"Cəmil müəllim, körpüləri bu sayaq hövkə ilə yandırmayın"
8-06-2020, 08:43
Milli Şuradan istefa verən Eldəniz Quliyevlə Cəmil Həsənli arasında qalmaqal davam edir.
Cebhe.info xəbər verir ki, Eldəniz Quliyev sosial şəbəkə hesabında Cəmil Həsənlinin “Filmin sonu” başlığı altında yazdığı ittihamlara cavab verib: “Cənab professor həmin statusda, az qala bəndənizi satqınçılıq meyillərində suçlayır və mənim hakimiyyətin Milli Şuranı dağıtmaq planlarında müəyyən yer almış fiqur olduğuma eyham vurur. Hətta bir az da qabağa gedərək, ailə məsələlərimə də müdaxilə edir və bununla qırmızı xətti tapdamış olur. Cəmil müəllim, körpüləri bu sayaq hövkə ilə yandırmayın. Çaşıb düşmən tərəfdəki sahildə qala biləcəyinizdən ehtiyat edin. İndi nə oldu, nə baş verdi ki, mənim Milli Şuradan uzaqlaşdırılmağım, MŞ-ya ciddi problemlər yaratmağım haqda ard-arda sicilləmə statuslar yazırsınız?! Və nədən bu statusların əksəriyyətində, yumşaq desək, həqiqəti əks etdirməyən fikirlər, müddəalar və dezinformasiyalar səsləndirirsiniz?!”
E.Quliyev bildirib ki, Cəmil Həsənli, eləcə də MŞ Koordinasiya üzvləri onun Milli Şuradan məhz bu dəyərlərə sayğısız münasibətə görə istefa verdiyini bilir:“Mənim üçün bu dəyərlər taleyüklü məsələdir. Bəs siz nə etdiniz, hörmətli Cəmil bəy? LGBT-ni, feministəri, homofobları, bir sözlə xalqın qəbul etmədiyi bir qrup əxlaqsız toplumun müdafiəsinə qalxdınız, üstəlik bunu liberal dəyərlərin qorunması kimi qələmə verməyə cəhdlər etdiniz. Ərə getməyi ilə fəxr edən və addım başıbunu reklam edən üzdəniraq İsmayıl Cəlilovu görünməmiş canfəşanlıqla hamilyə götürdünüz. Xeyr, hörmətli Cəmil müəllim, alınmayacaq! Çünki bu xalqın tam əksəriyyəti bu cür yad və əxlaqsız yaşam tərzini, bu sayaq adamları qəbul etmir, edə bilmir, etməyəcək də! Sadəcə, iyrənir. Buna əmin olun. Siz heç kimlə məsləhətləşmədən, Milli Şuranın adından, bizlərin bu toplumun hüquqlarını qoruyacağı ( və qoruduğu) haqqında bəyanat verdiniz. Özü də bir neçə dəfə.
Niyə belə etdiniz, bunun mənası, mahiyyəti, məqsədi nə idi? Kimlərin dedikləri ilə, ABŞ-da, ya Avropadakı hansı dairələrin göstərişi, yaxud dirijor çubuğu ilə bunlara rəvac verdiniz? Yaxud öz düşəncənizdə, dünyaduyumunuz, əxlaq normalarınızda bir neçə ayın içində hansı transformasiya baş verdi ki, belə yanlışlıqlara yol verdiniz?
Yuxarıda mən həqiqəti əks etdirməyən iddialar söylədiyinizi üstüörtülü dedim, amma ortada açıq yalanlar da var. Özünü ziyalı sayan heç bir bəndə belə ağ yalanları utanmadan, yəni qırmızı-qırmız deməz. Mən Milli Şuradan çıxarılmamışam, şəxsən öz istəyimlə istefa vermişəm. Səbəbini yuxarıda qeyd etmişəm. Guya MŞ-da qalmağım üçün hamıya yalvarmağım, bu da ağ yalan, hətta riyakarlıqdır. Guya MŞ Koordinasiya Mərkəzinin üzvləri mənim qurumdan çıxarılmağım barədə əvvəlcədən razılığa gəliblər, bu, tamamən və başdan- ayağacan uydurmadır. Bu, necə olur axı, Cəmil müəllim, mənim 25 ildə bir dənə də olsun ssenarim qəbul olunmur, hətta məni kinostudiyanın, Mədəniyyət Nazirliyinin həndəvərinə belə buraxmırlar, amma bu müddət ərzində sizin 10-15 kitabınız çıxır? Və satqın mən oluram!
Bu, necə olur ki, dəfələrlə parlamentdə təmsil olunmaq təkliflərini mən rədd edirəm, amma siz siyasi partiya yoldaşlarınızı atıb da, gedib 10 il saxta Milli Məclisin deputatı olursunuz. Və yenə də mən satqın oluram?!
Axı bu, necə olur ki, məni məhkəmələrə çəkir, cərimə edir, küçə süpürtdürürlər, ən başlıcası, 3 il sərasər ölkədən çıxışıma mənə qadağa qoyulur, amma siz həmən zamanlarda 10-15 dəfə sərbəst şəkildə Qərb dövlətlərinə səfərlər edir, Avropanın kurortlarında kef edirsiniz?! Və yenə də satqın çıxan mən oluram?
Bu, necə olur axı, mən 25 ildir ki, işsiz-gücsüz dolanmağa məhkum olunuram, aptekdən dərmanlarımı belə borca almaq zorunda qalıram, amma sizə həm universitetdə dərs deməyə, həm də ABŞ da mühazirələr oxumağa, orada viski içə-içə buradakı dindarları aşağılamağa şərait yaradılır?! Və yenə də satqın damğası, nədənsə mənə vurulur!”
E.Quliyev C.Həsənlinin onun ailə məsələlərinə ironik münasibətindən də yazıb: “O ki qaldı ailə məsələsinə ironik atmacanıza, bunu, sizə heç yaraşdırmadım. Ayıbdır. Həyat yoldaşımın Xalq artisti fəxri ad almasını az qala hökumətə satqınlığım kimi qələmə verirsiniz. Milli Şurada sizdən yaxşı bilən yoxdur ki, 30-35 bədii filmdə baş rolun ifaçısı olan Xalidə xanım bu adı hələ 20-25 il əvvəl almalıydı. Mənə görə, müxalif mövqeyimə, mübarizəmə görə düz 25 il ona fəxri ad vermədilər. Baxmayaraq ki, Kinemotoqrafçılar İttifaqı və Mədəniyyət Nazirliyi 25 il ərzində mütəmadi olaraq, bu haqda hər Kino günündə Prezident Aparatına təqdimat göndərib. Bir də o, biz evlənməmişdən qat-qat qabaq kino sənətindəydi. İndi bütün ömrünü milli kinoya həsr etmiş, ahıl bir aktirisaya fəxri ad verilməsini mənə qarşı ittiham kimi irəli sürməyiniz, ən yumşaq tərzdə desəm, ləyaqətsizlikdir. Xalidə xanım Xalq artisti fəxri adı alanda Milli Şura üzvləri, başda siz olmaqla, hamınız məni təbrik etdiniz. İndi durub sözaltı mənayla bəyan edirsiniz ki, guya “başınız qarışıq olduğundan təbrik etməyi unutmusunuz”. Hə, yeri gəlmişkən, gec də olsa, mən də deyim, qızınızı ingilisə ərə verməyiniz münasibəti ilə sizi təbrik edirəm. Unutqanlığımı qüsura yazmayın, lütfən.
Son olaraq bildirirəm ki, əgər siz həqiqətən həyat yoldaşımın fəxri ad almasına görə məni satqın hesab edirsinizsə, (hər halda yazınızdan belə qənaət yaranır) və bu haqda ciddi-ciddi abzaslar yazır, eləcə də eyni mövzunu düşük-düşük adamlara yazdırırsınızsa, onda məni, istər-istəməz, sizi həm satıcı, həm də satılmış adlandırmağa sövq edirsiniz. Mən də qayıdıb deyə bilərəm ki, siz satıcı kimi milli-mental və dini dəyərlərimizi “optovoy” şəkildə və keçi qiymətinə əcnəbilərə satırsınız. Satqın kimi isə məndə əsaslı şübhələr yaranıb ki, siz ABŞ-a gedəndən bəri kimlərinsə təsir dairəsinə düşmüsünüz və Azərbaycanın dövlətçilik maraqlarına zərbə vuracaq haçalı-məkirli mövqe nümayiş etdirirsiniz. Ancaq bütün bunlara rəğmən mən yenə də sizə satqın demirəm, deməyəcəm də! Çünki inanıram ki, nə vaxtsa şəxsimə qarşı irəli sürdüyünüz nahaq ittihamlardan və məni sındırmaq meyillərinizdən utanacaqsınız”.
O ki qaldı “filmin sonu” mesajınıza, tələsməyin. Görünür, cavan vaxtlarınızda hind kinolarına çox baxmısınız. O kinolarda filmin əvvəlində, yəni elə ilk kadrlardaca filmin sonunun nə ilə bitəcəyi bəlli olur. Odur ki, çalışın filmi əvvəlindən izləyin”.
Geri qayıt