“Siyasətdən gedəcəm” vədinə əməl etməyən kimdir
22-11-2019, 09:01
2019-cu ildə növbədənkənar parlament seçkiləri keçiriləcəyi proqnozunun reallaşmaması bu proqnozu ilk dəfə irəli sürən Vətəndaş və İnkişaf Partiyasının sədri Əli Əliyevə yönəlik atmacalı fikirlərin səslənməsinə yol açıb.
AMİP-in sədr əvəzi Arzuxan Əlizadə “Yeni Müsavat”a açıqlamasında deyib ki, biriləri 2019-cu ilin axırlarınadək seçkilərin keçirilməyəcəyi təqdirdə siyasətdən gedəcəyini bəyan edərək hətta mərc gəlməyə də qalxmışdı, ancaq həmin siyasətçi mərci uduzsa da siyasətdən getmək vədini yerinə yetirmədi: “Mərci uduzanın siyasət meydanını tərk edib-etməyəcəyini özü və izləyiciləri bilsin, amma hesab edirəm ki, hər kəs dediyi sözün fərqində olmalıdır, ələlxüsus da siyasi fəaliyyətlə məşğul olan şəxslər bu və ya digər məsələ ilə əlaqədar proqnoz verməyə qalxırlarsa ən azından hüquqa və fakta əsaslansalar daha doğru olar”.
Məsələ ilə bağlı Əli Əliyevlə də danışdıq. O bildirdi ki, növbədənkənar seçkilərin keçiriləcəyi iddiasının üzərində bu gün də qalır: “Mən bu iddianı irəli sürəndə musavat.com-un canlı efirində YAP-çı deputatlardan biri ilə debatda ”mərc də gəlməyə hazıram, sözümün də altından imza atıram" kimi ifadəni işlətmişəm, amma siyasətdən gedəcəyəm deməmişəm. Fikirlərimi əsaslandırmaq üçün analogiya da gətirmişəm. 2017-ci ilin yayında mən prezident seçkilərinin növbədənkənar keçiriləcəyi ilə bağlı bəyanat vermişdim. O vaxt da demişdim ki, əgər şərait uyğun olsa, 2017-ci ilin sonunda, olmasa 2018-ci ildə vaxtından əvvəl prezident seçkisi keçiriləcək. Sonra da demişdim ki, uyğun şərait olacaqsa, 2019-cu ildə növbədənkənar parlament seçkiləri də olacaq. Növbədənkənar prezident seçkiləri bilirsiniz ki, keçirildi.
Birincisi, mən seçkiləri təyin eləyən adam deyiləm, seçkilərin təyin olunması səlahiyyəti ölkə prezidentindədir. Mən bu gün də deyirəm və mövqeyimin üstündə dururam ki, Azərbaycanda parlament seçkiləri növbədənkənar keçiriləcək. Real siyasətlə məşğul olmayan adamlar, təsadüfi adamlar, boş yeri doldurmaq funksiyası daşıyan adamlar ağzına gələni danışa bilər. Bu, əsas deyil. Əsas siyasi məntiqi, hadisələrin inkişafını analiz etməkdir, onlara qiymət verməkdir. Mənim hesablamalarıma görə, növbədənkənar parlament seçkiləri iyul ayında olmalı idi. Onun da öz məntiqi var idi. Görürsünüz ki, ölkədə hansı proseslər getdi və gedir".
Əli Əliyev vurğuladı ki, onun 2019-cu ildə növbədənkənar seçkilər olacağı barədə proqnoz verməyinə səbəb hakimiyyətin bu ilin əvvəlindən davranış məntiqi idi: “Davranış məntiqi onu deyirdi ki, hakimiyyət dəyişikliklərə getmək zorundadır. Bu dəyişikliklər komanda dəyişikliyi, struktur dəyişikliyi, hakimiyyət idarəçiliyinin fəlsəfəsinə yönələn dəyişikliklər olacaq. Məgər biz bu il bu dəyişiklikləri müşahidə etmirik? Biz o dəyişikliklərin içindəyik. Azərbaycanın iqtidarı 2019-cu ildəki qədər ardıcıl olaraq müəyyən mənada xalqın xeyrinə addımlar atmamışdı. 2019-cu il başlayandan Azərbaycanda minimum əmək haqqı 2 dəfə artıb, ilk dəfə respublikanın prezidenti 2 fevralda gənclərlə görüşü zamanı dövlət himnini şəxsən ifa edib, Şamaxıda, Ağsuda baş verən zəlzələ zamanı camaatdan məktubları şəxsən yığdı, prezident camaatla selfi çəkdirir, cəmiyyətə yönəlik mesajlar verilir. Biz 16 il ərzində prezidentin təyin olunan nazirləri, icra başçılarını publika önündə qəbul edib təlimatlandırdığını görməmişdik. Bu da bu il baş verdi. Bizim ağlımıza gəlməzdi ki, hakimiyyətin əsas sütunlarından biri Ramiz Mehdiyev siyasi idarəçilikdən uzaqlaşdırılacaq. Bu da məhz 2019-cu ildə baş verdi. Mənim proqnozumda icra strukturlarında dəyişikliyin vacibliyi də var idi. 2019-cu ildə məhz bu istiqamət daha önə çıxmalı oldu. Ona görə də parlament seçkilərinin keçirilməsi bu il reallaşmadı. Əvvəl mən düşünürdüm ki, parlament seçkiləri olacaq, sonra icra strukturlarında dəyişikliklərə, struktur islahatlarına başlanacaq. Belə məlum oldu ki, parlament seçkilərini qeyd olunan məsələlərdən sonraya keçirdilər. 2019-cu ildə elə addımlar atıldı, elə dəyişikliklərə başlandı ki, bunlar heç də növbədənkənar parlament seçkiləri qərarının verəcəyi effektdən az olmadı, hətta deyərdim daha üstün oldu. Hesab edirəm ki, dəyişikliklərin önə çıxarılma ardıcıllığı prioriteti daha düzgün seçilib. Əvvəl qeyd olunan dəyişikliklər və struktur islahatları, sonra seçkilər keçirmək yolu seçildi. Doğru seçimdir. Elə addımlar atılıb ki, ölkənin fundamental həyatına daha ciddi təsir göstərəcək addımlardır. Biz yaxın zamanlarda növbədənkənar parlament seçkilərində bunun şahidi olacağıq. Bu dəyişikliklərin olacağının anonsunu siyasi partiya rəhbərləri sırasında ilk dəfə mən vermişəm. Həyat göstərir ki, mənim proqnozlarım gəlib yerini alır”.
Geri qayıt