"Yəni o nə erkəkdir, nə də dişi"
24-10-2020, 08:57
Ötən gün Roma Papası dünyanı silkələyəcək bir açıqlama verdi. Belə ki, Papa Fransisk eynicinsli nikahların leqallaşmasına tərəf çıxıb. Onun sözlərinə görə, LGBT üzvləri də ailəyə sahib olmaq hüququna malikdirlər.
Bu barədə Papa öz həyatından bəhs edilən “Francesco” sənədli filmində danışıb: “Homoseksuallar ailəyə sahib olmaq haqqına sahibdirlər. Onlar da Allah bəndəsidirlər, ailəyə sahib olmaq hüququna malikdirlər. Heç kim buna görə təcrid edilməməli və bədbəxtliyə düçar olmamalıdır”.
Papa əlavə edib ki, o, bu cür vətəndaş birlikləri barədə qanunları dəstəkləyir.
Xatırladaq ki, Roma Papası bundan əvvəl də bütün kilsə tabularını qıraraq homoseksuallara dəstək nümayiş etdirib. Məsələn, 2015-ci ildə Papa vaxtilə kilsənin qovduğu ispan əsilli transseksualı və onun qadın sevgilisini Vatikanda qəbul etmişdi.
Hələ 2013-cü ilin mart ayında “Mən kiməm ki, eynicinsləri mühakimə edim” deməklə bütün diqqətləri üzərində cəmləmişdi. Məlumata görə, Papa hələ Argentinada kardinallıq edərkən Müqəddəs Cümə günü şərəfinə transseksualların ayağını yuyub. O, Həzrəti İsanın 12 havarisinin ayaqlarını yuması mərasimini xatırladan ayində peyğəmbərin trans fərdlərin də ayaqlarını yuduğunu da deyirmiş. Papa Fransiskin “Kilsənin qapıları eynicinslilərə və boşananlara, digər qovulanlara açıq olmalıdır” təklifi Yepiskoplar Məclisindəki mühafizəkar din adamlarının müxalif çıxması səbəbindən qəbul edilməmişdi.
Qeyd edək ki, dünyada mövcud olan bütün dinlərdə eynicinslərin evlənməsi birmənalı şəkildə qəbuledilməz sayılır. Bəs Roma Papasının bu cür davranışının səbəbi nədir?
Sosioloq Əhməd Qəşəmoğlu mövzuya bu cür rəy bildirdi: “Əgər bu məsələnin yaxşı tərəfi olsaydı bu günə qədər insanlıq tarixində bu məsələyə müsbət baxılardı. Lakin məlum olduğu kimi, eynicinsli insanların birlikdə olması bütün tarixlərdə bütün xalqlarda hamı tərəfindən neqativ qarşılanıb. Elə xristian dininin özündə də bütün dinlərdə olduğu kimi, bu məsələyə yaxşı münasibət olmayıb. İndi ortalığa çıxıb burada nəsə məntiq axtarmaq doğru hal deyil. İndi şahidi oluruq ki, orentasiyası dəyişik olan uşaqların, gənclərin sayı çoxalıb. Çoxları bunu onunla izah edir ki, əvvəllər də bu cür məsələlər var idi, sadəcə indi leqallaşdırıldığı üçün daha çox artıb. Deyim ki, bu səhv düşüncədir. Özüm bir sosioloq olaraq bu sahədə çoxlu təhlillərim olub. Niyə dünyada bu cür gənclər çoxaldı?
Qurani-Kərimdə belə bir ayə var: “Həyat yoldaşınıza Allahın buyurduğu yerdən yaxınlaşın”. Məlum olduğu kimi uşağın təlim-tərbiyəsinin istənilən mərhələsində ananın rolu böyükdür. Uşağin həyatının formalaşmasında 3 mühüm amil var. Onlardan biri uşağın ana bətnində keçdiyi həyatdır. Ana hansı hisslər keçirirsə onu bətnində olan uşağına impuls şəklində göndərir və uşaqda aktivlik yaranır. İndi Avropa mədəniyyəti ucbatından kişilər bəzən qadınları ilə Allahın buyurduğu yerdən deyil, başqa kənar münasibətdə olur. Nəticədə doğulan oğlanlar arasında transseksual yönümlü uşaqlar çox olur. Çünki ana bətnində olarkən ananın davranışları nəticəsində orentasiyasında dəyişikliklər yaranır. Bu da Avropa mədəniyyətinin təsiri altında baş verən bir şeydir. Beləliklə, cəmiyyətdə də bu cür insanların sayı artdıqca onlar ictimai rəy yaratmağa, nəsə tələb etməyə başlayırlar. Tələb çoxaldıqca da marəsiz qalıb, onların evliliklərini, açıq-aşkar birlikdə münasibətlərini qəbul etməyə başlayırlar.
Deyərdim ki, Roma papası da vəziyyətdən çıxış yolu kimi bu cür aşıqlama verib. Əslində Roma Papası bu açıqlamaları verərkən din xadimi kimi deyil, sosioloq kimi davranıb. Yəni problem böyük olduğu üçün bu vəziyyətdən bu cür çıxmağa çalışıb. Halbuki bu cür açıqlamalar verməzdən əvvəl din xadimi olaraq başqa şeyləri deməli idi, amma deyə bilmir. Beləliklə də hazırda belə bir axmaq vəziyyət yaranıb. Məsələn mən Hollandiyada çox olmuşam. Amsterdamın mərkəzində bir yer var, oradan keçəndə görürsən ki, transeksualların klubları var, yığışıblar ora. Kimisi şahmat oynayır, kimisi başqa əyləncə ilə məşğuldur. Bunların hamısı Avropa mədəniyyətinin üzə çıxan tərəfləridir.
Amma Azərbaycan xalqının öz qədim adət-ənənələri, eyni zamanda dinimiz olan İslamın öz tələbləri var. Bu dəyərlərlə yaşamaq, onlara əməl etmək daha doğrudur. Gələcəkdə bu cür insanların çoxalması mənəvi dəyərləri aşındırır. Mənəvi dəyərlər aşınanda isə cəmiyyətdə xaos yaranır. Ümumiyyətlə, bütün dini kitablar, təkamullərdə hər zaman yazılıb, qeyd olunub, vurğulanıb ki, cəmiyyətlərdə mənəvi dəyərlər öndə olmalıdır. Mənəvi dəyərlər öndə olanda bütün problemləri tənzimləmək olur. Eyni cinslilərin evlənməsi və münasibətləri bunlar cəmiyyətdə mənəvi dəyərlərə zərbə vurur. Ona görə də düşünürəm ki, bu məsələ ilə bağlı dərin sosioloji təhlilərə, tövsiyələrə böyük ehtiyac var".
İlahiyyatçı Emil Rahiloğlu isə qeyd etdi: “Bildiyiniz kimi, İslam dinində bu mövzu birmənalı olaraq qadağandır. Dini yaradan Allah insanı çox gözəl tanıdığı üçün həm psixoloji, həm fiziki cəhətdən bizi bu cür yaradıb. Buna görə də bilir ki, nəyə qadağa qoyub, nəyə yox. Eynicinslilərin evlənməsinə icazə verilməsində gəldikdə isə, bunu Roma Papası demir, kim deyir-desin, bu dində qadağandır. Ümumiyyətlə, istənilən İbrahimi dinlərdə, o cümlədən İslamda, xristanlıqda, yəhudilikdə bu konkret olaraq qadağandır. Roma Papası həmin açıqlamaları ilə sadəcə özü üçün humanizmlik sərigləyir. Yəni bu, artıq onun şəxsi nəzəridir. Bu nə xiristinalığın, nə də hansısa dinin nəzəri deyil”.
İxtisasca həkim olan ADP partiyasının sədri Sərdar Cəlaloğlu da qeyd etdi ki, istənilən dində eynicinslərin münasibəti qadağandır: “Bu, böyük günah kimi zinanın bir formasıdır. Lakin qeyd edim ki, təbiətdə heyvanlar aləmində də transseksuallıq var. Bunu ibtidai canlılarda da görmək olur. Məşhur bir psixoloq var. O deyir ki, inkişaf tam formalaşıb, başa çatmayıb. Əvvəllər ibtidai cins olmayıb. Sonradan ikicinslilik olub, yəni dişi və erkək. Bunu yaranması üçün də əvvəlcə xarici, sonra isə daxili mayalanma olub. İnkişaf dünyanın sonunda başa çatacaq. O qeyd edib ki, gələcəkdə tamamilə başqa, yeni cinslər ortaya çıxacaq. Hansı ki, biz bunu artıq ABŞ-da görürük. ABŞ-da orta cins deyilən bir cins yetişdirilir. Yəni o nə erkəkdir, nə də dişi. Burada da məqsəd daha çox məhsuldarlıq əldə etməkdir. Amma eynicinsli insanların evlənməsi, bunun rəsmiləşdirilməsi dində qadağandır. Hətta eynicinsli insanların bunu hər kəsin gözü önündə etməsi, onu ictimailəşdirməsi cinayətdir. Təbii ki, bu problemi tibbi yolla, tərbiyə ilə, cəza üsulu ilə aradan qaldırmaq mümküü deyil. Amma bir daha qeyd edirəm ki, bunu yaymaq, təbliğ etmək, Qurani-Kərimdə də deyildiyi kimi, ictimailəşdirmək böyük günahdır”.
Musavat.com
Geri qayıt