“Müsavat”a başqan olmağa haqqı olan birinci şəxsəm”
17-09-2014, 11:38
Müsavat Partiyasının Divan üzvü, vaxtilə başqanın birinci müavini olmuş Vurğun Əyyub Hafta.az-a müsahibə verib.
Müsahibəni təqdim edirik:
- İndi təhsil sahəsində çalışsanız da, vaxtilə Müsavat Partiyasında kifayət qədər aktiv fəaliyyətiniz olub. Nostalji yaşayırsınızmı?
- Xeyr, bu hissi yaşamıram. Çünki indi də partiyanın divan üzvü olaraq siyasətdəyəm. Partiyanın qurultaya hazırlaşdığı və namizədlərin ciddi təbliğatının aparıldığı məqamdır. Bununla əlaqədar olaraq mən də son 20 gündə otuzdan çox rayon təşkilatlarında olmuşam.
- Namizədlərə hansı təklifləriniz var?
- Bütün namizədlərə ünvanlanacaq fikir bildirə bilmərəm. Çünki konkret olaraq bir namizədin təbliğatı ilə məşğulam. O da Qubad İbadoğludur. Bütün bildiklərimi də həmin namizədə söyləyirəm. Digərləri məndən hansısa məsləhət istəməyib, heç mən də söyləməyi doğru hesab etmirəm.
- Qubad İbadoğlunu dəstəkləmənizin səbəbi nədir?
- Qubad bəy 1996-cı il Müsavat Partiyasının sıralarına daxil olub. Çox qısa zaman kəsiyində partiyanın iqtisadiyyat komissiyasının rəhbəri olub. Eyni zamanda, bundan çox vaxt keçməmiş isə partiya üzvlərinin böyük əksəriyyətinin hörmətini qazanıb. 2000-ci ildə parlament seçkilərinə getmək üçün biz partiya daxili ilkin seçkilər keçirdik. Həmin seçkilərdə Qubad bəy partiyaya cəmi dörd il qatılmasına baxmayaraq, siyahıda beşinci yerdə idi. Halbuki, həmin zaman Müsavat Partiyasının çox tanınmış simalarından ilk onluğa düşməyənləri də var idi. Birinci müavin olduğum zamandan Qubad İbadoğlu diqqətimi cəlb edib. Sonrakı illərdə isə Qubad bəy Müsavat Partiyasının iqtisadi proqramlarının əsas müəllifi olub. 2003-cü ildə partiya başqanı İsa Qəmbər prezidentliyə namizəd idi. Onun çıxışı zamanı oxuduğu proqramların böyük əksəriyyətini Qubad bəy hazırlamışdı. Bu baxımdan hesab edirəm ki, partiya üçün ən doğru namizəd Qubad İbadoğludur. Onun çox geniş beynəlxalq əlaqələrinin də olduğunu nəzərə alsaq, partiya üçün ən doğru isim məhz Qubad bəydir.
- 2003-cü ildən sonra Müsavat Partiyasında əsaslı aktivlik müşahidə olunmur. Sizcə Qubad İbadoğlu partiyanın əvvəlki aktiv fəaliyyətini bərpa edə biləcəkmi?
- Müşahidələriniz doğrudur. 2003-cü ildə Müsavat Partiyası çox güclü idi. Eyni zamanda, bu, həm də Azərbaycan cəmiyyətinin güclü vaxtı idi. Ötən 11 il ərzində cəmiyyətimiz xeyli passivləşib. 2003-cü ilə qədər partiyamız öz qurultayını ən iri məkanlarda keçirirdi. Bu gün isə bizə qurultay üçün Əmircan göstərilib.
- Cəmiyyətin passivləşdiyini söyləyirsiniz. Ancaq 2013-cü ildə bir sıra aksiyaların şahidi olduq. Sizcə cəmiyyət partiyaya alternativ təklif verməlidir, yoxsa əksinə? Bəlkə partiyada passivliyin səbəbi funksionerlərin potensialının azalmasıdır?
- Bu əsas səbəb ola bilməz. Ancaq inkar etmirəm ki, 2012-ci ildə Türkiyəyə getməyimlə siyasətdən kənarda qaldım. İndi də Divan üzvü olaraq bütün vaxtımı partiyaya sərf edə bilmirəm. Söylədiyiniz kimi, funksionerlərin fəaliyyətindəki zəiflik də buna səbəbdir. Lakin bir daha vurğulayıram ki, məsələləri bütövlükdə buna bağlamıram. Bu gün polisin maaşı müəllimin maaşından 7-8 dəfə artıb. Cəmiyyətdə narazı olan qüvvələr də əvvəlki kimi etiraz etmir. Müsavat Partiyasına 2006-cı ildən bəri qurultay keçirilməsi üçün şərait yaradılmır. Hər bir qurultay yenilənmək deməkdir. Bu yeni nəfəs gəlmədikcə, partiya içərisində durğunluq başlayır. Qubad İbadoğlu başqan olarsa, onun təcrübəsi və yaşı imkan verir ki, gəncliklə bizim nəsil arasında körpü rolunu oynaya bilsin. Onun adı indiyə qədər heç bir siyasi konfliktdə hallanmayıb. Bu da onun şəxsiyyət olaraq üstün tərəfidir ki, konfliktlərlə məşğul olmaq əvəzinə birləşdirici funksiyasını həyata keçirsin. Qubad bəy partiyanın idarə edilməsində hər şeyi nəzarətsiz buraxıb, qismətə ümid olan adam deyil. O hər şeyə elmi əsaslarla yanaşmanın tərəfdarıdır. Hesab edirəm ki, onun rəhbərliyi dövründə Azərbaycan cəmiyyəti daha da formalaşaraq, fəallaşacaq. Qubad bəy həmçinin hakimiyyətlə intellektual mübarizəyə üstünlük verir ki, bu da onun üstün cəhətidir.
- Müsavat Partiyasının restoranda, yoxsa Əmircanda qurultayının keçirilməsinin tərəfdarısız?
- Əslində bizə seçim imkanı verilməyib. İnanmıram ki, toyların tüğyan etdiyi indiki vaxtda hansısa restoran bizə yer versin. Ya biz qurultayı qərargahda keçirməliyik, ya da Əmircanda. Qərargahda keçirməyin çoxlu qüsurlu tərəfləri var. Yer çox kiçikdir. Fikirlərimizi qonaqlara çatdırmaq üçün ən müasir texnologiyanın nailiyyətlərindən istifadə etməliyik. Bəziləri hesab edir ki, texnologiyadan istifadə etməklə, virtual formada qonaqların da iştirakı ilə qərargahda qurultay keçirmək olar. Təbii ki, bu fikrin sahiblərinin də ideyasına hörmətlə yanaşıram. Çünki bunun siyasi üstünlüyü də ondan ibarətdir ki, hamı Müsavat Partiyasına qurultay üçün yer verilməməsini görəcək. Şəxsən mən Əmircana getməyin tərəfdarıyam. Çünki qərargahda keçiriləcək qurultayın necə çətinliklə başa gələcəyini bilirəm.
- İsa Qəmbər bildirib ki, müsavatçılar istəyərsə, partiyada hansısa postda qurultaydan sonra təmsil oluna bilər. Siz başqanın hansı vəzifədə qalmasını istəyirsiniz?
- Qurultaya hazırlıq üzrə Təşkilat Komitəsinin və Divanın iclasında da bu cür təkliflər səslənir. İsa bəy isə təkliflərə cavab olaraq bildirir ki, mənim gələcək statusum haqqında narahat olmayın. O, partiyanın lideri və digər bu kimi statusları sevmir. Mənim aləmimdə isə onun hər hansı bir statusa ehtiyacı yoxdur. İsa bəy harada olsa belə yenə də İsa Qəmbərdir. Bildiyimə görə, başqan partiyada yalnız sıravi üzv kimi qalmayacaq. O, artıq səhv etmirəmsə, məclis üzvlüyünə namizədliyini irəli sürüb. Bu isə o deməkdir ki, İsa Qəmbər partiyanın siyasətinin formalaşmasında qurultaydan sonra da iştirak edəcək. Məclis üzvü olmasa belə İsa Qəmbərin təkliflərinə partiyamız hər zaman açıqdır. Onun partiya üzvləri arasındakı nüfuzu bizim heç birimizin adı ilə müqayisəyə gəlməyəcək qədər yüksəkdir. Başqana bununla bağlı hansısa təklifim yoxdur. Ancaq müsavatçılar başqa fikirdədirlərsə və İsa bəy bunu qəbul edəcəksə, istənilən statusun ona verilməsinə razıyam.
- Namizəd Tural Abbaslı bildirib ki, bəzi köhnə müsavatçılar məni dəstəkləsə də, bir qismi bizə inamsız yanaşır. Siz Tural bəy haqqında nə düşünürsünüz?
- Tural bəy başqanlığa namizəddir. Buna onun nizamnamə və göstərdiyi fəaliyyəti ilə bağlı tam hüququ çatır. Düşünürəm ki, Qubad İbadoğlu iki nəsil arasında uçurum yaranmamaq üçün körpü rolunu oynaya biləcək bir namizəddir. Onun təbliğat zamanı bir çox üstünlüklərini söyləyirəm. Tural bəyə gəlincə, ona heç kim qadağa qoya bilməz. Hər şeyi müəyyənləşdirən bizim proqnozlarımız və arzularımız deyil, keçiriləcək olan seçkinin nəticələri olacaq.
- Keçirilən sorğular nəticəsində Arif Hacılının da tərəfdarlarının çox olduğu ortaya çıxır. Qubad İbadoğlunun ən güclü rəqibi Arif Hacılını hesab etmək olar?
- Hesab edirəm ki, dörd namizədin hər biri bir-birinə rəqabət aparmağa layiqdirlər. Məsələn, düşünmürəm ki, Səxavət Əlisoy zəifdir, Tural güclü olduğu üçün əsas rəqib ikincidir. Heç Qubad bəy də bu kimi məsələlərə belə yanaşmır. Onların hər birinin partiyada tərəfdarları var. Bu mənada namizəd dörd nəfərdirsə, demək mübarizə də onların arasında gedəcək.
- Çoxları sizin də namizədliyinizi irəli sürəcəyinizi gözləyirdi. Lakin bu addımı atmadınız.
- Bilmirəm necə səsləndirim ki, qeyri-təvazökar səslənməsin. Hesab edirəm ki, Müsavat Partiyasının başqanı olmağa haqqı olan şəxslərdən biri, bəlkə də birincisi mənəm. Sadəcə olaraq, istəyirəm ki, partiyanın rəhbərliyində yenilənmə getsin. Nəticədə isə başqan, qeyd etdiyim kimi gənclərlə bizim nəsil arasında olan əlaqə qura biləcək biri olsun. Bu baxımdan Hikmət Hacızadə, Mehman Cavadoğlu və eləcə də mən geri çəkilmişik. Biz hesab edirik ki, əsas başqan olmaq deyil, hədəfimiz Müsavat Partiyasının birliyini təmin etmək, gücləndirmək bayaq dediyimiz kimi, ən azı 2003-cü il səviyyəsinə qaldırmaqdır. İndiki durum təbii olaraq məni də narahat edir. Partiya maliyyə çətinlikləri yaşayır. Rayon təşkilatları ilə intensiv əlaqələr az qala qırılıb. Onların qərargahları yoxdur və çayxanalarda toplaşırlar. Belə bir məqamda onlardan yüksək nə isə gözləmək çox çətindir. Bu kimi neqativ hallardan çıxış yolu tapmaq üçün dostlarımızla müzakirələr aparırıq. Arzu edirik ki, qurultaydan sonra seçilən başqan bu çıxış yollarını tapsın və məsləhətlərə də qulaq assın.
- Təhsil sahəsində uzun müddət fəaliyyəti olan şəxs kimi bugünkü təhsil sistemimiz sizi qane edirmi?
- Heç bir şəkildə qane etmir. Çünki indi təhsil sisteminin strukturu bəlli deyil. Bu bir az yeni dünya, bir az da köhnə təhsil sistemlərindən qarışıqlıq ortaya çıxıb. Xəzər Universitetində çalışmaqdan çox məmnumam. Hesab edirəm ki, buradan başqa heç bir təhsil ocağında çalışa bilməzdim. Burada işləmək mənə çox rahatdır.
- Övladlarınızın təhsilindən razısınızmı?
- Hər iki qızım ödənişsiz əsaslarla təhsil alaraq, ali məktəbi bitirib. Böyük qızım Slavyan Universitetinin Türkiyə üzrə regionşünaslıq ixtisasını bitirib. Bitirdiyi ildə İstanbul Universitetinin uluslararası ilişkilər ixtisası üzrə magistratura pilləsinə qəbul olunub. Kiçik qızım isə bu il Azərbaycan Dövlət İqtisad Universitetini bitirib və hazırda o da magistratura pilləsi üzrə təhsil almağa hazırlaşır. Onlara hər zaman demişəm ki, hər şeyi oxuduğunuz yerdən və müəllimlərinizdən gözləməyin. Özünüzün də təşəbbüsünüz olmalı, savadınızı daha da artırmalısınız.
Geri qayıt