"İndi mən təzədən gedib Xalq Cəbhəsinin, yaxud Müsavatın üzvü olası deyiləm ki"...
5-02-2015, 11:12
Keçmiş baş prokuror, təxminən bir ay öncə YAP sıralarına daxil olmuş Əli Ömərovun Moderator.az-a genişmüsahibəsinin birinci hissəsini təqdim edirik:
-Əli müəllim, 600 minlik orduya-YAP-a üzv olmağınız münasibətilə sizi şəxsən təbrik edirəm. Üzv olarkən ayda nə qədər üzvlük haqqı keçirəcəyinizlə maraqlandınızmı?
-Hələ üzv olduğumun bir ayı tamam deyil. Doğrusu, heç bilmirəm nə qədərdir. Təbii ki, qanunda hansı miqdar nəzərdə tutulubsa onu da ödəmək lazım, burda nə var ki.
-Sizin YAP-a gəlişiniz birmənalı qarşılanmadı...
-O partiyanın yaranmasında mənim xidmətlərim çox olub. O vaxt mənim kabinetimdə gəlib vətəndaşlardan ərizə yığıblar Ağabəy Əsgərovla Əli Nağıyev. Mən kömək etmişəm bu işə. Gəncəbasardakı bütün ərkim çatan adamları partiyaya cəlb etməyə çalışmışam. Siz bilirsiniz ki, mən Heydər Əliyevçiyəm. İndiyədək heç yanda rast gələ bilmərsiniz ki, haradasa Heydər Əliyevin əleyhinə bir kəlmə danışım. İndi də Heydər Əliyevin adına bağlı olduğu üçün partiyaya qəbul olmuşam. Bunda da heç bir qaranlıq niyyətim, hansısa gizli planlarım olmayıb. Sadəcə o partiyanın yaranmasında da müəyyən qədər rolum olub. İndi də işləmirəm, təqaüdddəyəm, hər hansı bir partiyanın üzvü olmalıyam da. İndi mən təzədən gedib Xalq Cəbhəsinin, yaxud Müsavatın üzvü olası deyiləm ki. Özümün kömək etdiyim partiyaya sadəcə olaraq üzv qəbul olunmuşam. Bu da mənim təşəbbüsümlə olmayıb. Sizin kimi bir jurnalist mənə deyib ki, Əli müəllim, siz 91-lərdənsiniz, dəvət olunsanız gedərsinizmi, mən də demişəm ki, gedərəm. O da götürüb yazıb ki, Əli Ömərov Yeni Azərbaycan Partiyasına qəbul olunmaq istəyir. Bundan sonra mənə müraciət ediblər, mən də demişəm ki, mənim üçün fərqi yoxdur, lazımdırsa mən partiyaya girərəm. Beləliklə də partiyaya üzv olmuşam.
-Yeri gəlmişkən, indi Müsavat yaman günə qalıb. Elə az qala təcili yardıma möhtac oilan və kömək ediləsi partiya Müsavat idi...
-Bilirsiniz, mən bir sifətli adamam. İstəyir Müsavatın vəziyyəti ağır və ya yüngül olsun, əvvəlcədən də o partiyaların heç birinin üzvü olmamışam. Sözsüz ki, müxalifətdə də yaxşı insanlar var. İstər Müsavatda, istər Xalq Cəbhəsində də yaxşı oğlanlar, vətənpərvərlər var. Yəni əgər mən o partiyanın yaranmasına müəyyən qədər köməyim dəyibsə, ona görə YAP-a üzvlüyə qəbul olmuşam.
-Üzv olduğunuz hakim partiyada hətta müxalifətin mövcudluğunu danırlar, amma siz orada yaxşı oğlanların olduğunu deyirsiniz.
-Hər şeydən öncə biz hamımız azərbaycanlıyıq. Azərbaycanlı olmağımızla da fəxr etməliyik ki, millətimiz intellekt və mədəniyyət sahəsində, vicdan, səmimiyyət məsələsində hamıya nümunə ola bilər. Mən bütün bu məsələlərdə həmişə öz millətimi başqa millətlərdən üstün tutmuşam. Hansı partiyanın üzvü olub-olmamağın dəxli yoxdur, insanın əqidəsi düz olmalıdır. Bəzən biri o birinə irad tutur ki, filankəs mənim düşmənimdir, sən niyə ona salam verirsən? Axı sənə düşmən olan şəxs mənə dost ola bilər. Bunun nə dəxli var? İnsan insandır, yaxşısı da var, pisi də. Bu mənada mənim üçün iqtidar- müxalifət anlayışı əhəmiyyət kəsb etmir. Mənim üçün əsas insan, səmimiyyət, əxlaq, vicdan anlayışı əhəmiyyət kəsb edir. Kim vicdanlıdırsa onunla dost olmaq heç vaxt qəbahət hesab olunmamalıdır. Məsələn, Allahı tanımayan müsəlmandan Allahı tanıyan xristianı daha üstün tutmaq lazımdır. Ona görə də insanları iqtidara və müxalifətə bölmək doöru deyil. iqtidarda da yaxşı oğlanlar çoxdur, müxalifətdə də. Müxalifətdə də pisniyyət insanlar var, iqtidarda da.
-Namaz qılmırsınız?
-Qılıram.
-İllər ıərzində Əli Ömərova qarşı haqsız münasibət sərgilənib. O Əli Ömərova ki, 91-lərdən olub, bütün ömrü boyu Heydər Əliyevçiliyə sadiq qalıb. İllər sonra YAP-a üzvlüyünüz sizə olan haqsızlığın gecikmiş etirafı deyil ki?
-Mən üzv olandan sonra heç kimlə görüşməmişəm. İqtidarda bəzi adamlar var ki, bu gün də Əli Ömərova qarşı düşmən münasibət bəsləyirlər. O da bilirsiniz nədən qaynaqlanır? Çünki Əli Ömərov düz adamdır, prinsipialdır və hər zaman öz sözünü deyib, yaltaq adam deyil. O iqtidarda ki, yaltaq adamlar var, onlar ki, Əli Ömərova qarşı hər cür pisliklər ediblər və edirlər, sabah Allah etməsin, prezidentimiz İlham Əliyevin işi əyilsə, həmin yaltaq adamların hamısı onun üzünə durmağa növbəyə yazılacaqlar. Amma Əli Ömərov həyatının axırına qədər nə Heydər Əliyevə, nə də onun nəslinə qarşı heç vaxt xəyanətkar olmayıb və olmayacaq da.
-Baş prokuror olanda hər zaman Allahla olmaq mümkün deyil axı. Ümumiyyətlə hər zaman Allahla iş görmüsünüz?
-Mən bu gün də fəxr edirəm və həmişə də deyirəm ki, qoy tale mənə dostlarımın yox, müqəssirlərimin arzusu qədər versin. Təbii ki, ağır sözdür. Müqəssir cinayət törədib, oturub mənimlə üzbəüz, demişəm oğlum, gəl yerimizi dəyişək, bax sən bu cinayəti törətmisənmi? Bəli. Mənə kömək edə bilərsənmi? Deyir xeyr. Deyirəm ki, amma mən sənə qanun çərçivəsində bax bu köməyi edirəm. Ona görə də heç bir müqəssirim hələ Əli Ömərovdan şikayətçi, qarğışçı olmayıb. Amma iqtidarda elə adamlar var, Allahı bu gün də tanımır. Qoy tanımasınlar. Amma Allahın hökmü, ədaləti, cəzası böyükdür. Onu tanımayanların başına elə bir gündə ildırım çaxacaq ki, özləri də peşman olacaq ki, Allahım, Səni tanımadığıma görə bu fəlakətlə üzləşmişəm. Allahı kim tanıyırsa ona zaval yoxdur. Mənsə Allahı tanıyıram, Onun qarşısında baş əyirəm, yüksəlişimi də, nailiyyətimi də, geriliyimi də, pisliyimi, yaxşılığımı da-hər şeyi mən Onda görürəm.
-Geriliyinizi də Onunla bağladınız. Allah adamı olduğunuz halda niyə həyatınızın çox böyük hissəsini mənəvi sarsıntılarla keçirdiniz?
-Mən heç vaxt mənəvi sarsıntı keçirməmişəm.
-Qoy olsun haqsızlıqla üzləşmək.
-Sizcə Allahı tanıyanı Allah ömürlük vəzifədəmi tutmalıdır? Mənim sağlam balalarım, sağlam əiləm,özümün sağlam canım,Alaha şükr, bir tikə çörəyim də var. Allah bundan artıq nə verməlidir mənə? O siz dediyiniz də Allahdan asılı deyil.Allahın özü də “Quran”da şeytanın mövcudluğunudeyir . Yəni mənə pislik edən adamlar qəlbinəşeytan soxulmuş adamlardı. Hansı ki, əgər onlar mənim haqqımı tapdalayıblarsa, deməli, onlar Allaha qarşıda çıxıblar, Allahı datanımırlar. Amma əminəm ki. Allah bir gün onların cəzasını verəcək. Mən də ona tam inanıram ki, haqsız, günahsız yerə illərlə hüquqlarımı tapdalayanlar bir gün Allah qarşısında cavab verəcəklər.
-İnsan oğölunun səbri dardır və istəyir ki, dediyiniz o “bir gün” daha tez gəlsin, ən azı onu öz gözləriylə görüb təskinlik tapa bilsin...
Ardı var...
Geri qayıt