Sabah iqtidar və müxalifət bir araya gələcək
10-09-2019, 08:15
Sentyabrın 11-də saat 11:00-da ölkə iqtidarı və müxalifəti “Park İnn” hotelində toplaşacaq. Dəyirmi masa formatında keçiriləcək tədbirin əsas mövzusu xaricdən Azərbaycana qarşı təhdidlərin artması olacaq. Toplantının keçirilməsi təşəbbüsü ilə Ana Vətən Partiyası çıxış edib.
Dəyirmi masaya Azərbaycandakı bütün siyasi qüvvələr, tanınmış QHT-lər, media kapitanları və müstəqil siyasi ekspertlər dəvətlidir. Tədbiri keçirməkdə əsas niyyət Azərbaycanda siyasi proseslərə istənilən səviyyədə xarici müdaxilə meyllərinin qarşısını almaq üçün vahid iradənin ortalığa qoyulmasıdır.
Heç kəsə sirr deyil ki, artıq iki ilə yaxındır Azərbaycan cəmiyyəti, iqtidarı, tanınmış şəxslər, bütövlükdə xalqımız müxtəlif səbəblərdən Avropaya gedib müəyyən dairələr tərəfindən idarə olunan “söyüş müxalifəti”nin təhdidi altındadır. Onların xaos yaratmaq yönündəki çağırışları Azərbaycanda hər kəsi narahat edir. Məhz bu tədbirdə də müzakirələr əsasən bu yöndə olacaq. Dəyirmi masanın maraqlı bir formada keçiriləcəyi gözlənilir. Belə ki, ilk dəfə olaraq, bura siyasi partiyalarla yanaşı, tanınmış QHT-lər, media kapitanları və müstəqil siyasi ekspertlər dəvət alıb.
Bu barədə “Yeni Müsavat”a AVP sədri, deputat Fəzail Ağamalı məlumat verdi: “Bu tədbirdən ciddi nəticələr gözləyirəm. Biz hər zaman Azərbaycanın taleyüklü məsələlərində ölkəmizin sağlam qüvvələrini bir yerdə görmüşük. Əminəm ki, bundan sonra da bir yerdə olacağıq. Tədbirdə Azərbaycanda dövlətçiliyimizə, xalqımızın milli maraqlarına sadiq olan bütün siyasi qüvvələr, vətəndaş cəmiyyətinin təmsilçiləri, dəvət etdiyimiz ekspertlər, media kapitanları iştirak edəcəklər. Orada vahid mövqedən çıxış edəcəyik. Burada niyyət ancaq dövlətçiliyimizin mövqeyində dayanmaqdır. Ölkəmizdə sağlam siyasi qüvvələr də var. Onlar dövlətçilik mövqeyindən çıxış edirlər. Bunlar əsl müxalifətdir. İradəmizi ortalığa qoymalıyıq. Bu məqsədlə tədbir keçirmək təşəbbüsündə bulunduq. Tədbirin təşəbbüskarı mənəm. Bura iqtidar partiyasını da dəvət etmişəm. Ümidvaram ki, onlar iştirak edəcəklər. Bununla bağlı ilkin razılıq var. Müxalifət partiyalarını da dəvət etmişik. Onların əksəriyyəti iştirak etməklə bağlı dəvətimizi qəbul ediblər”.
Geri qayıt