"Müxalifət əlinə silah götürdüyü gün Azərbaycana dönəcəm"
17-03-2014, 09:51
Eks-spiker Rəsul Quliyevin 1995-ci ilin mart hadisələri ilə bağlı açıqlaması ictimai rəydə böyük marağa səbəb olmaqla yanaşı, ötən dövrün hadisələrinin yenidən aktuallaşmasına səbəb olub. Bugünlərdə məlum olaylarla bağlı Moderator.az-a müsahibə verən mərhum Rövşən Cavadovun qardaşı Mahir Cavadov 19 il əvvəlki hadisələrlə bağlı şok informasiyalar səsləndirib. M.Cavadovun yeni müzakirə və mübahisələrə səbəb olacaq müsahibəsini oxuculara təqdim edirik.
- Mahir bəy, bu gün bəzi insanlar Rövşən Cavadovun ölümündə məhz sizi baiskar hesab edir. Maraqlıdır, siz özünüz necə, bu məsələdə az da olsa özünüzü müqəssir hesab edirsinizmi?
- Mən Rövşəni 300 OMON-çunun yanında qoyub, tək getmişəm. Atam kitabında yazıb ki, Rövşən bronjiletini çıxarıb mənə verib və oradan çıxardıb. Amma bu, həqiqət deyil. Mənim də, Rövşənin də öz bronjiletimiz olub. Onun bildiyiniz kimi güllə yaraları ayağından idi və o, qan itirmədən həlak olmuşdu. Daxili orqanları zədələnməmişdi.
Digər baxımdan, mən vəziyyəti görürdüm və bizi məhv etmək istədiklərini bilirdim. Məsələn, Əli Ömərov məni AzTV-də cinayətkar elan etdikdən sonra, telefon açıb nümayişkəranə prokurorluğa dəvət etməsi və ardından Rövşənə Heydər Əliyevin telefon açaraq, get, gör prokurorluqda nə baş verir deyib, oraya göndərməsi, daha sonra Cavadov qardaşları prokurorluğu dövlət çevrilişi məqsədi ilə zəbt edib deməsi, elə bizi məhv etmək arzusunun sübutu deyildimi? Biz hədəfə alınmışdıq və vuruşmağa məcbur idik.
- Ölkədən getməsəydiniz, hətta həbs olunsanız belə bir gün azadlığa qovuşar və bu gün Azərbaycanda mübarizə apara bilərdiniz. Amma siz ömürlük didərginliyi seçdiniz.
- Mən heç zaman təslim olmazdım! Bizim üçün bu, variant deyildi. Mən öldürülməyi həbs edilərək əsgərlərimin gözü qarşısında döyülüb, təhqir edilməkdən üstün tuturdum. Azərbaycanı tərk etmək fikrim yox idi...
- Baş prokuror Əli Ömərovla bağlı konfiliktiniz haqqındaı nə deyə bilərsiniz? Doğrudanmı onunla başqa cür haqq-hesab çəkmək mümkün deyildimi? Axı bir rayon prokuroru nə qədər haqlı olsa belə, baş prokurorla arasındakı konfilikti bu şəkildə „həll etməsi“doğrudan da yolverilməzdir.
- Mən Əli Ömərovun kabinetinə öz dəvəti ilə getmişdim. Onun sifətinə avtomatın qundağı ilə vurmağım da onun uydurmasıdır. Hətta o vaxt demişdi ki, Cavadov məni elə yerimdən vurub ki, göstərə bilmirəm. Bununla özünü rüsvay etdi, sadəcə. Əslində onu əsgərim vurmuşdu, mən əsgəri qorumaq üçün öz boynuma götürdüm.
Sizə deyim, siz də bilin ki, əslində hər şey necə oldu. Mən evimdə oturub, televiziyaya baxırdım. Bir də gördüm ki, Ömərov bəyan edir ki, Mahir Cavadov Afiyəddin Cəlilov və Şəmsi Rəhimovu öldürüb.
Prokurorluğun binasının daxili işıqlandırması elə idi ki, bizi prokurorun qapısında duran mühafizə yaxınlaşmadan tam görə bilmirdi. Tamamən yaxınlaşdığımızda bizi gördülər və biz yaxın məsafədən onları asanlıqla tərkisilah etdik, ardından Ömərovun kabinetinə daxil oldum. Otaqda heç kəs yox idi, yandakı istirahət otağından gələn səsdən anladım ki, Ömərov orada gizlənib, stulu oraya tərəf atdığımda avtomatdan atəş açdılar. Mən dedim ki, əlimdə qumbara var, çıxmasanız içəri atacam. Ömərov və qardaşı, silahı yerə qoyub, çıxdılar. Təsadüf nəticəsində, prokurorluğun qarşısından keçən Elçin Əmiraslanov da öz yanında olan uşaqlarla buraya gəlmişdi. Onlar Qazaxdan Bakıya silah dalınca gəlmişdilər. Bunların içində mənim köməkçim Elçin Əliyev də vardı. Hələ sentyabırın 1-də məni aradan götürmək üçün adamlarımı zərərsizləşdirməkdən ötürü əmr verilmişdi və Elçinin qonşusunun evinə girib hamısını öldürmüşdülər. Sonra Elçinin evinə girib, tutub aparmışdılar ki, guya qonşunu bu öldürüb. Sonra mən təzyiq edərək onu buraxdırmışdım. Mənimlə Ömərovun kabinetinə girən uşaqlardan biri Ömərovu sifətindən avtomatın qundağı ilə vurdu, bu zaman qırmızı telefon zəng çaldı, Ömərov dedi ki, H.Əliyevdir. Mən də qaldırdım telefonu və dedim ki, Afiyəddinlə Şəmsini öldürtdürüb, mənim boynuma yıxırsınız. H.Əliyev bildirdi ki, mənim xəbərim yoxdur, Rəsulla Ömərovun işidir. Mən də dedim ki, Ömərovla Quliyevi yaxşı tanıyıram, onlar qorxaq adamlardır, sizin göstərişiniz olmadan belə işə hünərləri çatmaz. Bir az mübahisədən sonra telefonu asdım, daha sonra oraya Rövşən də gəldi. Məni görüb təəcübləndi ki, burda nə edisən? Mən də ondan soruşdum, bəs sən burda neynirsən? Dedi ki, H.Əliyev telefon açıb dedi ki, get prokurorluğa dəy. Bu vaxt, H.Əliyev televiziyaya çıxaraq, bizi prokurorluğu tutmaqda günahlandırdı.
Mən Ömərovu uşaqların yanında qoymuşdum, sonra dedilər ki, halı pisdir, buraxdım getsin xəstəxanaya, anlamışdım ki, H.Əliyev üçün Ömərovun heç bir dəyəri yoxdur, onu öldürüb-öldürməməmiz Əlyevi maraqlandırmır...
- Rəsul Quliyev iddia edir ki, o zaman sizi sıralarınızda mənəvi ata hesab etdiyiniz bir şəxsi var idi, hansı ki, o, mərkəzi hakimiyyəti lazımi informasiyalarla təmin edirdi. Həmin şəxs kimdir?
- Rəsul Quliyev xəyal danışır, bizim yanımıza heç kesi ideoloji ata kimi yerləşdirə bilməzdilər. Biz kimsənin məsləhəti ilə hərəkət etmirdik, atamızın belə bizə təsiri imkansız idi. Amma bizim sıralara OMON-çu qismində döyüşçülər yerləşdirdikləri doğrudur. Bu insanlardan isə biz istifadə edirdik. Bizə sədaqətlərini sübuta yetirmək, inam qazanmaq üçün əmrlərimizi can-başla yerinə yetirirdilər.
- Sizcə Rövşən Cavadov ağ bayraq qaldırandan sonra niyə öldürüldü? Qətlin kim tərəfindən icra edildiyi sizə məlumdurmu?
- H.Əliyev ANS-də tokşou təşkil etdirmişdi. Oraya mənim atamı da dəvət etmişdilər. Orada Mirşahinin vasitəsi ilə sübut etməyə çalışırdılar ki, Rövşəni öldürən Rövşən Əkbərov – 777-ci briqadanın komandiridir. Niyə? 94-cü ilin fevralında Rövşən Əkbərov öz briqadasını geri çəkərək Rövşən Cavadovu 20 nəfərlə mühasirədə qoyduğuna görə Rövşən onu döymüşdü və bu insidentdən istifadə edərək, bu ölümü onun boynuna qoymağa çalışırdılar. Amma bu, tam yalandır. Rövşən Cavadovu öldürən Əmiraslan Qara oğlu Əliyevdir. Ağ bayraq qaldırmasına gələndə isə Rövşən təslim olmaq üçün ağ bayraq qaldırmamışdı. S.Dəmirəl onu inandırmışdı ki, danışıqlara getməlidir və ağ bayraq bu danışıqlara razılıq əlaməti olaraq qaldırılmışdı.
H.Əliyevə bizim sağ qalmamız sərf etmirdi, çünki onun bağladığı sülh bizi qane etmirdi.
- Azərbaycana nə vaxt qayıtmağı planlaşdırırsınız?
- Azərbaycana müxalifət əlinə silah götürdüyü gün dönəcəm.
Geri qayıt