətməyən, hətta şərait yaradan icra başçısı yaşadığı şəhərcikdə belə obyektin fəaliyyətinə niyə razı deyil? Görəsən, Yasamal rayonu ərazisində uzun illərdir fəaliyyət göstərən, binalarda sakinlərin rahatlığına əngəl törədən “moyka”larla bağlı da, bu cür “tədbirlər” görülürmü?
Məhz sözügedən obyektin söküntüsü üçün ciddi səbəblər varsa, 2005-ci ildə sözügedən sərəncama möhür vuran, imza atan şəxslərin (o cümlədən, İbrahim Mehdiyevin) fikrini dəyişməsinə səbəb nə oldu? Bu səbəblərə aydınlıq gətirmək üçün, qarşı tərəfi də dinləməyə hazırıq. Mövzunu diqqətdə saxlayacağıq.
P.S.Yasamal rayonunda İbrahim Meydiyevə aid olduğu barədə məlumat aldığımız bəzi avtoyuyucuların fotolarını oxuculara təqdim edirik.
Geri qayıt