Tural Abbaslı və Ellada Məmmədlidən Müsavat rəhbərliyinə sərt mesajlar...
21-10-2014, 12:54
Müsavatda başqanlıq seçkilərindən sonra narazılıq və polemikalar səngimək bilmir. Hər keçən günü yeni iddialar meydana çıxır. Əsas narazılıq isə hazırkı başqan Arif Hacılı və başqanlığa keçmiş namizəd Qubad İbadoğlunun tərəfdarları arasında gedir. Başqanlığa gənclərin namizədi olmuş Tural Abbaslı və onun gənc komandası bu proseslərdə susqun görünür.
Tural Abbaslı musavat.com-a açıqlamasında özünün və tərəfdarlarının proseslərdə susqun görünməsinə belə aydınlıq gətirdi: “Qurultaydan keçən 20 gün ərzində hələ də problemlərin qaldığı doğrudur. Bunlar partiya üzvlərinin sosial şəbəkələr və mətbuatda səsləndirdikləri fikirlərdə daha aydın görünür. Hər keçən gün gərginlik daha aydın şəkildə görünür. Seçkidən qabaq belə fikir var idi ki, seçkiqabağı yaranan emosional hisslərdir. Təəssüf edirik ki, 20 gündür baş verənlər səngimir. Alovlana-alovlana gedir. İstefalar olanda mən bunun qarşısının qısa zamanda alınmasını qeyd etmişdim. Bu fikirlərimizi partiya rəhbərliyinin nəzərə almadığı ortadadır. Çalışmalıyıq ki, hər bir üzvümüzü qoruyaq. Qarşıdan parlament seçkiləri gəlir. Biz buna hazır olmalıyıq. İndiki partiya rəhbərliyi bu məsuliyyəti dərk etməlidir. Biz susqun deyilik. Problemləri hamıdan gözəl bilirik. Ən çox səs toplamış namizədlərin tərəfdarları arasında “soyuq müharibə” gedir. Təəssüf ki, bu reallıqdır. Biz bu məsələnin həllinə çalışırıq. Sosial şəbəkələrdə və mətbuatda yox, partiya daxilində. Bu baxımdan mövqeyimiz susqun görünə bilər. Amma qətiyyən belə deyil. Biz narazı tərəflərlə, istefa verənlərlə görüşmüşük. İstefa qərarının yanlış olduğunu bildirmişik. Partiya daxilində görüşlər keçiririk. Çıxış yolları axtarırıq. Bunlar bizim borcumuzdur. Amma təkcə bizlər yox, partiya rəhbərliyi bu məsələdə daha aktiv olmalıdır. Narazı qüvvələrlə görüşlər keçirməli, onları gələcəyə inandırmalıdır. Seçkidən sonra artıq “mənim tərəfim” anlayışı qalmır. Müsavat başqanı bütün partiyanın başqanıdır. Bütün partiyanı qucaqlamağı bacarmalıdır. Güman edirəm ki, Arif bəy lazımı addımları atacaq. Müsavat 100 ildir öz mövcudluğunu qoruyur. Təbii ki, istəyirik daha güclü Müsavat olsun”.
Tural Abbaslı Müsavat Məclisinə düşə bilməməsi ilə bağlı bunları dedi: “Mən və tərəfdarlarım obyektiv və subyektiv səbəblərdən Məclisə düşmədik. Bu məsələni texniki anlaşılmazlıqla izah etməyə çalışırlar. Biz heç kəsə bununla bağlı etiraz bildirmirik. Seçkinin nəticəsini tanıyırıq. Amma düşünmək lazımdır ki, Müsavat rəhbərliyində partiyanı irəli aparmaq gücündə olan şəxslər təmsil olunmalıdır. Buna şərait yaradılmalıdır. Artıq “mənim tərəfim”, yaxud “mənim əks tərəfim” anlayışları ilə seçkilər keçirilməməlidir”.
Başqanlığa keçmiş namizəd oktyabrın 25-də keçiriləcək Məclisə seçkilərdə boykot ehtimalının ola biləcəyini də qeyd etdi: “Bu ayın 25-də keçiriləcək seçkilərdə iştirakla bağlı qəti qərar verməmişik. Boykot ehtimalı var. Çünki artıq insanlar seçkidən-seçkiyə narazı qalırlar. Mənəvi zədə alırlar. Bunu haqsızlıq hesab edirlər. İnsanları namizədliyini verməyə məcbur etmək də olmur. Çalışacağıq qərara gələk. 25-də Müsavat Divanında 10 yerə seçkilər keçiriləcək. Bunları yanlış hesab edirəm. Məclisdə də dedim. Partiyanın bir orqanı formalaşmadan digərinə seçkilərin keçirilməsi tamamilə yanlışdır. İnsanları fakt qarşısında qoymaq olmaz. Elə müsavatçılar var ki, Məclisə belə düşməyiblər. Amma Divanda təmsil olunmağa layiqdirlər. Son seçkilərdə 6 nəfərin Məclisə düşməyi Divan seçkilərinə bir işarədir. Güman edirəm ki, belə seçkilər davam edərsə, vəziyyət gərginləşəcək. Divana seçkilər olsa, partiyada vəziyyət heç də xoş olmayacaq. Məclisə əgər namizəd olub seçilsək, namizədliyimizi Divana verəcəyik. Mən yenə qeyd edirəm ki, Müsavatın sıravi üzvü olmaq belə mənə fəxrdir. İndiyə qədər partiyanın güclənməsi üçün etdiklərimizin artığını etmək bizim üçün daha fəxrdir. Əgər müsavatçılar bizi layiq görsələr, Müsavatın varlığını qoruması üçün yox, hakim partiya olması üçün çalışacağıq. Vəziyyətin bu yerə çatması hazırki başqanın mövqeyindən asılıdır. “Mən düz deyirəm, qarşı tərəf səhvdir” anlayışı indiki situasiya uyğun deyil. Hamı düşünməlidir ki, partiya hamımızındır. Bu, 4 illiyə hesablanmış partiya deyil. Hərə üzərinə düşəni dərk etməlidir. Dərk etmək də şərt deyil. Uğurlu addımlar atılmalıdır”.
Seçkilərdə Qubad İbadoğlunun tərəfdarlarından olmuş, Müsavat Qadınlar Təşkilatının sədri Ellada Məmmədli baş verənlərlə bağlı daha kəskin danışdı: “Seçkidən bir müddət keçməsinə baxmayaraq, hələ də pozuntularla bağlı şikayətlərə baxılmayıb. Vaxtında şikayətləri təqdim etdikdə müxtəlif bəhanələr gətirərək, onu bizdən qəbul etməmişdilər. Şikayət e-mail poçtla göndərildikdən sonra video çarxı bəhanə edirlər. Bu da şikayətlərə obyektiv baxılmasını şübhə altına alır. Verəcəkləri cavab hər şeyi müəyyənləşdirəcəkdir”.
Ellada Məmmədli kimin seçilməsindən asılı olmayaraq, Qadınlar Təşkilatı olaraq sona qədər fəaliyyət göstərəcəklərini söylədi: “Müsavat Qadınlar Birliyi Şura tərəfindən təsdiq olunmuş fəaliyyət proqramı əsasında öz işini davam etdirəcəkdir. Qurultaydan öncə Şuramızın qərarı var. Kimin seçilməsindən asılı olmayaraq, bu qurum öz fəaliyyətini davam etdirəcəkdir. Sıralarımızı genişləndirməklə”.
Müsavatçı qadınların sədri indiyə qədər yeni başqanın gördüyü işlərin qənaətbəxş olmadığından söz açdı: “Yeni rəhbərlik narazı tərəflə eyni masa arxasında problemləri həll etməlidir. Sözdə qucaq açmaq, əməldə geri çəkilmək düz deyil. Görülən işlər məni qane etmir. Gizli qrupun iştirakçıları müsavatçıları təhqir etmələrinə baxmayaraq, vəzifə ilə mükafatlandırıldılar. Belə çıxır ki, opponentlərin tərəfdarlarını kim möhkəm söysə, vəzifə alacaqlar. Gedənlərin qarşısını almaq əvəzinə onlara xəyanətkar damğası vurmaq düzgün deyil. Bu ifadə yüksək məsuliyyət tələb edir. Xəyanətlər isbat olunmalıdır”. \\ musavat.com \\
Geri qayıt