Milli Şura rəhbərliyi "xəstə" elan olundu
19-02-2015, 11:38
Milli Şuranın Koordinasiya Mərkəzi (MŞ KM) toplantı keçirərək siyasi partiyalarla iqtidar arasındakı görüşlərə münasibətini açıqlayıb. MŞ KM-in üzvləri hadisəni dialoq yox, əslində ölkə iqtidarının avtoritar və repressiv mahiyyətini pərdələmək adlandırıblar. Meydan.tv-nin yaydığı xəbərdə deyilir ki, KM üzvlərinə görə, bu “dialoq” siyasi və vicdan məhbuslarının sayı üzrə “dünya çempionu” olan, parlamentində bir nəfər müxalifətçi olmayan, demokratik təsisat və prinsipləri məhv etməyi prioritetə çevirən hakimiyyətin beynəlxalq birliyə yönələn demokratiya imitasiyasına xidmət edən siyasi şoudur.
Sənəddə deyilir ki, KM üzvləri bu “şou”da iştirak edən siyasi partiyaların böyük əksəriyyətinin bugünədək fəaliyyətlərinin nəzərə çarpmadığına, onların adlarının belə ölkə cəmiyyətinə heç nə demədiyinə iddia edirlər: “Dialoq” imitasiyası başlanandan ölkədə insan hüquqlarının vəziyyəti daha da pisləşib, yeni həbslər həyata keçirilib, həbsdəki siyasi məhbuslara saxta hökmlər elan edilib, yeni və uydurma ittihamlar irəli sürülüb. Lakin bütün bunlar “dialoq” iştirakçılarını narahat etməyib və onların bugünədək əldə etdiyi yeganə nəticə “dialoqun davam etdirilməsi haqqında razılığa gəlinməsi” olub. Böyük əksəriyyətinin müxalifət adına iddia etməyə mənəvi haqqı olmayan və özlərindən başqa heç kimi təmsil etməyən fərdlərin bir iqtidar məmuru ilə belə predmetsiz və məzmunsuz görüşləri “hakimiyyət-müxalifət dialoqu” sayıla bilməz", - sənəddə vurğulanır.
MŞ rəhbərliyinin bu bəyanatına görüşdə iştirak edən partiyalardan bir neçəsinin sədrinin mövqeyini öyrəndik.
KXCP sədri Mirmahmud Mirəlioğlu bəyanatla tanış olmadığını dediyi üçün bəyanatın mahiyyətini onun nəzərinə çatdırdıq. Münasibəti belə oldu: “Mən sizdən eşitdiklərimin əsasında cavab verirəm. Hesab edirəm ki, o bəyanatdakı mövqe, yanaşma hətta tənqidə də layiq deyil, o dərəcədə zəifdir. İkincisi, Azərbaycan siyasətində, xüsusilə Milli Şuranın rəhbərliyində bir sıra insanlar var ki, onlara hörmətimizi saxlamaq şərtilə biz onların şəxsiyyətinə heç bir xələl gətirən ifadə işlətmədən onların fəaliyyətinə münasibət bildirmək istəyirəm. Bu gün Milli Şuranın Koordinasiya Mərkəzində elə şəxslər var ki, onlar kluarlarda, ayrı-ayrı şəxslərlə görüşlərdə, kütləvi görüşlərdə öz adamlarını aldadaraq deyirlər ”Əli Həsənov bizə on dəfə zəng elədi, amma biz oraya getmədik, Əli Həsənov zəng edib dəvət elədi, biz dedik ki, siz bizi heç cür oraya apara bilməzsiniz, Əli Həsənov filankəsə də zəng etmişdi, ancaq biz onu məcbur elədik ki, getməsin". Tərəfdarlarına bax, bu cür deyirlər. Olmayan şeyləri danışmaq ayıbdır. Mən sadəcə olaraq, təəssüf edirəm. Mən bunu mediaya açıqlamaq istəmirdim, amma məcbur elədilər deyirəm.
Əli Həsənovla görüşdə isə bütün məsələlər hamısı qaldırılıb. Biz heç o qənaətdə də deyilik ki, bütün orada deyilənlərin hamısı yüzdə yüz həll olunacaq. Bu cür görüşlərin olmasının Azərbaycan cəmiyyətinə xeyri var. Tənqid edən dostlar da unutmasınlar ki, ən çox da xeyri onlara var. Hesab edirik ki, bu görüşlərin səmərəsi də, nəticəsi də hər kəsə olacaq. Mənim buna böyük inamım var. Amma olmaya da bilər, bu da faciə deyil. Tənqid edirlər etsinlər, amma insaflı olmaq lazımdır. İnsafı, ədaləti kənara qoymaq olmaz".
Ümid Partiyasının sədri İqbal Ağazadə Milli Şuranın rəhbərliyinin bəyanatına sərt münasibət bildirdi: “Biz haqsızlığa qarşı mübarizə aparırıq. Harada ədalətsizlik varsa, orada mövqeyimizi ifadə edirik. Nə yazıq ki, dörd tərəfimiz haqsızlıq olur bəzən və nəyə qarşı mübarizə aparacağımızı bilmirik. Milli Şuranın da mövqeyi belədirsə, olsun. Eyni bəyanatlarla nə qədər istəsən çıxış etmək olar. Amma adamlara bircə şeyi xatırladıram ki, quyruq acılarını prosesin içərisində demokratikləşməyə ziyan kimi təqdim etməsinlər. 1995-ci ildən 2005-ci ilə qədər ”bu gün bizdən başqa müxalifət yoxdur" deyən adamlarla böyük bir kəsim mübarizə aparıb ki, bunlar müxalifət deyil.
Bu adamlar əslində siyasətə hakimiyyətdən getdikdən sonra bir təşkilat olaraq gəldikləri dönəmdən bu yana hamının onlara dediyi “siz müxalifət deyilsiniz”in acısını bu gün digərlərindən çıxarır. Ayıbdır belə yanaşma. Məşhur bir deyimdə deyilir ki, zəiflər qisas alır, güclülər bağışlayır, xoşbəxtlər isə unudur. O qədər zəifdirlər ki, 10 il onlara “müxalifət deyilsiniz” deyən adamlardan indi qisas almağa çalışırlar və deyirlər ki, bizdən başqa müxalifət yoxdur. Halbuki bu yanaşmanın özü səhvdir. Mən dünyada bircə nəfər də olsun ağlı başında olan adam tanımadım ki, müxalifət olmaq uğrunda savaşsın, ideoloji müharibə aparsın. Mən bu adamlara deyirəm ki, qardaş, əl çəkin biz müxalifət deyilik, amma biz haqqı müdafiə edirik. Ay qardaş, sənsən müxalifət buyur. Biz heç bilmirik kimik, amma biz haqqı deyirik, haqqı tapdalananın yanındayıq. Necə istəyirsən elə qəbul elə. Müxalifət tək sənsən, sonra?! Bu nəyisə dəyişirmi?! Müxalifətsən anladıq. Cəmiyyətə verə biləcəyini de görək nə verirsən.
Adam bu cür xəstəliyə tutularmı heç. Təəssüf edirəm, yazığım gəlir. Təəssüf edirəm ki, bu marafona qoşulan adını alim, ziyalı qoyan, professor deyilən adamlar da var. Oturduğum parlamentdə haqqı tapdalanan hər bir kəsi müdafiə etmişəm, hər bir kəs haqqında mövqe ifadə etmişəm. Kürsüdən hələ haqsız dediyim bircə dənə söz olmayıb, hələ haqsızın yanında olduğum bircə dənə də çıxışım olmayıb. Bu qədərmi ədalətsiz olub cəmiyyətə ədalət aşılamaq barədə düşünürlər?! Onlar bu cür ciddi xəstəliyə düçar olublar. Təəssüf ki, bu xəstəlik cəmiyyətə, demokratikləşməyə ziyan vurur. Vallah, çox səmimi deyirəm. Əlimdə imkanım olsa o insanları müalicə edərdim. Sadəcə, müalicəsi mümkün deyil. Xəstəlikdir bunlar, ciddi xəstəlikdir. Bir adam da tapılmır ki, bunları bir oturda qarşısına, deyə “bala, yazıqsınız özünüzü məhv eləməyin”. Yazıqlar olsun. Adamlar gözümüzün qarşısında məhv olur. Bu xəstəliyin adını gərək ekspertlər bildirə".
ADP sədri Sərdar Cəlaloğlu isə Milli Şuranın müxalifətçiliyini İŞİD-lə, Ukraynada döyüşən üsyançılarla müqayisə etdi: “İŞİD də özünü Suriyada hakimiyyətə qarşı əsas müxalifət elan etmişdi. Ukraynada mərkəzi hakimiyyətə tabesizlik nümayiş etdirib silahlı mübarizə aparanlar da özlərini müxalifət hesab edir. İndi gəlin görək, İŞİD-in müxalifliyi Suriya dövlətinə və xalqına xeyir gətirdi?! Milli Şuranın və AXCP-nin müxalifət olmağı indiyə qədər bu xalqa nə verib?! Bir müsbət nə isə verib?! Sən müxalifət ola bilərsən, ancaq sənin müxalifətçiliyin indiyə qədər bu ölkədə heç bir cüzi də olsa dəyişikliyə nail ola bilməyibsə, belə müxalifətçilik heç kimə lazım olmayan zərərli müxalifətçilikdir. 20 ildir sən Azərbaycan müxalifətinin önündə getdiyini bəyan edirsən, 20 ildir Azərbaycan müxalifəti uduza-uduza gedir. Sənin müxalifətçiliyin budursa, kimə lazımdır belə müxalifətçilik!? Bu xalq səni 20 ildir görür, alovlu taftalogiyadan ibarət nitq söyləmək xalqa xidmət etmək deyil”. \\ musavat.com \\
Geri qayıt