"Sadəcə, sosial şəbəkələrdə aktiv olduqları üçün rəğbət görürlər..."
18-08-2023, 09:55
“Nikosayağı” adı ilə tanınan bloger Nicat Şakirlinin idarə etdiyi avtomobilin qəzaya düşməsi xəbərinin ölkə gündəmindən düşməməsi tənqid olunur. Müzakirələr zamanı bildirilib ki, cəmiyyətin hansısa məmur özbaşınalığını gündəmə çevirmədiyi halda, sürət həddini aşan, dəfələrlə xəbərdarlıq alan adi blogerin qəzada qolunu itirməsini bu qədər gündəm etməsi doğru deyil. Bəziləri hətta bloqeri müdafiə də edirlər, deyirlər ki, Nicat Şakirliyə cəza verilməməlidir, bu, sadəcə, bədbəxt hadisədir.
DİA.AZ-ın məlumatına görə, bununla bağlı Pravda.az-a fikirlərini bölüşən Ağ partiyanın sədri Tural Abbaslı isə deyib ki, sosial şəbəkə fenomenliyi anlayışı son dönəmlər leksikonumuza girib və bu, müasir dünyanın gətirdiyi yeniliklərdən biridir.
“Müxtəlif sosial şəbəkə platformalarında məşhurlaşan, cəmiyyət arasında tanınan, rəğbət görən-görməyən sosial şəbəkə fenomenləri var. “Nikosayağı” deyilən Nicat Şakirli də belə fenomenlərdəndir. Cəmiyyətlərin hamısında belədir, daha çox sosial şəbəkə fenomenləri, musiqiçilər, aktyorlar, aktrisalar gündəmdə olurlar, nəinki elm adamları, siyasilər, ciddi peşə sahibləri. Bu, dünyanın hər yerində belədir. Buna görə cəmiyyəti qınamaq istəmirəm ki, niyə birinə diqqət ayırır, digərinə yox. Bu, mediamızın, televiziyamızın, sosial mediamızın təqdimatından da asılıdır. Lazımi dəyərləri lazımınca təbliğ edə bilmədiyimiz üçün bu boşluğu “fenomenlər” dediyimiz təsadüfi insanlar doldura bilir. Xüsusi heç bir fərqlilikləri olmayan insanlardır. Sadəcə, sosial şəbəkələrdə aktiv olduqları üçün rəğbət görürlər, yaxud məşhurlaşırlar. Onları da qınamaq olmaz. Heç kim deyə bilməz ki, sən niyə populyarsan?”
T.Abbaslı Nicat Şakirliyə cəza verilməməsinin tərəfdarı olanlara isə belə cavab verib: “Qanun qarşısında hamı bərabərdir, eynidir. Qanun nəyi deyirsə, onu tətbiq etmək lazımdır. Düzdür, bəzən məhkəmə sistemi nəzərə alır, amma kimsə məşhurdursa, aktyordursa, fenomen, yaxud siyasətçidirsə, qanundan yüksəkdə durmur. Hələlik belə bir nümunə yoxdur. Son nümunələrdən biri meyxanaçı Rəşad Dağlı idi. O, cinayət törətdi, məhkəmədə hökm aldı. Qanun nə deyirsə, o da olacaq, olmalıdır. Qəzada dünyasını dəyişən gənc qardaşımıza Allahdan rəhmət, Nicat bəyə şəfa, hər ikisinin ailəsinə səbir diləyirəm. Bizə “keçmiş olsun” demək düşər. Hər halda hüquq-mühafizə orqanları üzərilərinə düşəni edəcəklər. Düşünürəm, belə mövzularla gündəmi bu qədər məşğul etmək doğru deyil”.
Geri qayıt