Nurçular Azərbaycanın bank sektoruna da sirayət ediblər
5-05-2014, 12:25
DİA.AZ: - Bir müddətdir adı bəzi qalmaqallarda çəkilən “Kredo Bank”ın rəhbərliyi barədə indi başqa bir maraqlı məsələ ortaya çıxıb. DİA.AZ bildirir ki, bu barədə “Təzadlar”ın elektron poçtuna daxil olan məktubda bildirilir. Vaxtilə bankda çalışdığını yazan R.Səlimov məktubunun əvvəlində həm də bankın rəhbərliyinin digər qalmaqallı məhkəmə işindən yazır: “Hörmətli redaksiya! Mən sizin saytda belə bir məlumat oxudum ki, bir müddət əvvəl Bakı Apellyasiya Məhkəməsinin Mülki kollegiyası (Sədrlik edən M. Əsədov) iddiaçı “Kredo Bank” KB-nin cavabdeh Yusifov Ələddin Ağca oğluna qarşı (şikayətçi V.Səfərovanın imzasını saxtalaşdıraraq əmlakını ələ keçirən) şikayətə baxaraq maraqlı qərar qəbul etmişdir.
Qərarda yazılır ki, məhkəmə belə bir qərara gəlmişdir ki, Bakı şəhəri Nərimanov rayon Məhkəməsinin 12 iyul 2012-ci il tarixli 2(005)-1376/2012 saylı qətnaməsi ilə iddiaçı “KredoBank” KB-nin cavabdehlər “Aqro Star Plus” MMC-nə, Yusifov Ələddin Ağca oğluna, Yusifova Bahar Camal qızına, Yusifov Ceyhun Ələddin oğluna qarşı “Kredit müqaviləsinin ləğv edilməsi, borcun, faizlərin, zərərin, rüsumun və cərimənin tam tutulması, tələbin ipoteka ilə yüklü edilmiş qeyri-yaşayış binasına yönəldilərək açıq hərracda satılması və əldə olan pul məbləğindən borcun “KredoBank” ASC-nə ödənilməsi və borcun tam ödənilmədiyi halda cavabdehlərin başqa əmlaklarına yönəldilməsi, cavabdehlərin həmin qeyri-yaşayış binasına olan bütün istifadə hüquqlarının tam xitam verilərək itirilməsi, ipoteka olan həmin əmlakın boşaldılması, təhvil verilməsi, ipotekada olan həmin əmlakdan məcburi qaydada çıxarılması” tələbinə dair iddiası qismən təmin edilməlidir. Və belə bir qərar da qəbul edilmişdir. Və bunun ardınca isə Bakı Apellyasiya Məhkəməsinin qərarı cavabdehlərin bütün fırıldaqlarını-imzaların saxtalaşdırıldığını, digər qanunsuz əməllərini ifşa edir... Həmçinin bankın rəhbərliyinin hərəkətində qanunsuz fəaliyyət və ciddi pozuntular olduğundan məhkəmə xüsusi qərardad çıxararaq həmin əməlləri özündə əks etdirən sənədləri araşdırılıb hüquqi qiymət verilməsi üçün Baş Prokurorluğa göndərilməsinə qərar verir... Mən həmçinin saytınızda oxudum ki, bu işdə zərərçəkən, Bakı şəhər sakini Hüseyn Səfərov adlı şəxs müsahibəsində qeyd edir ki, “Mən “Kredo Bank”ın Müşahidə Şurasının sədri Müşfiq Vəkilovu, bankın faktiki rəhbəri və Müşfiq Vəkilovun atası İsa Vəkilovu, onların əsas iş görəni, mənə məxsus 2 mərtəbi binanı ələ keçirib adı çəkilən banka girov qoyaraq kredit götürüb mənimsəyən və bu insanlarla əlbir olan Ələddin Yusifov adlı şəxsi məhkəmədə ifşa etdim”. Sonra o, deyir: “Necə oldu ki, bu ötən qısa müddətdə birdən-birə bunların varı milyardlara çatdı? Zavodları, fabrikləri, otellər şəbəkəsi var, xarici ölkələrdə biznes şəbəkələrinin ümumi dövriyyəsi milyardlarla ölçülür! Hətta adi sürücülərini aparıb qoyublar otelə icraçı direktor, bunlar gör nə qədər harınlayıblar. Olsun, kiminsə halal varında gözümüz yoxdur, amma soruşuram: bu milyardların dövlət büdcəsinə vergisi nə qədərdir? İsa Vəkilovun Avropada 5-6 turizm şirkətləri var, hər birinin də ümumi fondu təxminən 30-50 milyon dollardır. Bunlar haradan aldılar 30 milyon dollarlarla pulu? Bankların nizamnamə fondunun artırılması haqqında qərar verildi, keçən ilin dekabrın 31-nə qədər. Onlar ödənməli idi, yəni bütün banklarda nizamnamə fondu 50 milyon manata çatdırılmalı idi. Necə oldu ki, başqa banklar ödəyə bilmədiyi halda, “KredoBank” bu şərti dərhal ödəyə bildi? Haradan aldılar bu qədər pulu, niyə Azərbaycandan deyil, xaricdən pul gətirirlər? Çünki Müşfiq Vəkilov açıq şəkildə deyir ki, pulları xaricdən gətirirəm. Həmin o xarici investor Müşfiq Vəkilovun özünün təsisçiliyində olan firmalarıdır. Yəqinki Azərbaycanın vergi orqanları, MTN bu məsələ ilə maraqlanmalıdır. Müşfiq Vəkilov bir ayda təxminən 4-5 dəfə xaricə gedir... Xüsusən də Türkiyəyə...
Mən Müşfiq Vəkilovu yaxşı tanıyıram. Onun Türkiyəyə tez-tez getməsini bankda hamı bilir. Onun nurçularla, Fətullah Gülənin adamları ilə Türkiyədə müntəzəm şübhəli görüşləri barədə məlumatlar araşdırılmalıdır. Bankda da onun yanına gələnlərin əksəriyyəti nurçuların Bakıdakı emissarları olardı. Son vaxtlara kimi onun adı nurçularla birgə əməkdaşlıqda çəkilən bəzi tanınmışların Müşfiq Vəkilovla tez-tez görüşməsini, Müşfiq Vəkilovun onların adını həmişə fəxrlə çəkməsini bankda çoxları bilir... Ona görə də bu məsələyə aydınlıq gətirilməli və lazımi tədbirlər görülməlidir...”.
Məktubda digər ittihamlar da var ki, onların araşdırılmasına ciddi ehtiyac var.
Məsələ ilə bağlı dünən “Kredo Bank”a dəfələrlə zəng edib bizə təqdim edilən telefon nömrələrinə zəng vursaq da, M.Vəkilovla danışa bilmədik.
Qarşı tərəfin məsələyə münasibətini öyrənməyə çalışacağıq.
Geri qayıt